Ibone Bengoetxea lehen lehendakariorde eta Kultura eta Hizkuntza Politikako sailburuak gaur aurkeztu du Denise Scott Brown. Hiria. Kalea. Etxea erakusketa Bilboko Arte Ederren Museoan. Erakusketak nazioarteko arkitektura eta hirigintza garaikidean erreferente den Denise Scott Brownen pentsamendua eta ekarpena balioan jartzen ditu.
Aurkezpenean azpimarratu duenez, “erakusketa honek hiria ulertzeko begirada berritzailea eskaintzen du, espazio publikoaren, eguneroko bizitzaren eta pertsonen arteko harremanen garrantzia nabarmenduz. Kulturak gure gizartea eraldatzeko duen gaitasunaren adibide argia da”.
Erakusketak Scott Brownen ibilbide intelektual eta profesionala errepasatzen du, bereziki hirien behaketatik abiatuta garatutako ikuspegia aztertuz. Argazkiak, marrazkiak, testuak eta ikus-entzunezko materiala biltzen ditu, arkitektura sozialago eta inklusiboago baten alde egindako lan aitzindaria erakusteko. Lehendakariordeak nabarmendu du, halaber, Euskadik lehen mailako kultur azpiegiturak dituela eta nazioarteko proposamenak erakartzeko gaitasuna duela: “Halako ekimenek gure kultur sistema indartzen dute eta Euskadi sormenaren eta pentsamendu garaikidearen topagune gisa sendotzen laguntzen dute”.
Erakusketa datozen hilabeteetan egongo da ikusgai, eta publiko zabalari zuzenduta dago: arkitekturaren arloko profesionalei ez ezik, kulturaz eta hirien etorkizunaz interesa duten herritar guztiei ere bai.
Informazio gehiago: https://bilbaomuseoa.eus/eu/bisita/zer-ikusi/erakusketa/denise-scott-brown-hiria-kalea-etxea/8979d350-eba3-1553-9893-c064503763f6
Informazio gehiago Irekia atarian (Leiho berrian irekiko da)