- Horretarako, Eusko Jaurlaritzako Osasun Saila aurrera doa prestazio farmazeutikoaren digitalizazioan, Euskadiko farmazia guztietan sendagaien egiaztapen- eta trazabilitate-sistema berria hedatuta, fakturazio digitala garatzea ahalbidetuko duena
- Euskadiko farmazia guztiek Osasun Sailera bidaltzen dute jada, sistematikoki, sendagaien segurtasun-gailuei buruzko informazioa, ontzien datamatrix kodean datorrena
- Hala, prestazio farmazeutikoaren eraldaketa digitalean buru da Euskadi, eta aukera ematen du prozedura eraginkorragoak, jasangarriagoak eta seguruagoak lortzeko bai farmaziako profesionalentzat eta bai herritarrentzat; Euskadiko Osasun Itunean bultzatutako jarduteko ildoen adibide argia da
Eusko Jaurlaritzako Osasun Sailak fase berri bati ekin dio, sendagaien egiaztapen- eta trazabilitate-sistemari dagokionez. Euskadiko farmazia-bulego guztiek sistematikoki bidaltzen diote Osasun Sailari emandako sendagaien segurtasun-gailuetan jasotako informazioa, ontzien datamatrix kodearen bidez (sendagai-ontzien QR kodea, produktuari buruzko informazioa, serie-zenbakia, lotea eta iraungitze-data jasotzen dituena); hala, pazientearen segurtasuna indartu da, eta hobetu egin da farmakoen jarraipena egiteko ahalmena asistentzia-kate osoan.
Ekimenaren bidez, ontzi bakoitzak identifikatzaile bakarra du, hala Osasun Sailak finantzatutako errezetak kontrolatzeko, trazabilizatzeko eta ondoren fakturatzeko.
Azken hilabeteotan farmazia-talde baten laguntzaz probak eta doikuntza teknikoak egin dira. Hasierako fase hori eginda, Euskadiko farmazia guztiek segurtasun-gailuei dagokien informazioa bidaltzen diote Osasun Sailari.
Segurtasun handiagoa eta alerten aurrean erantzun hobea
Sendagaien egiaztapen- eta trazabilitate-eredu berriaren abantaila nagusia da aukera ematen duela emandako sendagaien trazabilitate osoa izateko. Sendagaien dispentsazio-datuak identifikatzaile bakarrean jasotako loteari eta iraungitze-datari buruzko informazioarekin lotzeak sendagai bakoitzaren jarraipen askoz zehatzagoa egitea errazten du.
Horri esker, lote jakin batekin zerikusia duen edozein gorabehera edo alertaren aurrean, sistemak aukera ematen du eragindako sendagaia non, noiz eta nori eman zaion azkar jakiteko, osasun-agintarien jarduteko gaitasuna hobetuta eta pazienteen babesa indartuta.
Era berean, prozedura berriak sendagaiak faltsutzearen aurkako bermeak sendotzen laguntzen du, eta bat egiten du gizakientzako sendagaiak egiaztatzeari eta autentifikatzeari buruzko Europako araudiarekin.
Zigilu-kupoiaren ebakina desagertzea
Medikamentuak egiaztatzeko sistema digital horrek aukera emango du Euskadiko farmazia-bulego guztietako fakturazio digitala garatzeko.
Hala, udazken honetan, Euskadi pixkanaka hasiko da zigilu-kupoiaren ohiko ebakina kentzen, eta fakturazio-prozedura digitalarekin ordezkatuko du. Hau da, orain arte farmazialariek zigilu-kupoia mozteko erabiltzen zuten ohiko kuterra erabiltzeari utziko diote. Ebaki ondoren, Administrazioari bidaltzen zioten dirua itzul ziezaieten.
Orain arte, errezetarekin saltzen ziren sendagaiak fakturatzeko, ontzien zigilu-kupoia ebaki eta bidali egiten zen. Sistema berri honen bidez, eskuzko prozedura horren ordez, medikamentuen ontzietan txertatutako datamatrix kodea irakurrita lortutako informazio digitala erabiliko da.
Euskadi, eraldaketa digitalaren buru
Sistema hori abiarazita, prestazio farmazeutikoaren eraldaketa digitalean buru izango da Euskadi, eta aukera emango du prozedura eraginkorragoak, jasangarriagoak eta seguruagoak lortzeko bai farmaziako profesionalentzat eta bai herritarrentzat.
Gainera, Euskadiko Osasun Itunak bultzatutako jarduteko ildoen adibide zehatza da. Horren arabera, eraldaketa digitala, berrikuntza eta datuen erabilera adimenduna funtsezko tresnak dira osasun-sistema seguruago, eraginkorrago, integratuago eta pertsonetan zentratuago baterantz aurrera egiteko. Sendagaien trazabilitatea hobetzeak eta farmazia-prestazioaren prozesuen digitalizazioak zuzenean laguntzen dute erronka estrategiko horietan.
Informazio gehiago Irekia atarian (Leiho berrian irekiko da)