Osakidetzaren Administrazio Kontseiluak Koldo Berganzo Corrales doktorea izendatu du gaur Asistentzia Sanitarioko zuzendari, Euskal Osasun Sistemako ospitaleetako eta Lehen Mailako Arretako osasun-arreta zuzendu, planifikatu, koordinatu eta kudeatzeko.
EHUn Medikuntzan eta, zehazki, Neurologian lizentziatua, Berganzo Neurozientzian doktorea da, eta Osakidetzan mediku gisa jardun du hamarkada batez baino gehiagoz, Gurutzetako Unibertsitate Ospitalean, batik bat. Gainera, Zuzendaritza eta Kudeaketa Sanitarioko Masterra du, eta 2021az geroztik asistentziaren kudeaketatik hurbilago dauden zereginak bete ditu: lehenik, Bilbo-Basurtuko ESIko zuzendariorde mediko izan zen bi urtez, eta, ondoren, Osakidetzako Zuzendaritza Nagusiko Baliabide eta prozesu asistentzialen analisiko zerbitzuko burua izan zen 2022tik 2024ra. Iazko azarotik gaur egun arte, Ospitaleko Arreta Koordinatzeko zuzendariordea izan da Osakidetzako Zuzendaritza Nagusian, Maite Martínez de Albeniz Zabaleta aurreko DASen lantaldearen barruan. Martínez de Albeniz Donostialdea ESIko zuzendari gerentea da uztailean izendatu zutenetik.
Asistentzia Sanitarioko zuzendari berriak ikerketaren eta irakaskuntzaren eremuan ere lan egin du denbora luzez, jatorrizko 27 artikulu zientifiko argitaratu ditu aldizkari indexatuetan eta 15 ikerketa-proiektu eta saiakuntza kliniko ditu. Gainera, besteak beste, Espainiako Neurologia Elkarteko Irakaskuntza eta Akreditazio Batzordeko kide izan da (2014-2020), baita Bizkaiko Sendagileen Elkargoko Etika eta Deontologia Medikoko Batzordekoa ere (2019-2024). Gainera, Berganzo Bizkaiko Parkinson Elkartearekin (Asparbi) lankidetzan aritzen da neurologo aholkulari gisa duela urte batzuetatik.
Lore Bilbao zuzendari nagusi berriaren taldean egin den izendapen berri honekin, Osakidetzak osasun-sistemaren aurrerapenarekin duen konpromisoa indartu da, herrialdean eragina duten proiektu berritzaileak bultzatzen dituzten eta Euskadiko osasungintzarako garapen-aukera berriak irekitzen dituzten lider berriak baititu. Hala, Osasun Sailak eta Osakidetzak diziplina anitzeko talde baten aldeko apustua egiten dute, antolamenduaren eta teknologiaren modernizazioari aurre egiteko, Euskadiko Osasun Itunak adostutako ondorioen ildotik, eta euskal gizartearen zahartze demografikoak eta globalizazioak dakartzan erronkei erantzuteko.
Informazio gehiago Irekia atarian (Leiho berrian irekiko da)