- Udaltzaingoak eta Ertzaintzak baterako segurtasun-dispositibo koordinatuaren azken xehetasunak eman dituzte gaur goizean: indartu egin dituzte segurtasuna eta zaintza, jai-gunearen barruan eta kanpoan, eta lehentasuna eman diote sexu-erasoak prebenitzeari.
- Dispositiboak kontuan hartzen ditu, baita, ebasketak eta indarkeriaz egindako lapurretak prebenitzea eta horien aurrean jardutea, bide-segurtasuna indartzea eta elikagaien segurtasuna kontrolatzea.
- Beste alde batetik, 620 lagun inguruk osatuko dute garbiketa-dispositiboa. Horietatik, 270 Aste Nagusian emango den zerbitzuan arituko dira bakarrik.
- Hondakin desberdinetarako ontzi eta edukiontzi sorta handia egongo da jai-guneetan, hondakinak gaika bereizteko eta birziklatzeko. Bestalde, aldi baterako hainbat komun jarriko dira.
Gaur goizean bertan, Bilboko Udaltzaingoak eta Ertzaintzak Aste Nagusirako Segurtasuneko operatibo bereziaren xehetasunak amaitu dituzte. Hilabete batzuk dira horretan lanean hasi zirela. Izan ere, gaur, kidego bietako agintariak Segurtasuneko Koordinazio Batzordean bildu dira. Batzorde horren buru Juan Mari Aburto Bilboko alkatea eta Bingen Zupiria Eusko Jaurlaritzako Segurtasuneko sailburua izan dira, eta bertan izan dira Amaia Arregi Bilboko Udaleko Segurtasuneko zinegotzia eta Ricardo Ituarte sailburuordea ere, baita Ertzaintzako zuzendari Aitor Landa eta buru Alfonso Garaikoetxea.
Gainetik azalduta, segurtasun-operatibo berezi bateratu eta koordinatua diseinatu da, hiri osoan hedatuko dena, funtsezko gai bitan oinarrituta: segurtasuna bermatzea eta prebentzioan eragitea. Era guztietako delituak prebenitzea, eta arreta berezia jartzea eraso matxistei eta gorroto-delituei.
Udaltzaingoko eta Ertzaintzako agenteak, uniformez zein kale-jantzian, hara eta hona ibiliko dira eguneko 24 orduetan jai-eremu nagusietan. Ohikoa den legez, poliziak jende gehien biltzen den lekuetan egotea lehenetsiko da. Areatzan, Zazpi Kaleetan, Plaza Biribilean, Campo Volantín pasealekuan, Erkoreka plazan, Europa parkean, Abandoibarran, Casilda Iturrizar parkean, Plaza Eliptikoan edo Etxebarria parkeko barraka-eremuan.
Eremu horietan lan egingo da lehenik prebenitzeko eta, deliturik gertatuz gero, jarduteko; delitu horien artean ohikoenak ebasketak dira.2025eko edizioan, Udaltzaingoak Aste Nagusian erregistratutako 617 salaketetatik % 73,1 (451) ebasketak izan ziren, batez ere mugikorrenak eta diru zorroenak.
Gainera, Ertzaintzak kontrolguneak ezarriko ditu jende asko biltzen den eremu horietarako sarbideetan, ibilgailurik ez igarotzeko, eta arma edo objektu arriskutsuren bat eramaten duten pertsonen sarrera iragazteko.
Nabarmentzekoa da ebasketa-delitu baten biktima diren herritarrek polizia-etxeetatik kanpo ere jarri ahal izango dituztela salaketak. Kasu horietan eta bestelako delitu arinetan –egile ezezagunak eragindako kalteak eta lapurretak–, esku hartzen duten udaltzainak delitua gertatu den lekuan has daitezke salaketa izapidetzen, salaketa-akta aldean eramango dute-eta. Era berean, aurten ere Udaletxeko komisarian prestatutako Salaketak Jasotzeko Zerbitzu Berezian ere jarri ahal izango dira mota horretako salaketak.
