Antzinako trenbidetik igaroko den maratoi erdi batekin eta berreskuratu den material mugikor historikoaren zati batekin omenaldia egingo zaio gaur desagertuta dagoen Urolako Trenari. Ehun urte bete dira 1926ko otsailaren 22tik, Zumaia eta Zumarraga udalerriak trenbide bidez lotzen zituen linea inauguratu zenetik.
Euskotrenen Burdinbidearen Euskal Museoak (antzinako trenbideetan dago) bi ekimen horien aurkezpen-ekitaldia jaso du gaur. Ekitaldi horretara bertaratu dira Susana García Chueca, Eusko Jaurlaritzako Mugikortasun Jasangarriaren sailburua; Azahara Domínguez, Gipuzkoako Mugikortasun, Turismo eta Lurralde Antolaketako diputatua; Azkoitiko (Ana Azkoitia) eta Azpeitiko (Nagore Alkorta) alkateak; Urretxuko (Jon Luqui) eta Zumarragako (Mikel Serrano) alkateak; Juanjo Olaizola, Museoko zuzendaria; eta Asier Auzmendi, kirol-probaren antolatzailea.
Susana García Chuecak nabarmendu duenez, “tren historiko horretatik ondare-legatua dugu, Azpeitiko euskal estilo berriko geltoki honetan ikus daitekeena; Burdinbidearen Euskal Museoaren gaur egungo egoitza da, eta mendeurren honi esker, pieza berri bat eskuratu du bere bilduma garrantzitsurako, baina baita ardatz berde eta kulturala, Zumaia eta Zumarragaren arteko bidegorria dena eta izango dena, eta gaur aurkezten den lasterketa berri baten lekukoa izango da”.
Urolako Trenaren eraikuntza 1926ko otsailaren 22an amaitu zen, eta aurrerapen garrantzitsua izan zen Gipuzkoako trenbide-sarearen sorreran. Bere garaian, espainiar estatuko sarerik osoena zen eta Europako dentsoetako bat. Linea hau nabarmendu egin zen hasiera-hasieratik elektrifikatuta zegoelako, bai eta geltokietako arkitekturagatik ere, euskal estilo berri finduan diseinatu baitziren Ramón Cortázar arkitekto donostiarraren eskutik.
Urolako Trenetik (1986an itxi zen) soilik bost kilometrok dute tren-erabilera, Burdinbidearen Euskal Museoa eta Lasaoko geltokiaren (Azpeitia) artean daudenak. Oraindik ere, gaur egun, Euskotrenek urtero Aste Santutik azarora bitartean martxan jartzen duen lurrun-trena ibiltzen da bertatik, museoa bisitatzen duten pertsonen gozamenerako.
Gainerako trenbide-ibilbidea berdegune bihurtu da, Urola ibaiaren eta haranaren bidea jarraituz. Hain zuzen, 21 kilometroko ibilbide horretatik igaroko da otsailaren 22an mendeurrena ospatzeko egingo den maratoi erdia. Kirol-proba herri-lasterketen egutegian hitzordu berezia bihurtzeko bokazioarekin jaio da, eta Azkoitia, Azpeitia, Urretxu eta Zumarraga udalerriak zeharkatuko ditu.
Mugikortasun, Turismo eta Lurralde Antolaketa diputatu Azahara Domínguezek nabarmendu duenez, “Gipuzkoan korrika egitea oso zaletasun hedatua da, eta espazio hori zaletasun horretaz gozatzeko berreskuratzeak frogatu egiten du iraganak, orainak eta etorkizunak modu harmoniatsuan bat egin dezaketela. Horrek balioa ematen dio gure inguruko beste lurralde batzuetatik bereizten gaituenari, eta, gainera, eskualde osorako pizgarri berriak sortzen ditu.”
Konserbatzen den automotore bakarra berreskuratzea
Burdinbidearen Museoaren Lagunen Elkartearen laguntzarekin, Urolako Trenean ibili ziren automotorren artean geratzen den automotor (bidaiariak garraiatzeko autopropultsatutako tren-ibilgailua) bakarra berreskuratu du Euskotrenek. Linea inauguratu ostean, Siemens & Schuckert enpresa alemaniarrak Zaragozako Carde eta Escoriaza karrozeriekin hornitutako zazpi automotorrek (besteak beste eraberritu den M6a) bere gain hartu zuten tren guztien trakzioa; zerbitzu horretarako CAFek Beasainen eraikitako karrozeria metalikoko 14 atoi eta zurezko 7 atoi zeuden. Gainera, merkantzia-trenetarako Siemensek egindako hiru furgoi automotordunak zeuden, bai eta 81 bagoi ere, Miravallesko tailerrek eginak Bizkaian.
Informazio gehiago Irekia atarian (Leiho berrian irekiko da)