ETSk lurra sendotzeko lanak hasi ditu Kontxako pasealekuko arkupeetan
2020.eko abuztuak 03
- Injekzio lanak egiteko 3 hilabeteko epea dago, eta une oro bermatuko da hondartzara sartzeko eta bertan egoteko aukera
- Ekainaren 5ean Zubieta kaleko 8. zenbakiko eraikinean izandako gertakariaren ondorio gisa definitutako jarduketa osagarriak dira
Euskal Trenbide Sareak gaurtik, astelehenetik, aurrera hasiko ditu Topoaren lurpeko saihesbidea igaroko den guneko lurra sendotzeko injekzio aurreko lanak, Kontxako hondartzako arkupeetan, Hegalak kirol gunearen eta erlojuetako sarbidearen artean.
Joan den ekainaren 5ean izandako gertakariaren ondorio gisa definitu diren jarduketa osagarriak dira. Indusketaren frontea Kontxako hondartzaren azpian (0+750 K.P.-a) zegoenean, Zubieta 8 zenbakitik 110 metrora, zulo bat gertatu zen eraikin horren sotoan.
Hondeatzen ari ziren Topoaren tuneleko arrokako materialean etenak agertu ziren, eta horrek barrunbe karstiko bat agerian utzi zuen. Horrek hondarra arrastatu zuen, eta ondorioz iragazketak sortu ziren tunelean, eta Zubieta kaleko 8. zenbakiko eraikineko zutabe bat oinutsik geratu zen. Hori dela eta, ETSk kanpaina geotekniko gehigarria abiaraztea erabaki du, geruza karstifikatuak zehaztasun osoz karakterizatzeko eta lurra sendotzeko.
Aurreikusitako jarduketak
Lanak aldez aurretik baimendu ditu Trantsizio Ekologiko eta Erronka Demografikoko Ministerioaren esku dagoen Kosta Zuzendaritzak, itsas-lehorreko jabari publikoa baita. Obraren okupazioa eta afekzioa progresiboak izango dira.
Aste honetan, oinarrian, lan hauek egingo dira: arkupe mailako lan eremua mugatzea, lurzorua babestea, kioskoaren kokapena aldatzea, eta ekipoaren zati bat eta lanak egiteko materialak jasotzea.
Datorren astetik aurrera, gainerako materialak jaso eta babesak gauzatu ondoren, injekzio lanak hasi ahal izango dira gune karstikoan. Hiru hilabeteko epea dago lan horiek egiteko.
Lanak Kontxako pasealekuaren azpiko arkupeetatik egingo dituzte, hondartza inguruan eraginik ez izateko. Jarduketak irauten duen bitartean ez da oztopatuko itsasorako sarbidea, momentu oro hondartzarako sarbidea bermatuko da, baita bertan egoteko aukera ere.