ERASO MATXISTEN PREBENTZIOA
Segurtasun-dispositiboak eraso sexisten aurkako prebentzioan eta jarduketan ere izango du eragina. Beraz, jaigunearen barruan zein kanpoan agente gehiago jarriko dira, kale-jantzian, prebentzio-lanak egiteko eta berehala jarduteko; bideozaintza neurri pasibo gisa inplementatuko da eta, beharrezkoa denean, instituzioarteko protokolo guztiak abiaraziko dira.
Iaz, sexu-askatasunaren aurkako hamabi delitu salatu ziren, batez ere ukipenengatik, Bilboko Udaltzaingoan.
Ildo horretan, Amaia Arregik aitortu du sexu-askatasunaren aurkako delituen gaiak udal-arduradunak kezkatzen dituela; izan ere, "nahiz eta horien intzidentzia txikia izan zenbakietan –Udaltzaingoak 2025eko Aste Nagusian salatutako egitateen % 2ra ez baitzen iritsi–, larritasunak erantzun irmoa, zeharkakoa eta denboran jarraitua eman behar da, poliziaz harago".
Horregatik bultzatu du Udalak, aurten ere, erasoen aurkako prebentziorako eta sentsibilizaziorako udal-estrategia; hain zuzen ere, nahi duelako herritarrak inplika daitezen, era horretan errespetuan eta askatasunean oinarritutako portaerak eta harremanak sustatzeko eta indarkeria matxista desagerrarazten laguntzeko. Estrategia horren goiburua "Errespetu Nagusia" da.
Ildo horretan, Arregik gogorarazi du Eusko Jaurlaritzako Segurtasun Sailaren SOS DEIAK aplikazio mugikorra eskuragarri dagoela eta herritarrak animatu ditu aplikazio hori deskargatzera, oraindik deskargatu ez badute. “Sistema horrek segurtasunaren zerbitzura jartzen du teknologia", eta erabiltzaileei aukera ematen die, edozein gorabehera gertatuz gero, zuzenean larrialdietako zentro bakarrari jakinarazteko; gainera, "badu atal berezi bat, halako erasoren bat gertatzen denean laguntza eraginkortasunez eta berehala eskatzeko”.
Baina prebentzioaz harago, arretari dagokionez, aurreko urteetan bezala, Biktimei Laguntzeko eta Babesteko Udaltzaingoaren Ikuskaritzak arreta aurrez aurre emateko zerbitzu espezifiko bat planifikatu eta diseinatu du Udaletxeko Komisarian ere —Areatzako jaigunetik hurbilen dagoen komisarian—, 22:00etatik 06:00ak arte, delitu-tipologia horrek eragindako pertsonei lehen harrera, aholkularitza eta arreta espezializatua emateko.
Era berean, Gizarte Larrialdietako Udal Zerbitzuarekin (HMSO) eta Berdintasun Sailarekin koordinatzeko protokoloa finkatu da. Egun hauetan, teknikari espezializatuekin indartu da protokolo hori, gorroto-delituekin, etxeko indarkeriarekin eta sexu-askatasunaren aurkako delituekin lotutako balizko gertakarien aurrean erantzun integrala bermatzeko.
Neurri horiei esker, erantzuteko eta arreta espezializatua emateko gaitasuna indartu ahal izango da 2026ko Aste Nagusian, eta Bilboko Udalak biktimen babesarekin, bizikidetzarekin eta jai-espazio seguru, inklusibo eta indarkeriarik gabekoen sustapenarekin daukan konpromisoa sendotuko da.
BIDE-SEGURTASUNA. KONTROLAK INDARTZEA
Segurtasun-dispositiboan lehentasuna duen beste alderdietako bat pertsonak babestea da, eta horretarako pertsonen osotasun fisikorako —bide-segurtasuna barne— arriskutsuak diren jokaerak galarazi edo gutxituko dira. Horregatik, aurten ere, alkoholemiaren eta droga-kontsumoaren prebentzio-kontrolak indartuko dira.
Beraz, Udaltzaingoak 34 kontrol baino gehiago planifikatu ditu, alkoholaren eta substantzia estupefazienteen kontsumoa ekiditeko kanpainaren barruan, Bide Segurtasuneko Plan Estrategikoaren jarraibideen arabera, gidatzean, goizeko, arratsaldeko eta gaueko txandetan, hiriko hainbat tokitan. Eta Ertzaintzak beste horrenbeste egingo du hirira sartzeko puntuetan. Horren guztiaren helburua da herritarrak kontzientziatzea oso garrantzitsua dela alkohola eta drogak saihestea gidatu behar denean, eta tasa seguru bakarra % 0,0 dela.
