Europar Batasunetik kanpotik bidaltzen diren produktuak online erosi ohi badituzu, adi egon behar duzu. 2026ko uztailaren 1etik aurrera, balio txikiko bidalketentzat (150 eurora arte) 3 euroko aduana-zerga berria jarri da indarrean. Kontsumobidek neurri honen xehetasunak azalduko dizkizu, paketeak jasotzean ustekabeko kargurik izan ez dezazun.
Zertan datza neurri hau eta zergatik aplikatzen da?
Europar Batasunak artikulu bakoitzeko 3 euroko aduana-eskubidea ezartzea onartu du, inportatutako produktuen aduana-sailkapenaren arabera kalkulatuta. Neurri honekin, bertan behera geratzen da kanpoko herrialdeetatik etorri eta 150 eurotik beherako balioa zuten bidalketa gehienek aduana-zergetatik salbuesteko zuten abantaila historikoa.
Kargu honek behin-behineko izaera du eta 2028ko uztailaren 1era arte aplikatuko dela aurreikusten da. Egun horretatik aurrera, EBko aduana-sistema berriaren esparruan sartuko da eta produktuen izaeraren araberako ohiko aduana-zergak aplikatuko dira.
Zergatik hartu du neurri hau Europako Batzordeak? Europako Batzordeak balio txikiko online erosketen gorakada handiari erantzuteko justifikatu du zerga hau. 2025ean, aduana-zergarik ordaindu gabeko balio txikiko ia 5.900 milioi artikulu sartu ziren EBn. Gainera, ikuskapenek arazo larriak hauteman zituzten: 2025ean aztertutako balio txikiko produktuen %60 baino gehiagok ez zituzten betetzen EBko segurtasun-estandarrak (osagai debekatuak zituzten kosmetikoak, jostailu arriskutsuak edo tresna elektroniko akastunak). Zerga honekin kontsumitzailearen segurtasuna eta tokiko merkataritzarekiko lehia zuzena bermatu nahi dira.
Kontuz! Artikuluaren arabera kalkulatzen da, ez paketearen arabera
Araudiaren puntu nagusietako bat, eta zalantza gehien sortzen dituena, kalkulatzeko modua da. 3 euroko eskubidea artikulu edo aduana-kategoria bakoitzeko aplikatzen da, eta ez pakete osoari oro har. Horrek esan nahi du kostu gehigarria eskaera berean erosi duzun produktu-aniztasunaren araberakoa izango dela zuzenean:
- 5 kamiseta berdin-berdinak erosten badituzu: Aduana-mota berekoak direnez, aduana-zerga bakarra aplikatuko da: 3,00 €.
- Kamiseta 1 eta erloju adimendun 1 erosten badituzu: Bi aduana-mota ezberdin direnez, aduana-zerga totala 6,00 € izango da (3 €-ko bi zerga).
- Kategoria ezberdineko 3 artikulu erosten badituzu: Guztira 9,00 € ordaindu beharko dituzu aduana-zergetan.
Nork ordaintzen du zerga hau eta nola eragiten dio zure poltsikoari?
Legez, ondasunen aitorpena egiten duena da zerga ordaintzeko arduraduna (normalean salmenta-plataforma, inportatzailea edo garraiolaria). Hala ere, praktikan, honek zuzeneko eragina izango du kontsumitzaileengan honako modu hauetan:
- Salmenta-prezioaren igoera: Atzerriko online salmentako plataforma handiek 3 euro hauek automatikoki produktuaren prezioari gehitzea erabaki dezakete erosketa ordaintzeko unean.
- Garraio-enpresak aurretik kobratzea: Garraiolariak edo operadore logistikoak zerga hau erreklamatu lezake, dagokion BEZarekin eta aduana-kudeaketako gastuekin batera, paketea etxean entregatu aurretik.
Kontsumobideren gida praktikoa erosketa egin aurretik
Paketea jasotzean ezusteko txarrak eta aldez aurretik pentsatu gabeko karguak saihesteko, honako hauek egiaztatzea gomendatzen dizugu:
- Egiaztatu bidalketaren jatorria: Ez fidatu soilik webgunea euskaraz edo gaztelaniaz idatzita dagoelako, edo prezioak eurotan (€) agertzen direlako. Bilatu baldintzetan produktua benetan zein herrialdetatik bidaltzen den.
- Aztertu prezioaren banaketa: Ziurtatu azken prezioak inportazio-BEZa, zerga berria eta gainerako kudeaketa-gastuak barne hartzen dituen.
- Informatu zaitez garraiolariari buruz: Egiaztatu zein agentzia arduratzen den banaketaz eta entrega unean aduana-kudeaketako kostu gehigarriak kobratzeko ohitura ote duten.
- Egiaztatu itzultzeko baldintzak: Gogoratu, produktua atzera egiteko eskubideagatik itzultzea erabakitzen baduzu, aduana-kostuak ez direla automatikoki berreskuratzen. Produktua akastuna denean edo erositakoarekin bat ez datorrenean soilik aurreikusten da itzulketa.
- Segurtasun-bermeak eskatu: Teknologia, jostailuak edo kosmetikoak erosten badituzu, bilatu beti CE marka eta egiaztatu segurtasun-argibideak eta oharrak argi daudela.
Online erosketei buruzko zalantzarik edo erreklamaziorik izanez gero, jo gure Lurralde Zerbitzuetara edo sartu www.kontsumobide.eus webgunean.