- Cristina González Turismo, Merkataritza eta Kontsumoko sailburuak eta Maider Etxebarria Gasteizko alkateak ongietorria emango diete astelehenean, hilak 23, enoturismoko profesionalen nazioarteko topaketako kideei.
- I International Enotourism Summit (Enoturismoaren nazioarteko summita) azaroaren 23tik 26ra egingo da eta herrialde ezberdinetako 60 kazetari, bidaia-antolatzaile espezializatu eta eduki-sortzaile inguru bilduko ditu.
- Ekimenak Araba, Bizkaia eta Gipuzkoako aniztasun enogastronomikoa erakusteko aukera emango du, hiru lurraldeetako upategiak, mahastiak, gastronomia, ondarea eta proiektu berritzaileak deskubritzeko diseinatutako bederatzi esperientziaren bitartez.
ENOWAYS, International Enotourism Summit, Euskadiko Enoturismoaren Nazioarteko Topaketaren lehen edizioa egingo da Gasteizen azaroaren 23tik 26ra. Ekimen horren helburua da Euskadi nazioarteko erreferentziazko jomuga bihurtzea turismoaren segmentu horretan, ardoa, kultura, paisaia, gastronomia eta esperientziak uztartuta.
Enoways ekimenak, Turismo, Merkataritza eta Kontsumo Saila buru duela, Araba, Bizkaia eta Gipuzkoako Aldundietako Turismo sailen eta Gasteizko Udalaren laguntza instituzionala du, baita Arabako Merkataritza, Industria eta Zerbitzu Ganbera Ofizialarena, EDA Drinks and Wine Campus eta Arabako Errioxako Ardoaren Ibilbidearena ere.
Topaketak hainbat herrialdetako 60 parte-hartzaile inguru bilduko ditu —kazetari eta hedabide espezializatuak, bidaia-antolatzaileak eta eduki-sortzaileak—, eta euskal eskaintza enoturistikoa eta kalitatezko produktu turistiko gisa eskaintzen dituen aukerak bertatik bertara ezagutzeko aukera izango dute.
ENOWAYS egitasmoaren helburua da enoturismora hurbiltzea, upeltegietako bisita tradizionaletik haratago. Proposamenaren xedea da erakustea nola ardoa eta euskal nortasunari lotutako beste edari batzuk, hala nola txakolina eta sagardoa, kultura baten eta lurraldea ulertzeko moduaren parte diren. Lurralde hori gastronomia, ondarea, arkitektura, paisaiak eta proiektu horiek bizirik mantentzen dituzten pertsonen lekua ere bada.
Euskadiko aniztasun enogastronomikoa ezagutzeko bederatzi esperientzia
ENOWAYSen elementu bereizgarrietako bat izango da esperientzia profesionalen programa, parte hartzen duten profil desberdinentzat bereziki diseinatua. Jardunaldietan, parte-hartzaileak taldeka banatuko dira hiru lurraldeak zeharkatzeko, bederatzi proposamenen bidez: upategietako bisitak, dastatzeak, esperientzia gastronomikoak eta kultura- eta natura-ondarea bisitatzea.
Araba: Arabako Errioxa eta ardoaren kultura
Arabako hiru esperientziek Arabako Errioxaren dimentsio ezberdinak ezagutzeko aukera emango dute.
Proposamenetako batek mahastizaintza birsortzailera hurbilduko ditu kazetariak. Ekoizleen belaunaldi berri bat ezagutuko dute ere: lurraldearekiko errespetua, bioaniztasuna eta ahalik eta esku-hartze txikiena bere lanaren erdigunean kokatzen duen belaunaldia. Ibilbidean Bhilar Upeltegiak, Oxer Wines eta El Sacramento–Viña Leizaola proiektuak egongo dira, besteak beste, eta amaitzeko, esperientzia gastronomikoa izango da Edorta Lamoren Kanpezuko Arrea jatetxean, Michelin izar bat eta Izar Berde bat duen jatetxean.
Beste ibilbide bat arkitekturari, arteari eta ardoari buruzkoa izango da, eta Pritzker saria jaso duten arkitektoek diseinatutako hiru upategi bisitatuko dituzte: Frank Gehryren Marques de Riscal; Santiago Calatravaren Ysios; eta Bodegas Faustino, Norman Fosterren El Legado proiektuarekin. Best of Wine Tourism 2026 saria jaso zuena Arkitekturaren kategorian.
