Alde batetik, Auzitegi Goreneko eta Botere Judizialaren Kontseilu Nagusiko presidentea, María Isabel Perelló Doménech andrea, Auzitegi Goreneko eta Botere Judizialaren Kontseilu Nagusiko presidente izendatzen duen irailaren 3ko 888/2024 Errege Dekretuaren arabera izendatua (2024ko irailaren 4ko BOE), Botere Judizialaren uztailaren 1eko 6/1985 Lege Organikoaren 585. artikuluak ematen dizkion ahalmenez baliatuz, eta Botere Judizialaren Kontseilu Nagusiaren ordezkari gisa, Botere Judizialaren Lege Organikoaren 598.1 artikuluan ezarritakoaren arabera.

Eta, bestetik, Euskal Autonomia Erkidegoko Administrazio Orokorraren aldetik, María Jesús Carmen San José López andrea, Euskal Autonomia Erkidegoko Justizia eta Giza Eskubideen sailburua, lehendakariaren ekainaren 24ko 34/2024 Dekretuaren bidez izendatua, Autonomia Estatutuaren 33.2 artikuluak eta Jaurlaritzari buruzko ekainaren 30eko 7/1981 Legearen 8.b) artikuluak ematen dizkioten ahalmenez baliatuz.

Bi alderdiek elkarri aitortzen diote adenda hau gauzatu eta sinatzeko gaitasun eta legitimazio nahikoa, eta, horrenbestez, honako hau

ADIERAZTEN DUTE:

1. Botere Judizialaren Kontseilu Nagusiak eta Euskal Autonomia Erkidegoak 2025-2028 urteetarako karrera judizialeko kideen etengabeko prestakuntzaren arloko lankidetza-hitzarmena sinatu zuten 2025eko apirilaren 24an.

2. Hitzarmenaren bosgarren eta hamargarren klausuletan xedatutakoaren arabera, dagokion adenda sinatuko da urtero, prestakuntza-ekintzak eta hurrengo urteetarako aurrekontu-ekarpena jasoko dituena.

3. Hitzarmenaren Jarraipen Batzorde Mistoa 2025eko azaroaren 3an bildu zen, protokoloak jaso bezala, 2025erako karrera judizialeko etengabeko prestakuntzako programak eta ekintzak planifikatzeko (Eskola Judizialaren Batzordeak onartu zuen protokoloa, 2025eko apirilaren 23ko bileran), eta erabaki zuen bi erakundeen arteko lankidetzarekin jarraitzea, 2026an egin beharreko prestakuntza-ekintzak eta aurrekontu-ekarpena zehaztuz.

4. Hori dela eta, bi alderdiek adostu dute prestakuntzaren arloko 2026rako hitzarmenaren adenda hau sinatzea, klausula hauen arabera:

   KLAUSULAK

   Lehenengoa. Hitzarmenaren adenda honen xedea da Euskal Autonomia Erkidegoko Gobernuaren eta Botere Judizialaren Kontseilu Nagusiaren arteko lankidetza antolatzea, 2026an Euskal Autonomia Erkidegoan destinoa duten karrera judizialeko kideei oro har zuzendutako prestakuntza- eta hobekuntza-jarduerak egiteko.

   Bigarrena. Euskal Autonomia Erkidegoko Gobernua eta Botere Judizialaren Kontseilu Nagusia lankidetzan arituko dira hitzarmenaren eranskin honen xede diren prestakuntza-jarduerak diseinatzen, finantzatzen, antolatzen eta gauzatzen, baldin eta autonomia-erkidego horren eremuan egiten badira eta eranskinean jasota badaude.

   Hirugarrena. Hitzartutako jarduerak egitearen kostua erakunde sinatzaileek finantzatuko dute, bakoitzak bere ekarpena eginda, honela:

   1. Jarduerak bi erakundeen artean finantzatuko dira, eta muga beren aurrekontu-ekarpena izango da. Finantzaketa hori % 50ekoa izango da, eta ez da 40.000 eurotik gorakoa izango.

