Ermuak bakardadeari aurre egiten dio

Ermuko Udalak, BBK Fundazioarekin eta Agintzari Fundazioarekin elkarlanean, 'Ermua Sarean/En Red' proiektua jarri du abian. Ekimen aitzindaria da, gizarte ekintzaren bidez 65 urtetik gorako pertsonen artean nahi ez den bakardadeari aurre egitea bilatzen duena. Programa honen aurkezpen ofiziala joan den ekainean egin zen eta ordutik aurrera inplementatzeko urrats esanguratsuak eman dira.

Proiektua ikuspegi integralagatik bereizten da, nahi ez den bakardade-egoerak goiz detektatzetik hasi eta adinekoak zaintzeko eta laguntzeko komunitate osoa aktibatzeraino.

Hain zuzen ere, proiektu hori herritarren lankidetza bilatzeko fasean dago orain, egoera ahulean dauden pertsonengana hurbiltzeko. Horregatik, adinekoei laguntzeko sare honekin bat egin nahi duten Ermuko pertsona, elkarte edo saltokiei dei egiten zaie Gertu zerbitzuarekin aurrez aurre harremanetan jar daitezen (Probaleku, 4, behea ezkerra) edo 688 657 938 eta 688 818 461 telefonoetara dei dezaten.

Funtsezko lau zutabe
Erkidegoko sare hori funtsezko lau zutabetan oinarritzen da. Alde batetik, datuak aztertzeari ekin zaio, eta sistema informatiko bat ezarri da nahi ez den bakardadean egon daitezkeen adinekoak detektatzeko. Fase hau aurreratuta dago. Informazio honekin Ermuko errealitatearen diagnostikoa egin da, eskura dauden udal baliabideen eta herriko adinekoen behar espezifikoen analisiarekin. Gainera, proiektuak ekintza komunitarioko plan bat ere badu, herritarrak sentsibilizatzeko eguneroko harremanen eta elkarren zaintzaren garrantziaz, eta kalteberatasun-egoeran dauden adinekoak baliabide sozial eta komunitarioetara hurbiltzeko.

21 saltoki solidario
Gaur egun, azken fase horri heltzen ari zaio. Komunitateko hainbat eragile (dendak, farmaziak, elkarteak, parrokiak, etab.) bizikidetza oneko eta zaintza komunitarioko dinamiketan inplikatzeko lan egiten da.

Orain arte, Ermuko 21 saltokik parte hartu dute ekimenean. 'Ermua Sarean/En Red' proiektua 'Bizkaia Saretu' eta 'BBK Behari' bezalako ekimen arrakastatsuetan oinarritzen da, udalerriaren berezitasunetara egokituz, eta teknologia eta ekintza komunitarioaren konbinazio hau aurrekari bat izatea espero da adineko pertsonengan nahi ez den bakardadearen aurkako borrokan.