- Datozen 15 egunetan, herritarrek parte hartu ahal izango dute tentsionatutako eremuetan etxebizitzak alokairuan jartzen dituztenen segurtasun juridikoa indartzeko asmoa duen programa honen hasierako arautze-fasean
- Laguntzak ordaindu gabeko errentak, hornidurak eta kalteak estaliko ditu prozesu judizialaren hasierako faseetatik, eta alokairuaren prezioa erreferentzia-prezioen indizearekin edo parametro baliokidearekin bat datozen etxebizitzak merkatura daitezen du helburu
- Itxaso sailburuak gaur goizean iragarri du hori, ‘House Action’ kongresuaren inaugurazioan. Bertan, Jaurlaritzak legealdiaren hasieratik duen borrokarako jarreraren baitan kokatu du ekimena, EAEko hirietako etxebizitza-merkatuak bizi duen tentsionamenduaren eta eskaintza-eskasiaren aurrean
Etxebizitza eta Hiri Agenda Sailak aurretiazko kontsulta publikoaren izapidea hasi du Alokaplus programa berria sortzeko. Programa hori ez-ordaintze eta kalteen aseguru publikoa izango da, laguntza bidez kudeatuko dena, eta etxebizitza-merkatuko tentsionatutako eremutzat jotako udalerrietan kokatutako etxebizitzak dituzten errentatzaileei eta jabeei dago zuzenduta. Hala iragarri du sailburuak gaur goizean, ‘House Action’ kongresuaren inaugurazioan. Bertan, Jaurlaritzak legealdiaren hasieratik duen borrokarako jarreraren baitan kokatu du ekimena, EAEko hirietako etxebizitza-merkatuak bizi duen tentsionamenduaren eta eskaintza-eskasiaren aurrean.
Ekimen horrek ekainaren 30eko 6/2022 Legearen 11. artikuluan xedatutakoa betetzen du; izan ere, lege horren arabera, arau berriak sustatzen dituzten organoek herritarren iritzia jaso behar dute testu juridikoa idatzi aurretik. Hala, ebazpen horren bidez, Sailak herritarrak gonbidatzen ditu araudi berriaren beharraz, egokitasunaz, helburuez eta irismenaz iritzia ematera, bai eta egon daitezkeen alternatiba arautzaile eta ez-arautzaileez hausnartzera ere.
Azken urteotan, batez ere COVID-19ak eragindako krisi soziosanitarioaren ondorioz, errentatzaileen babesa indartzeko hainbat neurri onartu dira. Besteak beste, etxebizitza zaurgarrietan etxetik botatzeko aukera etetea, kontratuak ohiz kanpo luzatzea edo etxebizitza-merkatuko tentsionatutako eremuak izendatzea, alokairuaren prezioei eta haien eguneratzeei eusteko. Neurri horien bidez, maizterren egoera hobetu egin da, baina, zeharka bada ere, jabe askok beren etxebizitzak alokairuaren merkatura sartzeko errezeloa areagotu dute, eta, hala, eskaintzaren eskuragarritasuna murriztu eta eremu jakin batzuetan zaildu egin da.
Orain arte, etxegabetze-prozedurak eteteak eragindako errentatzaileentzat aurreikusitako konpentsazioa 2021eko urriaren 26ko Aginduaren bidez egituratu da, eta 11/2020 Errege Lege Dekretuan jasotako kasu jakin bat baino ez du estaltzen. Konpentsazio hori etete-autotik altxatzen den arte soilik kalkulatzen da, eta Alokairu Merkatuaren Estatistikak zehazten duen alokairuaren batez besteko balioa hartzen da kontuan. Ondorioz, aintzat hartzen diren zenbatekoak lehen aldiz ordaindu ez zenetik benetan zor direnak baino askoz txikiagoak dira, eta ez dituzte egoerak eragindako kalte ekonomikoak erabat estaltzen.
Jabeen segurtasun juridikoa handitzea
Alokaplus programa berriak irtenbide integral eta eraginkorragoa eskaini nahi du. Errenta, hornidurak eta kalteak ordaintzea bermatzeko izango da laguntza, eta, gainera, are lehenagotik hasita: demanda onartzen den autoa, etetea onartzen denaren ordez. Zordundutako zenbateko osoa estaliko da, etorkizuneko aginduan zehaztuko den mugaraino. Azken xedea da jabeen segurtasun juridikoa handitzea eta tentsionatutako eremu izendatutako udalerrietan alokairu-merkatuan etxebizitza gehiago sartzea lortzea —gaur egun hutsik edo jenderik gabe daudenak—, alokairu-prezioa erreferentzia-prezioen indizearekin edo parametro baliokidearekin bat badatoz.
Aldi berean, gaur egun errentamendu-kontratua sinatzeko zailtasun handienak dituzten kolektiboei etxebizitzarako sarbidea erraztearen alde egiten du Alokaplus programak. Horien artean daude 35 urtetik beherako pertsonak, guraso bakarreko familia-unitateak, adin txikikoak kargura dituztenak eta dibertsitate funtzional edo psikikoa dutenak. Horrela, ekimenaren helburua da maizterren eta errentatzaileen eskubideak eta bermeak orekatzea, etxebizitzen merkatuan presio handia dagoen egoera honetan.
Aurretiazko kontsultaren izapidea hamabost egun baliodunez egongo da irekita, eta epe horretan edozein pertsonak edo erakundek aurkeztu ahal izango ditu ekarpenak. Ebazpena Eusko Jaurlaritzaren egoitza elektronikoaren iragarki-taulan argitaratu da, gardentasunari buruzko araudiak ezartzen duen bezala. Ekimen horren bidez, Etxebizitza eta Hiri Agenda Sailak berretsi egiten du herritarren parte-hartzea eta etxebizitza-politika publikoak hobetzeko duen konpromisoa, horiek merkatuaren benetako beharretara eta gizarte-dinamika berrietara egokituta.
Informazio gehiago Irekia atarian (Leiho berrian irekiko da)