- Osasun Sailak dagoeneko aktibatu du Euskadiko Eutanasiaren Informazio Sistema (SIEE) datuen kudeaketa optimizatzeko eta Euskadin duen aplikazioari buruzko ikuspegi osoa eta berehalakoa izateko
- Eutanasiaren Unitate Teknikoak, 2025eko ekainaz geroztik jardunean, profesionalentzako euskarria zentralizatzen du eta prozesuaren homogeneotasuna ziurtatzen du ESI guztietan
- Euskadi erkidego arinenetako bat da: batez besteko prozesua 49 egunetan osatzen da, Estatuko batez bestekoa baino 33 egun gutxiagotan
Euskadin % 61,6 egin du gora eutanasia-eskaeren kopuruak 2025ean. Eusko Jaurlaritzako Osasun Sailak 120 eskaera jaso zituen iaz, eta 80 prozedura burutu dira, azterketa-prozesuan dauden 2025eko aurretiazko datuen arabera, udaberrian ezagutaraziko den 2025eko azken memoria egiteko zain. Eusko Jaurlaritzako Osasun Saila eta Osakidetza eutanasia-prozedurak edo hiltzeko laguntza medikoa bermatzearen alde daude, egoera konplexu eta mingarrietan dauden pertsonei laguntza eskaini eta prestazio hori ahalbidetzeko.
Eutanasia arautzen duen martxoaren 24ko 3/2021 Lege Organikoa indarrean jarri zenetik, Euskadik 213 pertsonari hiltzeko laguntza medikoa bermatu die, guztira jasotako 451 eskaeretatik.
Hala jakinarazi du bere agerraldian Euskadiko Eutanasia Bermatzeko eta Ebaluatzeko Batzordeko presidente Julia Barroso Nisok gaur goizean Eusko Legebiltzarreko Osasun Batzordearen aurrean, Euskadin hiltzeko laguntza medikoaren prestazioaren bilakaeraren berri emateko. Barrosok eutanasia-eskaeren kopuruaren igoera esponentziala nabarmendu du, eta gero eta handiagoa den eskaera horri erantzuteko hartutako neurriak aipatu ditu: Euskadiko Eutanasiaren Informazio Sistemaren (SIEE) ezarpena eta Eutanasiaren Unitate Teknikoaren sorkuntza, 2025eko ekainean.
Ekosistema digital eta antolatzaile berria
2025ean, Osasun Sailak Euskadiko Eutanasiaren Informazio Sistema (SIEE) jarri du abian, datuen kudeaketa optimizatzen laguntzen duen eta gure erkidegoan prestazioa aplikatzeari buruzko ikuspegi osoa eta berehalakoa izatea ahalbidetzen duen informazio iturri bakarra. Hobekuntza teknologiko horrekin batera, prestazioaren kudeaketan diharduten profesionalen kopurua handituko da, eta, horrela, hiltzeko behar den laguntza eskatzeko eta jasotzeko eskubidea bermatzeko euskal osasun-sistemak duen gaitasuna indartuko da, indarrean dagoen lege-esparruaren arabera.
Gainera, 2025ean nabarmendu den beste mugarri bat ekainean sortutako Eutanasiaren Unitate Teknikoa sendotzea izan da. Unitate hori hiltzeko behar den laguntza eskatzeko eta jasotzeko eskubidea bermatze aldera euskal osasun-sistemak duen gaitasuna indartzeko helburuarekin sortu zen.
Euskadi lider arintasunean eta erantzunean
Euskal ereduaren eraginkortasuna agerian geratu da gaur aurkeztutako 2024ko datuen konparazioan. Eutanasiaren prozedura osatzeko Estatuko batez bestekoa 82 egunekoa den bitartean, Euskadikoa 49 egunekoa da, eta burutu diren prozesu-tasarik altuenetako bat du, 3,37 100.000 biztanleko. Euskadi prozesu gehien burutu dituzten erkidegoen artean dago, Nafarroa, Asturias, Katalunia eta Balear Uharteekin batera.
2025eko datuen azterketa osoa amaitzeko zain, Euskadiko Eutanasia Bermatzeko eta Ebaluatzeko Batzordeko presidenteak 2024an Euskadin hiltzeko laguntza medikoa emateko txostenean jasotako datuak errepasatu ditu. Eusko Jaurlaritzako Osasun Sailak, 2024an, 74 eutanasia-eskaera jaso zituen guztira, eta 49 prozedura burutu ziren. Eutanasia eskatu zuten pertsonen batez besteko adina 74 urtekoa izan zen: 100 urte zituen pertsona zaharrenak, eta 33 urte gazteenak. Eskaera egin duten pertsonen % 37k gaixotasun neurologiko bat zuten, gehienak dementziarekin lotutakoak, eta % 36 paziente onkologikoak izan ziren. Eutanasia-prozeduren % 32,6 etxean egin ziren, % 53 ospitalean eta % 14,3 egoitza soziosanitarioan. Lurralde historikoen arabera, Araban 11 pertsonak eskatu zuten eutanasia-prozesua, eta horietatik 6 burutu ziren; Bizkaian, 32 eskaera aurkeztu ziren eta 19 burutu; eta Gipuzkoan 31 pertsonak eskatu zuten eutanasia eta 24 burutu ziren.
Euskadiko Eutanasia Bermatzeko eta Ebaluatzeko Batzordea
Bestetik, 2025ean Euskadiko Eutanasia Bermatzeko eta Ebaluatzeko Batzordea berritu da. Organo hori 25 profesionalek osatutako diziplina anitzeko talde batek osatzen du (medikuntza, erizaintza, zuzenbide, gizarte-lan eta psikologiaren arlokoak) eta kasu bakoitza ikuspegi integral, gizatiar eta legezkotasunera hertsiki egokitutako batetik ebaluatzea bermatzen du.
Tresna horiekin, Osasun Sailak berretsi egiten du Euskadin Eutanasia arautzen duen martxoaren 24ko 3/2021 Lege Organikoa ezartzeko konpromisoa, betiere pazientearen borondatea eta osasuneko profesionalen segurtasun juridikoa lehenetsita.
Informazio gehiago Irekia atarian (Leiho berrian irekiko da)