- Sagardo Berriaren Egunaren XXXIII. edizioak agintariak eta sektoreko eragileak bildu ditu Astigarragan
- Eusko Jaurlaritzako Elikagaien Kalitate eta Sustapeneko zuzendariak ekoizleekin duen lankidetza estrategikoa nabarmendu du, kalitatea, jasangarritasuna eta hazkundea bermatzeko
Astigarragak Sagardo Berriaren Egunaren XXXIII. edizioa hartu du, Euskal Sagardoaren denboraldiaren hasiera markatzen duen ekitaldia. Jardunaldian Eusko Jaurlaritzako, Gipuzkoako Foru Aldundiko, tokiko agintarietako eta sagardo ekoizleen ordezkariak bildu dira, administrazioaren eta sektorearen arteko lankidetza indartzeko helburuarekin, baita euskal sagardoaren kalitatea, tradizioa eta berrikuntza balioan jartzeko ere.
Bere hitzaldian, Eusko Jaurlaritzako Elikagaien Kalitate eta Sustapeneko zuzendari Nora Beltrán de Otalorak sektorearen garapenerako erakundeen arteko koordinazioaren garrantzia azpimarratu du: “Eusko Jaurlaritzatik argi daukagu kalitatea bermatzea ezinbestekoa dela, baina baita kalitate hori merkatura modu egokian eta balioan jarrita eramatea ere. Euskal Sagardoarekin dugun lankidetza estrategikoak retail-ean, ostalaritzan, salmenta zuzenean eta online salmentan presentzia indartzea ahalbidetzen du, kontsumitzaileak gure produktua ezagutu eta balora dezan”.
Ekitaldiak denboraldiko uztaren eta sagardoaren aurkezpena ere jaso zuen, Euskal Pilota Selekzioaren parte-hartzearekin, nortasunaren eta lan kolektiboaren ikur gisa, tokiko proiektuek maila goragoan sendotzeko duten bokazioa islatuz.
Paralelismo hori baliatu zuen Beltrán de Otalorak aurten espero den aurrerapen esanguratsu batean arreta jartzeko: Euskal Sagardoaren Jatorri Deitura Transmugarraren onarpena, Europan mota honetako lehena izango dena: “Euskal Pilota Selekzioak Euskadi nortasun propioarekin eta bikaintasunaren bokazioarekin ordezkatzen duen bezala, Euskal Sagardoa tokikotik abiatzen den eta etorkizunera indarrez proiektatzen den egitasmoa da. Biak lan kolektiboaren, tradizioaren eta lurraldearekiko konpromisoaren emaitza dira, eta Euskadiren aberastasun kultural eta soziala sinbolizatzen dute”.
Jardunaldia gonbidatuei plater baten banaketa sinbolikoarekin amaitu da, tradizioa, kalitatea eta erakundeen arteko lankidetza uztartzen dituen ekitaldiari amaiera emanez, eta euskal sagardoaren sektorearentzat aurrerapauso berriak ekarriko dituen denboraldi baten hasiera markatuz.
Informazio gehiago Irekia atarian (Leiho berrian irekiko da)