Alkoholaren eta drogen kontsumoa, istripu-tasa handiagoarekin ez ezik, heriotza-tasa handiagoarekin ere lotuta dago, jasandako lesioen pronostiko okerragoarekin oso lotutako faktorea baita.
2025ean 384 alkohol-proba eta 44 droga-proba egin ziren kontroletan. Emaitzetan 15 alkohol-proba positibo eta 6 droga-proba positibo izan ziren.
Gainera, azken Aste Nagusian 57 zirkulazio-istripu erregistratu ziren (harrapatze bi, hamaika talka zaurituekin eta 44 talka kalte materialekin).
‘PATINETEA EZ DA JOSTAILUA"
Aurtengo Bide Segurtasuneko kanpainaren berrikuntza nagusi gisa, Udaltzaingoak Mugikortasun Pertsonaleko Ibilgailuetan (MPI) jarriko du arreta, jai seguruak bermatzeko eta "patinetea ez dela jostailua" gogoratzeko.
Neurri honen helburua da ibilgailu mota horretako gidariek aisialdiko inguruneetan izaten duten segurtasun- eta zigorgabetasun-sentsazio faltsua desagerraraztea. Bilboko Udaltzaingoak gogorarazi nahi du MPIak ibilgailuak direla ondorio guztietarako, eta horiek gidatzen dituztenek alkohola eta drogak detektatzeko probak egin behar dituztela.
Kontrolak goizeko, arratsaldeko eta gaueko txandetan egingo dira hiriko zenbait puntu estrategikotan, eta agenteek hurbiletik zainduko dute Estatuko araudi eguneratua betetzen dela:
- 0,0 tasa adingabeentzat: MPI bat gidatzen duten 18 urtetik beherakoek ezin dute alkoholik izan organismoan. Adingabeei aplika dakizkiekeen zehapenak haien guraso edo legezko tutoreei ezarriko zaizkie modu solidarioan.
- Zehapenak eta ibilgailua ibilgetzea: Kontroletan positibo emateak 500 eta 1.000 euro arteko zehapen ekonomikoak dakartza, eta ibilgailua berehala ibilgetuko da. Proba egiteari uko egiteak 1.000 euroko zuzeneko zehapena dakar.
- Nahitaezko asegurua:MPIek 2026ko urtarriletik indarrean dagoen eskakizun berria betetzen dutela egiaztatuko da, hain zuzen ere, erantzukizun zibileko asegurua izatea.
Bilboko Udalak herritarren erantzukizuna eskatzen du. Aste Nagusia elkarbizitzarako eta gozamenerako gunea da eta bide-segurtasunak erabateko lehentasuna izan behar du guztiontzat, gidatzen den ibilgailua edozein dela ere.
ELIKAGAIEN SEGURTASUNA
Udaltzaingoak legez kanpoko kalez kaleko salmenta ere kontrolatuko du. Herritarrei gogorarazten zaie ez daude baimenduta udalaren lizentziarik ez duten salmenta-postuak, ezta ebakuazio-bideak okupatzea eta herritarren segurtasuna arriskuan jartzea dakartenak ere.
2025eko edizioan, inolako osasun-kontrolik gabe saltzen ari ziren 202 kilo elikagai konfiskatu zituzten udaltzainek. Gainera, beste 19 produktu konfiskatu ziren, hala nola tabakoa, garagardo-latak, piroteknia...
GALDUTAKO ETA AURKITUTAKO GAUZEN ZERBITZU BEREZIA
Udaletxeko instalazioetan dagoen Udaltzaingoaren Ikuskaritzan, Galdutako eta Aurkitutako Gauzen Zerbitzu Berezia jarriko da berriro martxan, jaietan galtzen diren objektu guztiak (diru-zorroak, giltzak eta/edo mugikorrak, batez ere) ahalik eta lasterren itzultzen saiatzeko.
