- Eusko Jaurlaritzak etorkizuneko Lankidetza Plan Nazional eta Erregionalek, finantzaketa espezifikoa eta eskualdeko-agintarien parte-hartze eraginkorra, barne hartzea defendatu du, inbertsio europarrak lurralde bakoitzaren beharretara egokitzeko
Eusko Jaurlaritzako bozeramaile eta Gobernantza, Administrazio Digital eta Autogobernuko sailburu Maria Ubarretxenak, estaturik gabeko nazioek, eskualdeek, hiriek eta tokiko agintariek Europaren eraikuntzan eta Europar Batasuneko etorkizuneko funtsen kudeaketan parte-hartze handiagoa izatea eskatu du gaur Estrasburgon.
Eskualdeak, hiriak eta tokiko agintariak. Beren lurraldeen bidez, Europaren boterea biderkatzea mahai-inguruan parte hartu du Ubarretxenak, Estrasburgoko Musika eta Kongresu Jauregian, Europa Power Conference jardunaldiaren baitan.
Bere hitzaldian azpimarratu duenez, "Estaturik gabeko nazioek, eskualdeek eta hiriek ekimen politikoa eta aliantzak eraikitzeko gaitasuna dugu, Europari indar handiagoz jokatzen eta beren printzipioei eusten laguntzeko”.
Sailburuak Euskadiren europar bokazio historikoa gogorarazi du, eta Eusko Jaurlaritzak
Europako proiektu bateratua indartzen laguntzeko duen borondatea azaldu du. Testuinguru horretan, Euskadi aliatu gisa aurkeztu du Europa lehiakorrago, oparoago eta kohesionatuago baterantz aurrera egiteko, autogobernuaren esperientziatik eta erakundeen arteko lankidetzatik abiatuta.
Eskualdeen parte-hartze handiagoa Europako erabakietan
Europako politiken definizioan eta aplikazioan eskualdeek duten papera murrizteko arriskuaren aurrean, Ubarretxena sailburuak maila anitzeko gobernantza eraginkorra aldarrikatu du: "Herritarren ezinegonari erantzuna, ezin da zentralismo eta autoritarismo gehiago izan, hurbiltasun eta demokrazia gehiago baizik. Estaturik gabeko nazioak, eskualdeak eta tokiko erakundeak gara tokikoaren eta globalaren arteko zubia, eta Europako helburu nagusiak lurralde bakoitzaren behar zehatzekin lotu ditzakegu”, adierazi du.
Sailburuak defendatu du eskumen legegileak eta gaitasun propioak dituzten eskualdeek, Euskadik kasu, modu errealean parte hartu behar dutela Europako funtsen lehentasunen definizioan eta kudeaketan. "Kohesio-politikak lurralde-dimentsio argia izan behar du, eta ez da soilik estatu-plangintzara mugatu behar", baieztatu du
Zentzu horretan, Ubarretxenak eskatu du etorkizuneko Lankidetza Plan Nazional eta Erregionalek (NRPP) eskualdeentzat berariazko finantzaketa jaso dezatela; eskualde-kapituluekin, baliabide identifikagarriekin eta eskualdeko agintarien parte-hartze eraginkorrarekin, neurrien diseinuari, aplikazioari eta ebaluazioari dagokienean, finantzatutako neurriek lurralde bakoitzaren beharrei eta ahalmenei erantzun diezaieten. "Horrek aukera ematen du Europako inbertsioak berrikuntzako eskualde-ekosistemekin eta lurralde bakoitzeko lehentasun industrial eta teknologikoekin lotzeko, eta, horrela, lehiakortasuna sustatzeko", nabarmendu du Ubarretxenak.
Informazio gehiago Irekia atarian (Leiho berrian irekiko da)