   2. Botere Judizialaren Kontseilu Nagusiak gehienez hogei mila euro (20.000,00 euro) emango ditu, eta Eusko Jaurlaritzako Justizia eta Giza Eskubideen Sailak gehienez ere beste hogei mila euro (20.000,00 euro), 2026an egiten diren jardueretarako.

      2026. urterako, Botere Judizialaren Kontseilu Nagusiari dagokion zatia aurrekontu-partida hauen kontura izango da: 080132.111.O.22606 (bilerak eta hitzaldiak), 080132.111.O.230 (dietak eta ostatua), 080132.111.O.231 (joan-etorriak), 080132.111.O.233 (ordainsariak). Partida horiek 2026ko aurrekontuari dagozkio.

      Eusko Jaurlaritzako Justizia eta Giza Eskubideen Sailari dagokion zatia 2026 1001611100 1.14110.23700 2023/000648 aurrekontu-partidaren kargura izango da.

   3. Likidazio partzialak egin behar izanez gero, Botere Judizialaren Kontseilu Nagusiak Justizia eta Giza Eskubideen Sailari transferituko dio gastuen zenbatekoa, dagokion zatian, sail horrek egindako jarduerek sortutako gastu horiei buruzko ziurtagiria egin ondoren.

   4. Bestalde, Botere Judizialaren Kontseilu Nagusiak bere gain hartu ahal izango du jarduera jakin batzuk egitea, jarduera horien ondoriozko gastuekin batera, eta Justizia eta Giza Eskubideen Sailari dagokion zatia ordaintzeko eskatu ahal izango dio, aldez aurretik ziurtagiria aurkeztuta.

      Laugarrena. Adenda hau sinatzen den unetik aurrera jarriko da indarrean, eta 2026ko abenduaren 31ra arteko indarraldia izango du.

      Adierazitakoarekin eta hitzartutakoarekin bat etorriz, sinatzaileek, beren eskumenak baliatuz, adenda honen bina ale sinatu dituzte, hasieran adierazitako tokian eta egunean.

      Egoitza elektronikoa, 2026ko maiatzaren 11a.

      Botere Judizialaren Kontseilu Nagusiko presidentea,

      MARÍA ISABEL PERELLÓ DOMÉNECH.

      Justizia eta Giza Eskubideen sailburua,

      MARÍA JESÚS CARMEN SAN JOSÉ LÓPEZ.

2025eko azaroaren 3an, epaile eta magistratuen etengabeko prestakuntzaren arloko lankidetza-hitzarmenaren Jarraipen Batzordea bildu zen, elkarte judizialetako ordezkariekin eta berdintasuneko magistratu ordezkariarekin batera, hitzarmen horren esparruan 2026rako egin beharreko jarduerak diseinatzeko.

Programa hori lantzerakoan, kontuan hartu dira egin diren proposamenak, betiere epailetzako profesionalen artean hausnarketarako eta elkarrizketarako guneak ahalbidetzeko, jurisdikzio-funtzioa betetzeko interes berezia izan dezaketen gaien inguruko azterketa eta eztabaida sustatuz. Gaiak hautatzerakoan, ordena bakoitzaren alderdi egungoenak hartu dira kontuan. Ikastaroak jurisdikzio-ordena bakoitzerako espezializatuta egongo dira, baina eskainitako plaza guztiak betetzen ez badira, karrera judizialeko edozein kidek eskuratu ahal izango ditu, zerbitzuak ematen dituen eremua edozein dela ere. Bertaratuen gehieneko kopurua jarduera bakoitzean finkatzen da, xede-jurisdikzio-ordenaren arabera. Kasuren batean plaza baino eskatzaile gehiago balego, hitzarmenaren Jarraipen Batzordeak plaza kopurua handitzen ote den aztertuko du. Kopurua handitzen ez bada eta plaza baino eskatzaile gehiago balego, Botere Judizialaren Kontseilu Nagusiaren Batzorde Iraunkorrak egingo du hautaketa. Eskainitako plazen % 70era iristen ez diren eskaerak dituzten jarduerak automatikoki eten egingo dira.