Zerbitzu hori 24 orduz egongo da zabalik Aste Nagusi osoan (telefonoa: 94 420 49 81), eta lau pertsonek emango dute denbora guztian, abuztuaren 22ko (zapatua) 18:00etatik azken domekako (abuztuak 30) 00:00etara arte. Galdutako gauzak —funtsean, dokumentazio pertsonala— berreskuratzeko denbora murriztu nahi da zerbitzu horren bitartez.
Aurrez aurreko eta telefono bidezko arreta-zerbitzu berezi hori arduratuko da aurkitutako objektuen eta/edo dokumentazioen edo gauzen jabeak lokalizatzeaz eta haiek entregatzeaz.
Zerbitzu hori arduratuko da, orobat, diru-zorroak, dokumentazioa, telefono mugikorrak eta beste objektu batzuk ebasteagatik interesdunek jarri nahi dituzten salaketak biltzeaz eta izapidetzeaz.
Kontuan harturik nolako objektua galtzen den, dagokion informazioa eskatuko zaio interesdunari; mugikorren kasuan, ezinbestekoa izango da ekipo mugikorraren nazioarteko nortasuna (IMEI) ematea.
Herritarren laguntza eskatzen da, galdutako objektuak aurkitu bezain laster bulego honetan entrega ditzaten, itzulketek arrakasta izateko beharrezkoa baita objektuak azkar aurkitzea eta jabeekin berehala jartzea harremanetan.
Era berean, herritarrek aurkitzen dituzten objektuak jaigunean patruilatzen ari diren Udaltzaingoaren edozein patruila uniformaturi ere eman ahal izango zaizkie, baita jaien, barraken, kontzertuen eta abarren esparruetako sarbideetan dagoen beste edozein unitateri ere.
Bulego horri esker, iaz 598 objektu baino gehiago jaso ziren, gehienak dokumentazioa, diru-zorroak eta mugikorrak.
BABES ZIBILA
Hiriak osasun-dispositibo garrantzitsua izango du, jai-eremu guztiak estaltzeko eta larrialdiei erantzuteko, eta koordinatuta egongo da polizia-kidegoekin eta suhiltzaileekin. Horrela, Udalak anbulantziak eta osasun-langileak izango ditu Abandon, Casilda Iturrizar parkean, Europa Parkeko eta Abandoibarreko kontzertuguneetan, eta Etxebarria parkeko barraken esparruan eta inguruetan, barraketako ordutegian; azken hori indartu egingo da su artifizialak jaurti aurretik, bitartean eta ondoren.
Aste Nagusia ospatuko den 9 egunetan (abuztuaren 22tik —zapatua— 30era —domeka— bitartean), Bilboko Suhiltzaileen Zerbitzuak batez beste 9 prebentzio-zerbitzu operatibo emango ditu egunero, jaietako eta barraketako ekitaldi eta esparruetan gertatzen den edozein larrialdiri edo arrisku-egoerari aurrea hartzeko.
Horretarako, guardiak indartuko dira egunero, bai Miribillako parke nagusian, bai Deustuko zonako parkean. Guardiako dotazio indartu horien barruan, aurreikusi da uretako erreskateko eta urpekaritzako dotazio bat egongo dela ibaian denbora guztian, eta salbamenduko ontzi bi egongo dira.
Goizetan, azterketa operatiboko ekintzak egingo dira, ur-hartuneen sarbideak, kokalekua eta eraginkortasuna aztertzeko, eta beste ebakuazio- eta babes-neurriak aztertuko dira jaigune eta kontzertuguneetan. Eta arratsalde eta gauetan, Aste Nagusian programatutako jai- eta kultura-ekitaldi ugarien prebentzio eta operatibo zerbitzuak garatuko dira, hala nola musika-kontzertuetan, itsasadarreko jardueretan, piroteknia ikuskizunetan, etab.
Egunero ikusle eta pertsona gehien biltzen dituen ekitaldia su artifizialen jaurtiketa da, Mallonatik egiten dena. Horretarako, prebentzio-dispositibo berezi bat planifikatu da, 21:00etatik aurrera abiaraziko dena Itxaropen kalean, Zingira eta Itxaropen kaleen arteko elkargunean, Venezuela plazan, suak jaurtitzeko gunean eta Mallonako saskibaloi zelaian, baita Itsasadarrean ere —Areatzako eta Zubizuriko zubien artean—.