Hirugarren esperientziaren bidez, bidaia-antolatzaileek Arabako Errioxako herrien mahastizaintza eta ardogintza nortasunean sakondu ahal izango dute eta, horretarako, Páganos, Samaniego, Viñegos de Páganos eta Remírez de Ganuza bisitatu eta Samaniegoko Jauregian proposamen gastronomiko bat egingo dute.
Gipuzkoa: itsasoa, sagardoa eta tradizio gastronomikoa
Gipuzkoako esperientziek paisaiaren, edari tradizionalen eta gastronomiaren arteko lotura erakutsiko dute.
Lehenengoa, eduki-sortzaileei zuzenduta dago, eta itsasoak Getariako txakolinean duen eragina aztertuko du. K5 Zarautz bisitatuko dute, Zarautz eta Getaria arteko itsas ibilaldia egingo dute, Txomin Etxaniz upategia bisitatuko dute eta Elkanon bazkalduko dute. Elkano Aitor Arreguiren jatetxea da, Michelin izar bat du eta nazioartean ospe handia txingarretan erretako arrainak prestatzeagatik.
Bigarren proposamena prentsarentzat izango da: euskal sagardoaren historia eta Atlantikoa zeharkatu zuten baleontziekin eta nabigazioarekin izan duen harremana azalduko da. Ibilbidean zehar honako leku hauek bisitatuko dira: Albaola, Pasaiako Itsas Museoa; Petritegi —2026an ehun urte beteko ditu—; Sagardo Etxea, euskal sagardoaren erreferentzia zentroa; eta Igartubeiti baserri-museoa, XVI. mendekoa, antzinako dolare bat duena. Eguna amaitzeko, esperientzia gastronomikoa izango da Iriarte Jauregian.
Azkenik, bidaia-antolatzaile espezializatuek Gipuzkoa barnealdea ezagutuko dute: Inazio Urruzola txakolindegi familiarra, Ordiziako merkatu historikoa, Hika Txakolina —munduko alkoholik gabeko lehen txakolinaren sustatzailea— eta Tolosako Casa Julian bisitatuko dituzte.
Bizkaia: berrikuntza, paisaia atlantikoa eta abangoardiako gastronomia
Bizkaiko hiru proposamenek txakolinaren inguruko proiektuen aniztasuna erakusteko aukera emango dute.
Prentsarentzako esperientziak Urdaibaiko Biosferaren Erreserba zeharkatuko du, eta erreferentziako bi mahastizaintza- eta ardogintza-proiektu lotuko ditu, Itsasmendi eta Gorka Izagirre. Eneko Atxaren Azurmendi jatetxera ere bisita egingo da. Hiru Michelin izar ditu, eta jasangarritasunarekin duen konpromisoagatik da ezaguna. ENEKO Larrabetzun egingo den bazkariarekin amaituko da jardunaldia.
Eduki-sortzaileek txakolinaren, ondare industrialaren eta gastronomiaren arteko lotura ezagutuko dute Magalarte Lezama eta Doniene Gorrondona upategiak bisitatuta. Azken hori erreferentea da Bakioko txakolin beltza berreskuratzen. Halaber, UNESCOk Munduko Ondare izendatutako Bizkaiko Zubia bisitatuko dute, eta Zuriñe Garciaren El Paladar jatetxean bazkalduko dute.
Azkenik, bidaia-antolatzaileek Bizkaiko barnealdea ezagutuko dute landa-paisaia eta goi-mailako gastronomia uztartzen dituen proposamen baten bitartez. Honako hauek bisitatuko dituzte: Txispa, Tetsuro Maedak Atxondon duen jatetxea, Michelin izar bat duena; Bilboko Karolinaren elaborazioaren inguruko jarduera gastronomikoa; eta Garenaren mahastia eta upategia. Amaitzeko, esperientzia gastronomikoa izango dute.
Bederatzi esperientzia horien bidez, tradizioa eta berrikuntza, familia-proiektuak eta abangoardiako proposamenak, tokiko produktuak eta nazioarteko aintzatespena duen gastronomia uztartzen dituen eskaintza enoturistikoa erakutsiko da.
Informazio gehiago Irekia atarian (Leiho berrian irekiko da)