Hasierako aurrekontu-partida berrogei mila eurokoa da (40.000,00 euro), hogei mila eurokoa (20.000,00 euro) Botere Judizialaren Kontseilu Nagusiak jarritakoa eta hogei mila eurokoa (20.000,00 euro) Eusko Jaurlaritzak jarritakoa.

Hasteko, parametro hauek ezartzen dira, egiten diren jarduerak arautzeko:

Prestakuntza-ekintzak zuzentzen, kozuzentzen eta koordinatzen dituzten pertsonek, egun bateko iraupena badute, seiehun eta berrogeita hamar euro (650,00 euro) gordin jasoko dituzte gehienez zeregin horrengatik, txosten bat ematea edo mahai-inguru batean parte hartzea barne. Prestakuntza-ekintzen zuzendaritza-, zuzendarikidetza- eta koordinazio-lanak egiten dituzten pertsonen zeregina jardueraren zuzendaritza soilik bada, gehienez ere berrehun eta berrogeita hamar euro (250,00 euro) jasoko dituzte. Jarduera batek bi zuzendari edo koordinatzaile edo gehiago baditu, horien guztien artean hainbanatuko da ordainsaria.

Egun eta erdiko iraupena duten prestakuntza-ekintzen zuzendaritzan, zuzendarikidetzan eta koordinazioan diharduten pertsonek zazpiehun eta hirurogeita hamabost euro gordin (775,00 euro) jasoko dituzte gehienez zeregin horrengatik, eta hor sartuko da hitzaldi bat ematea edo mahai-inguru batean parte hartzea. Prestakuntza-ekintzen zuzendaritza-, zuzendarikidetza- eta koordinazio-lanak egiten dituzten pertsonen zeregina jardueraren zuzendaritza bada soilik, hirurehun eta hirurogeita hamabost euro (375,00 euro) jasoko dituzte gehienez. Jarduera batek bi zuzendari edo koordinatzaile edo gehiago baditu, haien guztien artean hainbanatuko da ordainsaria.

Hizlari gisa esku hartzen duten irakasle laguntzaileek laurehun euroko (400,00 euro) ordainsari gordina jasoko dute gehienez. Ponentzia bi hizlarik edo gehiagok partekatzen badute, ordainsaria haien guztien artean hainbanatuko da.

Prestakuntza-ekintzaren zuzendari edo koordinatzaile ez diren mahai-inguruetako parte-hartzaileek eta moderatzaileek hirurehun euroko (300,00 euro) gehieneko ordainsari gordina jasoko dute beren lankidetzagatik.

Goian adierazitakoekin bat ez datozen irakasle-lankidetzen kasuan, Hitzarmenaren Batzorde Betearazleak dagokion ordainsari gordina finkatuko du. Nolanahi ere, orduko 30,00 eta 100,00 euro artekoa izango da, eta gehienez 300,00 eurokoa.

Hitzarmen honen esparruan, ez dira kopuru gehigarriekin ordaintzen txosten edo komunikazio idatziak.

Jarduera hauek proposatzen dira:

PV2601. José María Lidón ikastaroa. Adimen artifiziala erabakiak hartzerakoan: laguntza edo ordezkapena.

Plazak: 15.

Iraupena: egun eta erdi.

Zuzendaritza: Laura Yuste Fernández andrea. Durangoko Auzialdiko Auzitegiko Arlo Zibileko eta Instrukzioko magistratua. 1 zk.ko plaza.

Eguna: azaroaren 5a eta 6a.

Lekua: Bilbao.

PV2602. Arau- eta jurisprudentzia-esparruko berritasunak lan-arloko jurisdikzioan. Aipamen berezia 158/2022 Legearen aplikazioari.