Azpimarratu beharra dago, su artifizialen ikuskizunei lotutako segurtasuna bermatzeko eta indartzeko, Bilboko Udaleko Suteak Itzaltzeko Zerbitzuak mantendu egingo dituela azkeneko urteetan ezarritako neurriak.
Esate baterako:
- 125 milimetroko kalibreko su artifizialak: jaurtitzen diren lehergailuen karkasek 125 milimetroko kalibrea izango dute gehienez.
- Su artifizialak jaurtitzeko eremu bat mugatzea urrunago, hesiz babesturik: piroteknia-tresnak Mallonako atzealdean dagoen soropil artifizialeko futbol-zelaitik jaurtiko dira.
- Droneen aireko kontrola: droneek hegaldiak egingo dituzte, prebentzio gisa, suteak edo puntu beroak antzemateko, suak jaurti bitartean, nahiz jaurti ostean –su artifizialak amaitu eta 30 minutuan zehar, gutxienez–. Informazio guztia bideoz jasoko da, artxibatzeko edo, gorabeherarik izanez gero, kontsultatzeko.
- Suhiltzaileen kamioi bat jartzea Itxaropen eta Epaltzaren Alargunaren kaleen inguruan.
Zerbitzu horiek guztiak Miribillako Aginte eta Koordinazio Zentro bateratuak koordinatuko ditu, Udaltzaingoarekin, Ertzaintzarekin eta Babes Zibileko teknikariekin batera, eta hark ere guardia indartuko dotazioak izango ditu.
PREBENTZIOA
Babes Zibilaren arloko lanak ere plangintza handia eskatzen du aldez aurretik. Izan ere, Segurtasun Saileko Prebentzioko Sailatalak planifikazio- eta gainbegiratze-lan handia egiten du, eta lan hori jaiak hasi baino hilabete batzuk lehenago hasten da.
Horrela, martxoan eta apirilean hasita, koordinazio-bilerak egiten dira Bilboko Konpartsekin eta txosnez arduratzen diren gainerako erakundeekin, muntaiak planifikatzeko eta segurtasun-baldintza guztiak betetzen direla bermatzeko. Ekainetik aurrera, instalazioen dokumentazio teknikoa aztertzen da, bai eta jai-guneetako autobabes-planak eta aurreikus daitezkeen arriskuetarako baliabideak ere, analisi- eta baliozkotze-prozesu batean, prebentzio-neurri guztiak eta balizko arriskuak behar bezala aurreikusi direla ziurtatu arte.
Txupina jaurti aurreko egunetan, jarduera areagotu egiten da eta barrakak, zirkua, txosnak eta kontzertu-esparruak ikuskatzen dira, eta muntaketen sendotasuna, seinaleztapena, suteen aurkako babes-sistemak eta eskatutako segurtasun-baldintzak betetzen direla egiaztatzen da.
Era berean, su artifizialen segurtasun-perimetroa aztertzen da eta Aste Nagusian bertan prebentzioko langileek aldi baterako instalazioen eguneroko jarraipena egiten dute, ikuskizun piroteknikoaren segurtasun-baldintzak gainbegiratzen dituzte –itxierak, hustuketak eta larrialdi-zerbitzuekiko koordinazioa barne–, eta ekitaldi nagusien garapena ebaluatzen dute, etorkizuneko edizioetan segurtasuna indartzen lagunduko duten hobekuntzak detektatzeko.
GARBIKETAKO DISPOSITIBOA
Era berean, jaiak behar den moduan egiteko funtsezkoa da garbitasunaren arloko lana.
Aste Nagusiaren bederatzi egunetan, aurreko edizioetan legez, Bilboko Udalak garbiketarako eta hondakinak biltzeko operatibo zabala jarriko du abian Aste Nagusian, hiria bizilagunentzako eta bisitarientzako baldintza onenetan mantentzeko.
