Herritar guztientzako komunikazio argia. Hizkera argira egokitutako testuen adibideak

Jatorrizko testua

Testu egokitua

Deialdi hau ebazterakoan, aintzat hartuko dira administrazio publikoen diru-laguntza jarduera arautzen duten publikotasun-, lehia- eta objektibotasun-printzipioak, betiere honako arau hauetan xedatutakoari jarraituz: Euskal Autonomia Erkidegoko Ogasun Nagusiaren Antolarauei buruzko Legearen testu bategina, azaroaren 11ko 1/1997 Legegintzako Dekretuaren bidez onartua; Diru-laguntzei buruzko 38/2003 Lege Orokorraren oinarrizko manuak; Diru-laguntzei buruzko Lege Orokorraren Erregelamendua onartzen duen uztailaren 21eko 887/2006 Errege Dekretua, eta laguntza eta diru-laguntzei aplikatu beharreko gainerako xedapenak. Gainera, diru-baliabide erabilgarriak agindu honetan ezarritako irizpideen arabera aplikatuko dira.

Laguntza horiek honako hauetan xedatutakoaren araberakoak dira:

– 39/2015 Legea, urriaren 1ekoa, Administrazio Publikoen Administrazio Prozedura Erkidearena.

– 40/2015 Legea, urriaren 1ekoa, Sektore Publikoaren Araubide Juridikoarena.

– Euskal Autonomia Erkidegoko Ogasun Nagusiaren Antolarauei buruzko Legearen Testu Bategina onartzen duen azaroaren 11ko 1/1997 Legegintzako Dekretuaren VI. titulua eta VII. tituluko III. kapitulua.

– Dirulaguntzei buruzko 38/2003 Lege Orokorrean eta azken horren Erregelamendua onartzen duen 887/2006 Errege Dekretuan jasotako oinarrizko araudia.

Halaber, erabilgarri dauden baliabide ekonomikoak aplikatuko dira, agindu honetan ezarritako irizpideen arabera.

Europako Erkidegoaren finantzaketa, oro har, ekintzaren aurrekontuaren % 100era iritsiko ez denez, deialdi honen bitartez eskuratzen diren diru-laguntzak, eta beste erakunde publiko edo pribatu batzuetatik lor litezkeenak Erkidegoaren finantzaketak estaltzen ez duen aurrekontuaren zatia estaltzeko erabiliko dira. Dena dela, proiektu bererako jasotzen diren laguntza guztien baturak ezin izango du onartutako aurrekontuaren % 100 gainditu. Nolanahi ere, batura horrek % 100 gainditzen badu, dagokion proportzioan murriztuko da laguntza

Europako Erkidegoaren finantzaketa, oro har, ekintzaren aurrekontuaren % 100era iritsiko ez denez, deialdi honen bidez edo beste erakunde publiko edo pribatu batzuen bidez lortzen diren laguntza ekonomikoek Erkidegoaren finantzaketa estaltzen ez duen aurrekontuaren ehunekoa estaltzeko balioko dute.

Proiektu bererako jaso daitezkeen laguntza guztien baturak ezin izango du onartutako aurrekontuaren % 100 gainditu. Baturak % 100 gainditzen badu, laguntza hori dagokion proportzioan murriztuko da.

Administrazio Publikoen Administrazio Prozedura Erkidearen urriaren 1eko 39/2015 Legearen 68. artikuluaren arabera, eskaerak bete beharreko baldintzak betetzen ez baditu, erakunde interesdunari errekerimendua egingo zaio, hamar eguneko epean hutsegitea zuzendu dezan edo aurkeztu ez dituen nahitaezko agiriak aurkez ditzan. Era berean, jakinarazi egingo zaio ezen, horrela egiten ez badu, eskaerari uko egin diola ulertuko dela, aipatutako legearen 21. artikuluan jasotako baldintzen arabera eman beharko den ebazpena emanda.

Eskabideak ez baditu betetzen eskatutako baldintzak, hamar eguneko epea emango zaio erakunde interesdunari akatsa zuzentzeko edo aurkeztu ez dituen beharrezko agiriak eramateko. Hala egiten ez badu, eskaeran atzera egin duela ulertuko da, ebazpena eman ondoren. Hori guztia Administrazio Publikoen Administrazio Prozedura Erkidearen urriaren 1eko 39/2015 Legean xedatutakoaren arabera.

2. artikuluan adierazitako zenbatekoa nahikoa ez bada aurkeztutako eskaera guztien aurretik kalkulatutako zenbatekoak ordaintzeko, zenbateko hau eskatutako betebeharrak betetzen dituzten eskaeren artean banatuko da. Banaketa, zenbateko guztiak ordaintzeko behar den zenbateko osoa kontuan hartuta, hasieran kalkulatutako zenbatekoen proportzio beraren arabera egingo da.

Baldin eta 2. artikuluan adierazitako zenbatekoa nahikoa ez bada aurkeztutako eskabide guztiei hasiera batean kalkulatutako zenbatekoetan erantzuteko, dotazio hori hainbanatu egingo da (proportzionalki banatuko da) eskatutako guztizko zenbatekoaren arabera eskatzen diren baldintzak betetzen dituzten eskabide guztien artean.

