Euskadik, gainerako autonomia-erkidegoetako ordezkariekin eta Eskualdeen Europako Lantaldean ordezkaritza duten toki-erakundeekin batera, "Konpostelako Adierazpena" deiturikoarekin bat egin du. Adierazpen horrek irmo gaitzesten du Europako Batzordeak 2028-2034 urte anitzeko finantza-esparruari eta etorkizuneko kohesio-politikari buruz egindako proposamena.
Eredu berri horrek Europako funtsak kudeaketa zentralizatuko estatu kide bakoitzeko plan bakarretan bilduko lituzke, eta horrek eskualdeen benetako partaidetza murriztuko luke, baliabideen lurralde-banaketari gardentasuna kenduko lioke eta Batasunaren Tratatuetan finkatutako kohesio-printzipioa ahulduko luke.
"Konpostelako Adierazpena" gaur argitaratu da Santiagon, ordezkaritza ezberdinen arteko jarrera bateratua finkatzeko deitutako jardunaldian. Eusko Jaurlaritzako ordezkariak Juan Alberdi Ekonomia Politikarako eta Europar Kohesiorako zuzendaria eta Marta Marín Euskadiren Europar Batasunerako ordezkaria izan dira.
Era berean, Adierazpenak azpimarratzen du kohesioa ez dela mugatu behar gutxien garatutako eskualdeetara, baizik eta Europako eskualde guztietara, desberdintasun berriak sortzea saihestuz. Era berean, lurralde- eta hiri-garapen integratuko estrategien eta mugaz gaindiko eta eskualdeen arteko lankidetza-programen garrantzia aldarrikatzen du, zuzenean laguntzen baitute Europaren integrazioan eta gizarte-, ekonomia- eta lurralde-kohesioan.
Gobernantzaren arloan, dokumentuak ohartarazten du estatu mailan funtsen kudeaketa zentralizatzeak izan ditzakeen arriskuez, eta eskatzen du autonomia-erkidegoek, Europako funtsen programazioan eta betearazpenean duten esperientzia egiaztatuarekin, funtsezko zeregina betetzen jarrai dezatela EBko eskualde-politikaren programak diseinatzen, kudeatzen eta ebaluatzen. Alde horretatik, Konpostelako Adierazpenak autonomia-erkidegoek dagozkien funtsak kudeatzeko agintari gisa duten eginkizuna aitortzeko eta Europako Batzordearekin zuzenean hitz egiteko eskatzen du.
Santiagoko bileran parte hartuta, Euskadik kohesio-politika sendo, deszentralizatu eta lurraldearen garapen orekatura bideratutako baten aldeko konpromisoa berresten du, Europako proiektuaren oinarri diren solidaritate-, jasangarritasun- eta lehiakortasun-balioen ildotik.
Informazio gehiago Irekia atarian (Leiho berrian irekiko da)