Dispositiboaren barruan -indartu egingo da eta espezializatua izango da- giza baliabideak eta baliabide teknikoak egongo dira, eguneroko garbiketa eraginkorra eta sortutako hondakinen kudeaketa eraginkorra bermatzeko. Gainera, herritarrei eskatuko zaie espazio publikoa zaintzen laguntzeko eta jasangarritasuna sustatzeko egun seinalatu horietan.
Seiehun eta hogei pertsona inguruk, 120 ibilgailuk eta era askotako makinek osatuko dute dispositiboa. Langile horietako 270 beren beregi arituko dira jaietako zerbitzu berezian.
Jaiguneetan hau da, Areatzan, Zazpi Kaleetan, Erripan, Etxebarria parkean, Europa parkean eta Casilda Iturrizar parkean, arreta berezia jarriko da. Aldi berean, hiriko gainerako auzoetan garbiketa eta hondakinen bilketa egiteko ohiko zerbitzua bermatuko da.
Txupina jaurti ondoren, bihar, zapatua, 19:00etatik aurrera, hogeita hamar bat langilek eta hamabi ibilgailuk ahalik eta azkarren garbituko dute Arriagako gunea. Hurrengo egunean, Balearen Desfile jendetsuaren ostean ere, berdin jokatuko da: 35 lagunez eta 20 ibilgailu eta erratz-makinaz osatutako beste talde berezi batek Kale Nagusiko inguruneak garbituko ditu.
Eguneroko garbiketa-zerbitzua, bestalde, Areatzako gunean hasiko da, goizeko 06:00etan, eremua prest eta garbi egon dadin 11:30erako. Plaza Biribilean ere azkar ekingo diote garbiketa-lanei, trafikoarentzat ahalik eta lasterren zabaldu ahal izateko.
Europa parkean, kontzertu egunetan, eguaztenetik eguenera, hirurogei langile eta hamalau ekipo mekaniko egongo dira lanean kontzertuak amaitu eta gero, parkea goizerako behar bezala egon dadin. Bestalde, hamasei langile eta lorezaintzako bost ekipo mekaniko izango dira berdeguneak mantentzeaz arduratuko direnak.
Kaleak garbitu eta zaborrak jasotzeaz gain, Udalak lorezaintza-zerbitzu berezia antolatzen du, 30 langilez osatua, berdeguneak, lorategiak eta parkeak garbitzeko. Zerbitzua Etxebarria parkean ariko da, barrakak martxan daudenean, eta Casilda Iturrizar parkean. Horrez gain, mantentze-lanak egingo dituzte kale hauetako lorategietan: udaletxea, Campo Volantin, Unibertsitate etorbidea, Salbe, Garate Anaiak, Casilda Iturrizar, Abandoibarra, Uribitarte, Venezuela, Albia, Uribitarteko erranplak, Zabalgunea, Lersundi, Plaza Eliptikoa eta Jado plaza.
HONDAKINEN KUDEAKETAREN BILAKAERA POSITIBOA
Hondakinen sorrerari dagokionez, ingurumenaren gaineko inpaktu negatiboa minimizatzea da ekitaldi handi oro antolatzeko desafio handienetako bat. Alde horretatik, Bilboko Udalak Aste Nagusi geroz eta jasangarriago baten alde egiten du eta, hala, bere esku dituen baliabide guztiak jartzen ditu helburu hauek lortzeko:
- Sortzen diren hondakinak gutxitzea, batez ere, erabilera bakarrekoak.
- Hondakinak behar den moduan bereiztea, arreta berezia jarriz plastikoa, posible den neurrian, ahalik eta gutxien erabiltzeari.
Hori dela-eta, hondakinen kudeaketa errazte aldera, zaborrontzi eta edukiontzi sorta handia egongo da jai-eremuetan, era bateko eta besteko hondakinak gaika biltzeko.
Hondakin ez-birziklagarriak murrizteak dakarren erronka handiaren arrakasta, eta Aste Nagusia harro egoteko moduko jasangarritasun-eredu bihurtzea, herritar guztien konpromisoaren eta parte-hartzearen araberakoa izango da. Konpromisoa eta parte-hartzea da hondakin bakoitza dagokion edukiontzira botatzea; funtsean, edalontziak eta bestelako ontziak, jai-esparru guztietan eskuragarri egongo diren ontzi eta edukiontzietara; beira, behar bezala serigrafiatuta dauden ontzi berdeetara eta igluetara; eta janari-hondarrak eta janariz zikindutako paper eta kartoiak edukiontzi marroietara, gai organikoei dagokiena. Horrela, ia ez da edukiontzirik beharko gainerako hondakinentzat, birziklatu ezin direnentzat.
