- Erakundeek eta herritarrek gozatu ahal izan duten ekitaldi antzeztuan plaka bat aurkeztu dute, ohorezko aurreskua dantzatu dute eta garai bateko auto bat ikusi ahal izan da bere plataformaren gainean
- Mugikortasun Jasangarriaren sailburuak iragan meatzaria eta garraiobide horrek, Zugaztietak eta Larreinetak leku bizi-biziak izaten jarraitzeko, gaur egun betetzen duen funtzioa aldarrikatu ditu
Ostegun honetan, erakundeak, herritarrak eta Larreinetako funikularraren zaleak funikularrean elkartu dira inauguratu zenetik igaro diren 100 urteak gogoratzeko. Larreinetako Funikularra 1926ko irailaren 24an hasi zen zerbitzua ematen, eta gaur egun Eusko Jaurlaritzako Mugikortasun Jasangarriaren Sailaren mendeko Euskotren sozietate publikoak kudeatzen du.
Gaur goizean egindako ekitaldian, bidaia antzeztu bat egin da. La Escontrillako beheko geltokitik abiatu da eta garai bateko auto batekin erreplikatu da garai batean nola garraiatzen ziren pertsonak eta salgaiak, ibilgailuak funikularraren kabinak dauden plataforman jarriz.
Larreinetarainoko ibilbidean, duela urte asko, gaur egun baino baldintza sozial eskasagoetan, egunero egiten ziren bidaiak gogoratu dira, eta omenaldi bat egin zaie, hain zuzen ere, garai batean funikularra gauzak garraiatzeko eta lantokira joateko erabiltzen zuten bidaiariei, asko eta asko meatzariak. Haien omenez, aurreskua dantzatu dute ibilbidearen erdialdean, eta beheko aldean jarritako pantailetatik ere ikusi ahal izan dute ekitaldira hurbildu diren herritarrek.
“Mendeurren honekin, funikularraren eta inguruko pertsonen arteko lotura ospatu nahi izan dugu, eta, aldi berean, udalerriaren iragana gogoratu nahi izan dugu. Meatzaritzak eta hemen, Zugaiztietan, jasan behar izan zituzten bizi- eta lan-baldintza gogorren ondorioz, aitzindari gisa sortu ziren langileen aldarrikapenek markatutako iragana”, adierazi du Mugikortasun Jasangarriaren sailburuak. Susana García Chuecak nabarmendu du, halaber, gaur egun “funikularrak Zugaiztieta eta Larreineta dinamismoz betetako espazioak izaten jarraitzeko balio” duela. “Hemen bizi direnen bizitasuna eta inguru hau, eskaintzen dituen gauza erakargarri guztiez gozatzeko, bisitatzen dutenek ekartzen dutena”, erantsi du.
Bestalde, Javier Hurtado Turismo, Merkataritza eta Kontsumoko sailburuak adierazi duenez, “Larreinetako funikularrak 100 urte bete ditu eta mugikortasunerako elementu garrantzitsua izaten jarraitzen du, baina gaur egun hori baino gehiago ere bada. Gaur egun, meatzeetan lan egin zuten eta beren sakrifizioarekin gaur egungo Euskadi anitzaren garapenean eta nortasunean lagundu zuten pertsonek utzitako ondarearen erakusgarri da”. “Sakrifizio horri guztiari memoria eta aldarrikapena zor dizkiogu. Turismo Sailetik ahotsa ematen diogu ondare horri turismo industrialeko baliabide honekin eta beste batzuekin, gure historia eta Euskadi gaur egun den bezalakoa zergatik den ulertzen laguntzen baitigute”, esan du.
Trapagarango alkate Miguel Ángel Gómez Viarrek, bere aldetik, adierazi du “mendeurren hau inguruaren garapenean lagundu duten eta urte luzez garraiobide hau erabili duten gizon-emakumeekin ospatu nahi izan dela”. “Espero dut mendeurren hau inflexio-puntu bat izatea, eta erakundeen baterako apustuak inguru hau balioan jartzeko balio izatea. Bizkaia bisitatzen duten pertsonek La Arboleda ere ezagutu ahal izatea nahi dugu, leku paregabea baita, benetan harrigarria”, adierazi du.
Ekitaldian parte hartu dute, halaber, Leire Sáez Bizkaiko Foru Aldundiko Turismoko zuzendariak, inguruko bizilagunek eta Bizkaiko Ezkerraldeko alkateek, bai eta Gelidakoak (Bartzelona), garai hartako funikular bat baitute, eta Trapagaranekin senidetuta dagoen Navas de Madroño (Cáceres) herrikoak ere.
Azkenik, Larreinetako goiko aldean oroimen-plaka bat aurkeztu dute eta funikularraren makineria bisitatu dute, Juanjo Olaizola Trenbidearen Euskal Museoko zuzendariaren azalpenak entzunez.
Garai bateko autoa funikularrean
Larreinetako funikularra, bere plataforma horizontal bereziarekin, zubi-garabien bidez kendu daitezkeen kabinekin diseinatu zen Europako bakarra da. Garabi horiekin minutu gutxi batzuetan ken zitezkeen kabinak errepideko ibilgailuak sartu ahal izateko, eta horrek meatze-eremu horretan ezinbestekoa zen salgaien garraioa sinplifikatzen eta merkatzen zuen.
Gaur goizean Trapagaranera hurbildu diren pertsonek ezaugarri tekniko bitxi hori egiaztatzeko aukera izan dute goiz osoan zehar, funikularraren plataforma batek ohiko kabinarekin zirkulatu ordez garai bateko ibilgailu batekin zirkulatu baitu.
Informazio gehiago Irekia atarian (Leiho berrian irekiko da)