Eusko Jaurlaritza Europar Batasuneko Kohesio Politikaren Ebaluazioari buruzko Konferentziaren hamargarren edizioaren irekiera ekitaldian izan da gaur. Erreferentziazko foro horrek Bruselan biltzen ditu Europar Batasuneko eskualde-politikaren diseinuan, kudeaketan eta azterketan inplikatuta dauden Europako eragile nagusiak. Juan Alberdi Eusko Jaurlaritzako Politika Ekonomikoaren eta Europar Kohesioaren zuzendariak eta Marta Marin Euskadiren Europar Batasunerako ordezkariak ordezkatu dute Eusko Jaurlaritza Europako Batzordean egiten ari den topaketa horretan.
Eusko Jaurlaritzak topaketa horretan parte hartzeak uste bikoitzari erantzuten dio: batetik, Kohesio Politikak Euskadiren garapen orekatu eta lehiakorrerako duen balio estrategikoaren aitorpena; eta, bestetik, erakundeek ebaluazio zorrotzarekin eta egiaztatutako ebidentzietan oinarritutako politika publikoekin duten konpromiso irmoa.
Euskal Autonomia Erkidegoko ordezkarien hitzetan, “Europa da gure oinarrizko kanpalekua eta hemendik begiratzen diogu munduari”. Printzipio-adierazpen horrek Europar Batasuna kokatzen du proiekzio globalerako plataforma gisa eta kontinentearen erronka handiekin bat datorren politika eraginkorrak diseinatzeko erreferentzia-esparru gisa.
Eusko Jaurlaritzak konferentzia horretan duen parte hartzea biltzen da Europako erakundeekin elkarlanean egindako ibilbidean eta kohesioaren etorkizunari buruzko eztabaida-foroetan izan duen parte-hartze aktiboan. Euskadik Europako funtsak kudeatu eta planifikatu ditu historikoki, eta inbertsio horiek herritarrengan eta produkzio-ehunean duten inpaktua hobetzeko moduari buruzko gogoetan ere proposamenak egin izan ditu.
Ildo horretan, Euskal Autonomia Erkidegoko ordezkaritzak adierazi du garrantzitsua dela maila anitzeko gobernantza-eredurantz aurrera egitea, eta ebaluazioa barne hartzea programa eragileen hasierako faseetatik bertatik. “Kontua ez da gastua justifikatzea soilik, etengabe ikastea, zuzentzea eta hobetzea ere bada”, adierazi dute Alberdik eta Marinek beste eskualde batzuetako arduradunekin eta Europako kudeaketa-agintariekin egindako lehen trukeetan.
Bi programazio-alditako balantzea
Europar Batasuneko Kohesio Politikaren Ebaluazioari buruzko Konferentziaren hamargarren edizioa mugarria da Europar Batasuneko egutegian, aldi berean aurkezten baititu 2014-2020 programazio-aldiko ex post ebaluazioaren ondorioak eta 2021-2027 aldiko tarteko ebaluazioaren lehen aurrerapenak. Azterketa konparatu horri esker, joerak, jardunbide onak eta hobekuntza-arloak identifika daitezke, hurrengo hamarkadako lehentasun politikoen definiziorako funtsezkoa den une batean.
Jardunaldian zehar, aditu independenteak txosten magistralak garatzen ari dira, goi-mailako panelak aurkezten ari dira —Europako Batzordearen, Eskualdeetako Lantaldearen eta Europako Parlamentuaren parte-hartzearekin— eta gaikako saio egituratuak egiten ari dira Kohesio Politikaren esku-hartze eremu nagusien inguruan: berrikuntza, trantsizio digitala, ingurumen-jasangarritasuna, gazteen enplegua, gizarteratzea eta hiri-garapen integratua.
Kohesio Politikaren Ebaluazioari buruzko Konferentzia Europako eskualde-politiken ebaluazioan adituak diren espezialisten urteko topagune nagusia da. Hamargarren edizio honetan, formatu presentzialak protagonismo osoa berreskuratu du, eta networkinga eta zuzeneko elkarrizketa erraztu dira bertaratutako laurehun parte-hartzaile baino gehiagoren artean. Hori artean daude nazio, eskualde eta tokiko administrazioetako ordezkariak, unibertsitateetakoak, ikerketa-zentroetakoak, aholkularitza-enpresa espezializatuetakoak eta gizarte zibileko antolakundeetakoak.
Eusko Jaurlaritzak, Bruselan duen ordezkaritzaren bitartez eta Politika Ekonomikoaren eta Europako Kohesioaren Zuzendaritzaren bitartez, etengabeko presentzia du horrelako foroetan, sinetsita baitago Europako eztabaidetan modu aktiboan parte hartzea ezinbesteko baldintza dela arau-aldaketei aurrea hartzeko, metodologia-berrikuntzak sartzeko eta Euskal Autonomia Erkidegoko administrazio osoaren erakunde-ahalmenak indartzeko.
Informazio gehiago Irekia atarian (Leiho berrian irekiko da)