- Eusko Jaurlaritzak kezka agertu du berdelaren edo kabaialaren kuota %70 murrizteko proposamenagatik
- “Hainbesteko murrizketak arrisku larrian jarriko luke amu-arrantzaren bidez espezie hau harrapatzen duen kostaldeko arrantza-sektorearen errentagarritasuna”, azpimarratu du Amaia Barredo sailburuak
Eusko Jaurlaritza Bruselan egiten ari den Europar Batasuneko Nekazaritza eta Arrantza ministroen Kontseiluan egongo da gaur eta bihar, non Atlantikorako, Ipar Itsasorako eta Mediterraneorako arrantza-aukeren gaia jorratuko da, baita 2027 ondorengo NPEari eta bere araudiari lotutako proposamenen sinplifikazioa ere.
Kontseilua gaur eta bihar egingo da, eta Eusko Jaurlaritzako Elikadura, Landa Garapena, Nekazaritza eta Arrantza Sailaren izenean Amaia Barredo sailburua izango da bertan, Leandro Azkue Arrantza, Portu eta Litoraleko sailburuordearekin eta Ixone Soroa Arrantza eta Akuikulturako zuzendariarekin batera.
Arrantzari dagokionez, proposamenen helburua da espezie komertzial gehienentzat harrapaketa-mugak ezartzea, baita populazio bakoitzerako estatu kideen kuotak ere. Proposamenetan aurreikusitako arrantza-aukera batzuk EBk berak ezarriko ditu Nekazaritza eta Arrantza Kontseiluaren baitan, eta beste batzuk, berriz, EBtik kanpoko herrialdeekin egindako kontsulta multilateralen edo bilateralen ondoren.
Kontseiluaren akordio politikoa Batzordeak egindako proposamenetan oinarrituko da, eta eskuragarri dagoen aholkularitza zientifiko onena hartuko du kontuan, arrantza-politika erkidearen (APE) helburuak errespetatuz: EBko arrantzaren jasangarritasun ekologikoa, ekonomikoa eta soziala bermatzea.
Agrifish kontseilu honetan euskal arrantza-espezie nagusien TAC eta arrantzako kuotak erabakiko dira, hala nola hegaluzea edo antxoa. Eusko Jaurlaritzarentzat kezka nagusia da berdelaren edo kabaialaren kuota %70 murrizteko proposamena: “Hainbesteko murrizketak arrisku larrian jarriko luke amu-artearekin espezie hau harrapatzen duen kostaldeko arrantza-sektorearen errentagarritasuna”, nabarmendu du Amaia Barredok.
Aitzitik, alde positiboan kokatzen da hegaluze gorriko kuota %17 handitzeko proposamenaren berrespena. Eusko Jaurlaritzako Elikadura, Landa Garapena, Nekazaritza eta Arrantza Sailak proposamena modu positiboan baloratzen du.
Nekazaritzari dagokionez, Kontseiluak 2027 ondorengo NPEari lotutako proposamenetan berrikuntza eta sinplifikazioa landuko ditu. Ministro komunitarioek orientazio-eztabaida bat izango dute, NPEaren 2027 ondorengo proposamenen testuinguruan berrikuntzari eta sinplifikazioari buruz.
Informazio gehiago Irekia atarian (Leiho berrian irekiko da)