Plazak: 10.

Iraupena: egun 1.

Zuzendaritza: Garbiñe Biurrun Mancisidor andrea, Euskal Autonomia Erkidegoko Auzitegi Nagusiko Lan Arloko Salako presidentea.

Eguna: ekainaren 4a.

Lekua: Bilbao.

PV2603. Etxebizitza zeharkako ardatz gisa jurisdikzio zibilean eta familia-jurisdikzioan: gai substantiboak eta prozesalak.

Plazak: 10.

Iraupena: egun eta erdi.

Zuzendaritza: Ana Rosa Rincón Varona andrea, Barakaldoko Auzialdiko Auzitegiko Arlo Zibileko Ataleko magistratua. 2 zk.ko plaza.

Eguna: irailaren 24a eta 25a.

Lekua: Bilbao.

PV2604. Tresna digitalak nazioarteko lankidetza judizial zibilerako.

Plazak: 10.

Iraupena: egun 1.

Zuzendaritza: Paula Boix Sampedro andrea, BJKNko Nazioarteko Harremanen Zerbitzuko ataleko burua, Bilbaoko Auzialdiko Auzitegiko Arlo Zibileko Ataleko magistratua.

Eguna: maiatzaren 21a.

Lekua: Bilbao.

PV2605. Egungo gaiak banku-auzietan: analisi substantiboa eta prozesala.

Plazak: 10.

Iraupena: egun eta erdi.

Zuzendaritza: Ana García Orruño andrea, Bizkaiko Probintzia Auzitegiko Bosgarren Sekzioko magistratua.

Eguna: ekainaren 11 eta 12a.

Lekua: Bilbao.

PV2606. Erronka berriak ingurune digitaletako indarkeria dela eta. Haurtzarori eta nerabezaroari zuzendutako begirada.

Plazak: 10.

Iraupena: egun 1.

Kozuzendaritza: María Josefa Barbarín Urquiaga andrea, Gipuzkoako Probintzia Auzitegiko presidentea, eta Yolanda Paredes Vázquez andrea, Bilbaoko Auzialdiko Auzitegiko Instrukzio Ataleko magistratua. 3 zk.ko plaza.

Eguna: azaroaren 12a.

Lekua: Bilbao.

PV2607. Benetako armen eta simulatuen arteko bereizketa eta haien erabilera. Indarraren erabilera. Tueller-en erregela. FX munizioarekin lan egitea zenbait ingurunetan; ariketak tunel-ikusmodua, estrespeko ingurunean.

Plazak: 10.

Iraupena: egun 1.

Zuzendarikidea: Julián García Marcos jauna, Gipuzkoako Probintzia Auzitegiko magistratua, eta Julio González Espinilla jauna, ertzaina eta EUSPELeko idazkari nagusia.

Eguna: ekainaren 25a.

Lekua: Basauri.

PV2608. Ingurumena Euskadin, basoak, biodibertsitatea eta suteak.

Plazak: 15.

Iraupena: egun 1.

Zuzendaritza: Jesús Agustín Pueyo Rodero jauna, Bizkaiko Probintzia Auzitegiko Lehen Ataleko magistratua.

Eguna: urriaren 2a.

Lekua: Gorbeiako Parke Naturala, Sarria, Araba.

PV2609. Jurisdikzio nazionala Europar Batasuneko Oinarrizko Eskubideen Gutuna dela eta. Intimitatearen, pribatutasunaren eta datuen babesaren arloko diziplinarteko tailerra.

Plazak: 10.

Iraupena: egun eta erdi.

Zuzendaritza: Juan Carlos Da Silva Ochoa jauna, Euskal Autonomia Erkidegoko Auzitegi Nagusiko Administrazioarekiko Auzien Salako magistratua.

Eguna: urriaren 15 eta 16a.

Lekua: Vitoria-Gasteiz.