Kontzertuen guneetan, bestalde, 200 edukiontzi eta ontzi gehiago jarriko dira, hondakin mota batzuetarako eta besteetarako. Eta, horrez gain, langile eta ibilgailu batzuk beren beregi papera eta kartoia, organikoa eta ontziak bereiz jasotzen arituko dira.
Txosnen gunean, bestalde, txosnen barruan 214 edukiontzi jarriko dira, birziklatu ahal diren era bateko eta besteko hondakinetarako; eta tamaina ertaineko beste 250 edukiontzi jarriko dira, jai-eremu guztietan.
Horren guztiaren bidez, birziklatzea eta hondakinak gaika bereiztea sustatu nahi da. Ildo horretan, bilakaera positiboa ikusten da azken urteetan. Hala, 2025ean 576,33 tona hondakin bildu ziren, 2024an baino gutxiago, urte hartan 609,91 tona jaso baitziren. Hala ere, gaikako bilketaren ehunekoak nabarmen egin zuen gora 2025ean, % 39,44ra iritsi baitzen, aurreko urteko % 37,40ren aldean.
Datu horiek agerian uzten dute 2025ean guztira hondakin gutxiago sortu bazen ere, nabarmen hobetu zela hondakinen kudeaketaren eta bereizketaren efizientzia, eta hori aurrerapen garrantzitsua da jai jasangarriagoen bidean. Aurrerapen horrek azpimarratzen du garrantzitsua dela ekitaldi jendetsuetan hondakinak birziklatzea eta behar bezala kudeatzea sustatzen duten neurriak eta kanpainak bultzatzen jarraitzea.
GARBIKETA ITSASADARREAN
Ontzi bi ibiliko dira itsasadarreko ur-azaleko eta ibaiertzeko beheko aldeetako, kaietako eta eskaileretako garbiketa-zerbitzuan, San Anton zubiaren eta Itsas Museumaren artean. 2025ean, ontzi bi horiek 2,40 tona hondakin jaso zituzten, gehienbat, flotatzen zeuden plastikoak eta beira, 2024an baino % 13,4 gutxiago.
Kaietatik ur-azalera sartzeko eskailerak urez garbitu eta desinfektatuko dira. Horrez gain, ur-azalean hesi flotatzaileak jarriko dira, udaletxearen eta txosnen parean, hondakinik itsasoratu ez dadin. Hesi horietan korronteak arrastatzen dituen hondakinak metatzen dira, eta hondakin horiek, azkenean, bereizita bildu eta tratatzen dira.
KOMUNAK
Aste Nagusian, Bilbon 260 komun baino gehiago egongo dira esparru publikoan herritarrek erabiltzeko. Komun finkoei, -hirurogei baino gehiago daude-, jaietarako instalatzen direnak gehituko zaizkio. Jai-esparru guztietan hainbat neurritako eta formatutako moduluak jarriko dira, eta guztira aldi baterako 200 komun baino gehiago egongo dira; horietako gehienak komun balioaniztunak (105) eta mota eta edukiera desberdineko ur-komunak (86) izango dira. Komun horiek konketak eta ispiluak dituzte eta garbitzeko eta papera entregatzeko pertsona bat egongo da uneoro; gainera, mugikortasun urriko pertsonentzat egokitutako komunak ere egongo dira.
Areatzako txosnen esparruan modulu sanitario inklusibo bat, hau da, genero bereizketarik gabekoa, jarriko da aurten ere. Zazpi komun eta bi konketa izango ditu.
Jaietarako propio jartzen diren komun horiei, hirian zehar dauden hirurogei komun iraunkorrak gehitu behar zaizkie.
Aipatzekoa da Etxebarria parkeko barraka gunean bainuak irailaren 6ra arte egongo direla zabalik, barrakak itxi arte.
Informazio gehiago Irekia atarian (Leiho berrian irekiko da)