- Zerbitzu berria larunbat honetan jarriko da abian, Euskal Trenbide Sareko profesionalak azpiegituran azken lanak egiten ari diren egun baten ondoren
Mugikortasun Jasangarriaren sailburu Susana García Chuecak Gipuzkoako herritarrei eskatu die, Onda Ceroko Más de uno Gipuzkoa saioan, larunbat honetan Donostiako lurpeko trenbide-pasantea zerbitzuan jarriko dela eta, “azpiegitura erabiltzeko, pertsonentzat eta pertsonengan pentsatuta egin dugulako, erosoa eta irisgarriagoa delako”. “Jendea dagoeneko sumatzen hasi da datorrena, azkar, seguru eta modu irisgarrian mugitu ahal izango garelako”, adierazi du. “Altzan eta Pasaian bizi direnek, uztailean Altza eta Galtzaraborda arteko saihesbidea martxan jarri genuen tokietan, dagoeneko ikusten ari dira, badakite zer esan nahi duen trena hartzeko erlojuari begiratu behar ez izateak”. “Langileen eta ikasleen trena da”, azaldu du sailburuak.
Topo berria bihar jarriko da martxan, Euskal Trenbide Sareko profesionalak azpiegitura amaitzeko eta zerbitzuan jartzeko buru-belarri lanean ari diren egun baten ondoren. Gaur gauean “dedikazio handia eskatzen duten lanak egingo dira, eta aukera hau aprobetxatu nahi dut ETSren, Euskotrenen eta pasantea eraikitzeko lan egin duten enpresa guztien lana eskertzeko, ez baita erraza izan, zailtasunak egon dira, baina gainditu egin dira eta hemen gaude”. Gaur gauean bertan, Pasaia eta Anoeta arteko zirkulazioaren noranzkoa ere aldatuko da, Euskotrenen sare osoan trenak ezkerreko aldetik ibil daitezen. Otsailean egin zen lehen aldaketa, eta orain falta zena egingo da. “Jendea azkar ohitzen da, azalpenak ematen arituko den jendea egongo da, eta megafonia bidez ere jakinaraziko dugu”, adierazi du.
Sailburuak azaldu du gaur gauean egingo direla bidaiariak Amara gainazaleko geltokira eramango dituzten azken ibilbideak, eta adierazi du Gipuzkoako Trenaren Lagunek geltoki zaharraren historia osoa gogoratuko dutela bidaia batean. García Chuecak azaldu du geltokia kotxetegi gisa erabiliko dela datorren urtean Zumaiako kotxetegiak amaitu arte; beraz, trenek Amara geltokiko trenbideetan igaroko dute gaua. Larunbat goizaldean, ordea, tren horiek berak lurpeko Amara geltoki berritik, Kontxa-Zentrotik eta Bentaberritik igaroko dira, 4,2 kilometroko trazatu berritik. “Guk trenbide-azpiegiturak egiten ditugu, baina jarduten dugun tokietan hiri-espazioak irabazten saiatzen gara. Horregatik, trenbide-hondartzan etxebizitza publikoa eraikitzea aurreikusten da, baita hainbeste espero den kiroldegia, berdeguneak eta bestelako espazioak ere. Topo berria egunerokoan onurak ekarriko dizkigun proiektu oso bat da”, gaineratu du sailburuak, Eusko Jaurlaritzako Etxebizitza eta Hiri Agenda Sailarekin partekatutako proiektuari buruz.
Sailburuak gogorarazi du dagoeneko 1.000 pertsona baino gehiago jaitsi direla geltokietara, haiek ezagutzeko eta Topo berriaren zerbitzuari buruzko galderak egin ahal izateko, eta azaldu du pertsonek jakin-minez eta arretaz jaso dituztela ETSren eta Euskotrenen azalpenak. “Batzuek esan digute hasieran ez zutela argi ikusten, baina harrituta geratu dira eta esaten ziguten: ‘Hau iraultza bat izango da egunerokoan”.
Topo berria zerbitzuan jarri ondoren etorkizunean egingo diren jarduketei buruz galdetuta, García Chuecak adierazi du lurpeko pasantea epe luzerako plan baten funtsezko piezetako bat dela, “Topoa XXI. mendera ekartzeko. Horrek kostaldeko eremuan lan egitera garamatza, Itziarren trenbidea bikoiztuz, Aginagako tunelean lan eginez trazatua laburtzeko eta trenbidea bikoizteko, eta Altzolako saihesbidean lan eginez Debaranzko maiztasunak hobetzeko. Eta ekialdeko eremuan, Galtzarabordako espazioa estaltzeko lanean ari gara, inguruko herritarrek erabili eta goza dezaten, geltoki estali batekin. 12.000 metro koadro dira, Donostiako trenbide-hondartzako 21.000 metro koadroei gehitzen zaizkienak. Errenteriako Gaztañoko trenbide-pasagunea kentzeko lanean ari gara, Oiartzun eta Gaintxurizketa artean trenbidea bikoizteko lanean ari gara, eta Irungo trenbidearen proiektuan ere bai”.
Gainera, Loiolako Erriberetako etorkizuneko aldageltokia aipatu du, “oso garrantzitsua izango den etorkizuneko geltokia, bi trenbide-sareak konektatuko ditugulako, eta bi zerbitzuek intermodalitate oso interesgarria izatea ahalbidetuko dutelako”.
Informazio gehiago Irekia atarian (Leiho berrian irekiko da)