Laguntza itzultzeko prozedurari ekingo zaio erakunde onuradunak Euskal Autonomia Erkidegoko Ogasun Nagusiaren Antolarauei buruzko Legearen testu bateginaren 53.1 artikuluan adierazitako kasuetako batean sartzen badira, edo Dirulaguntzei buruzko azaroaren 17ko 38/2003 Lege Orokorraren 37. artikuluan ezarritako kasu batean, edo Agindu honetan eta bete beharreko gainerako arauetan aipatutako baldintzak edo betebeharrak betetzen ez badituzte, edo dirulaguntza emateko kontuan hartu ziren baldintzetako bat edo batzuk betetzen ez badituzte.

Itzulketa-prozedura bat abiaraziko da, baldin eta laguntzaren erakunde onuradunak honako kasu hauetakoren bat betetzen badu:

– Euskal Autonomia Erkidegoko Ogasun Nagusiaren Antolarauei buruzko Legearen Testu Bateginaren 53.1 artikuluan jasotako kasuak.

– Dirulaguntzei buruzko Lege Orokorraren 37. artikuluan aurreikusitako kasuak.

– Agindu honetan eta aplikatu beharreko gainerako arauetan aipatutako edozein baldintza edo betebehar ez betetzea.

– Dirulaguntza ematea eragin zuten baldintzetako edozein ez betetzea.

Dirulaguntza emateko betekizunak betetzen ez direla frogatzen bada, jasotako zenbatekoak itzuli beharko zaizkio Euskal Herriko Diruzaintza Nagusiari, bai eta sortutako berandutze-interesak ere, hala ezarrita baitago Euskal Autonomia Erkidegoko Ogasun Nagusiaren Antolarauei buruzko Legearen testu bategina onartzen duen 1/1997 Legegintzako Dekretuan, Euskal Autonomia Erkidegoaren Aurrekontu Orokorren pentzutan ematen diren dirulaguntzen bermeei eta horiek itzultzeari buruzko erregimen orokorra arautzen duen eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak ezartzen dituen 698/1991 Dekretuan eta laguntza emateko ebazpenean.

Dirulaguntza ematea eragin duten baldintzak betetzen ez badira, erakundeak Euskal Autonomia Erkidegoko Diruzaintza Nagusiari itzuli beharko dizkio jasotako zenbateko guztiak edo zati bat eta dirulaguntzen arloan aplikatzekoak diren berandutze-interesak.

Dirulaguntzaren aldaketa eta itzulketa araudi honetan dago araututa:

– 1/1997 Legegintzako Dekretua, Euskadiko Ogasun Nagusiaren Antolarauei buruzko Legearen Testu Bategina onartzen duena.

– 698/1991 Dekretua, Euskal Autonomia Erkidegoko dirulaguntzen bermeei eta horiek itzultzeari buruzko erregimen orokorra arautzen duena.

– Laguntza emateko ebazpena.

Bizilagun doako zerbitzu publikoa da, eta egiteko hauek ditu:

Jabe, bizilagun, errentatzaile edo maizter gisa dituzten eskubide eta betebeharren berri ematea, eta etxebizitza baten jabeek zein maizterrek beren eskubide edo betebeharren inguruan dituzten zalantzak argitzeko orientazioa ematea.

Komunitate bateko bizilagunen artean edo jabeen eta maizterren artean bitartekari-lanak egitea, sor daitezkeen eta protagonisten artean zuzenean konpontzen ez diren gatazkak konpontzeko.

Bizilagun doako zerbitzu publikoa da, eta egiteko hauek ditu:

• Betebeharren berri ematea pertsonei jabe, bizilagun, errentatzaile edo maizter gisa dituzten eskubideei buruz.

• Orientazioa ematea etxebizitza baten jabe eta maizterrei beren eskubide edo betebeharren inguruko zalantzei buruz.

• Bitartekari-lanak egitea komunitate bateko bizilagunen artean edo jabeen eta maizterren artean, zuzenean konpondu ezin dituzten gatazkak konpontzeko.

Zerbitzu honen bidez, Eusko Jaurlaritzak informazioa eman nahi du jabe, bizilagun, errentatzaile edo maizter gisa dituen eskubide eta betebeharrei buruz, eta orientazioa eman nahi du etxebizitza baten jabeek zein maizterrek beren eskubide edo betebeharrei buruz dituzten zalantzak argitzeko. Hori dela eta, kontua ez da informaziorik ematea edo zalantzak argitzea honako gai hauei buruz: polizia-atestatuak; zergak eta/edo tasak; aseguruak; laguntzak eta diru-laguntzak; igogailuen eta instalazio komunitarioen araudi teknikoa; kontabilitateak; jaraunspenak eta oinordetzak; landa-jabetza eta -errentamenduak; argiaren eta uraren ordainagiriak …

Bizilagunen jabe, bizilagun, errentatzaile edo maizter gisa dituzten eskubide eta betebeharren berri ematen diegu pertsonei.

Etxebizitza baten jabe eta maizterrei orientazioa ematen diegu beren eskubide edo betebeharren inguruko zalantzei buruz.

Zer informazio mota ez dugu eskaintzen?

Ez dugu informaziorik ematen, ezta zalantzarik argitu ere, gai hauei buruz: igogailuen eta komunitate-instalazioen araudi teknikoa; polizia-atestatuak; zergak edo tasak; aseguruak; laguntzak eta dirulaguntzak; kontabilitateak; jaraunspenak eta oinordetzak; landa-jabetza eta -errentamenduak; argiaren eta uraren ordainagiriak…