- Prestakuntza, networkinga eta tresna berritzaileak ekintzaileei eta proiektuei indarra emateko
- Aurrez aurreko bost saio egingo dira 2025ean nekazaritzako elikagaien sektorean, basogintzan eta landa sektorean ekintzailetza sustatzeko, prestakuntza espezializatuaren, esperientzia partekatuen eta laguntza-sareen sorreraren bidez
2025 03 13- Arkauti. Vitoria-Gasteiz
Ostegun Ekintzaileak ekimena inspirazioz beteta itzuliko da aurten, aurrez aurreko bost saioko ibilbide berriarekin. Saio horiek Euskadiko nekazaritzako elikagaien, basogintzako eta landa sektoreko ekintzaileak bultzatzeko diseinatuta daude. Programa hau Eusko Jaurlaritzako Elikadura, Landa Garapen, Nekazaritza eta Arrantza Sailak sustatu du HAZI Fundazioaren bitartez, eta ikasteko eta konektatzeko gunea eskaintzen du. Bertan, parte-hartzaileek beren proiektuak sendo ditzakete prestakuntza espezializatuaren, partekatutako esperientzien eta laguntza-sareak sortzearen bidez.
Ostegun Ekintzaileak egitasmoa 2015ean sortu zen ekintzaileen artean harremana sustatzeko helburuarekin. Hala, ideiak trukatzeko, aukerak detektatzeko eta proiektuei hazteko aukera ematen zaie lankidetzarako ingurunean. Ekimen hau Euskadiko landa- eta itsasertz-ingurunean aukera berriak bilatu nahi dituzten pertsonei zein dagoeneko negozioa finkatuta duten eta berritzeko gogoa dutenei zuzenduta dago.
10 urtetan zehar, topaketa horiek ekintzailetza-prozesuan laguntzeko erreferentzia-puntu gisa finkatu dira. Horietan, adituek emandako prestakuntza praktikoa, ekintzailetzaren erronkei aurre egiteko funtsezko tresnak eta networkingerako gunea eskaintzen dituzte, parte-hartzaileek beren kontaktu-sarea zabaldu eta antzeko erronkei aurre egin behar dieten pertsonekin esperientziak partekatu ahal izateko.
Saio bakoitzak proiektuek arrakasta izan dezaten gai estrategiko bat jorratzen du, enpresa-mentalitatea indartzen duten inspirazioa, ikaskuntza eta dinamikak uztartuz. Aurten, ibilbidea bost saiok osatuko dute eta Euskadiko hiru lurralde historikoetan eskainiko dira:
- Martxoak 27 – Araba “Zure ongizatea erein: osasun fisiko, mental eta harremanen arteko inpaktua” Hizlaria: Maitena Salinas
- Maiatzak 22 – Bizkaia “Arimarekin saldu: storytelling bideoa” Hizlaria: Susana Torralba
- Ekainak 19 – Gipuzkoa “Komunitatean ekiteko indarra” Hizlaria: Gemma Fillol
- Urriak 16 – Bizkaia“Saltzeko idaztea AAren aroan”Hizlaria: Maider Tomasena
- Azaroak 20 – Araba Kabia Azoka: elkarlaneko jardunaldia tokiko kontsumoaren inguruko kontzientzia pizteko
Kabia: komunitatean ekiteko gunea
Ostegun Ekintzaileak programa Kabia ekosisteman sartuta dago. Gune hori landa eta itsasertzeko edo elikaduraren eta basoen balio-kateko ekintzaileen artean komunitatea sortzeko eratutako espazio fisiko eta digitala da.
HAZI Fundazioak bultzatuta, Kabiak lankidetzaren bidez proiektuak eta ekintzaileak lagundu, sortu, hazi eta sendotzea du helburu. Topagune goxoa da, eta ekintzaileen eta erakunde laguntzaileen arteko elkarrekintza errazten du, modu organikoan proiektuak eraldatzen eta pertsonak ahalduntzen lagunduz.
Gainera, Kabiaren APPak (www.kabia.hazi.eus) aukera ematen du lurraldeko ekintzailetzako egiturarekin harremanean etengabe egoteko, sarea eta sinergiak sortuz eta ekimen bakoitza sendotzen laguntzen duten baliabideen eta prestakuntza-materialen liburutegirako sarbidea eskainiz. Aplikazio horren bidez, ekintzaileek beren proiektuak indartzeko diseinatutako material pedagogikoetara, podcastetara eta tresnetara sarbidea izan dezakete. Baliabide horien guztien artean, azpimarratu beharrekoa da KABIA HAZIAK, esperientzien trukearen eta elkarrizketaren bidez, ekintzailetza-mentalitatea sustatzeko eratutako tresna.
Ostegun Ekintzaileak ekimenaren edizio berri honekin, Kabiak landa-inguruneko eta itsasertzeko ekosistema ekintzailean laguntza eta ikaskuntza emateko eta sinergiak sortzeko bere gain hartutako konpromisoa indartzen du, eta prestakuntzarako, inspiraziorako eta hazkunderako guneak eskaintzen ditu, proiektuak jaio ez ezik, modu arrakastatsuan sendo daitezen.
Informazio gehiago eta APPrako sarbidea hemen: www.kabia.hazi.eus
Informazio gehiago Irekia atarian (Leiho berrian irekiko da)