Areatza pasealekuak 2025eko Bilboko Liburu Azoka hartzen du maiatzaren 30etik ekainaren 8ra. Euskadiko Liburu Ganbarak antolatuta, Bilboko Udalaren babesarekin, literatur hitzordu honek 55. edizioa ospatuko du, programazio anitzarekin eta publiko guztiarentzat egokitua.
Hamar egunez, guztira 56 etxola banatuko dira Areatzan zehar, azken argitalpen-nobedadeak, liburuen aurkezpenak, sinadurak eta bestelako literatura-ekitaldiak antolatu dira. Horrez gain, egun arrakasta handia jasotzen ari diren idazleak ikusi eta ezagutzeko aukera ere eskaintzen du azokak.
Edizio honetan, besteak beste, Kutxabank Atea Saria emango zaie Eduardo Mendoza idazle ospetsuari – duela gutxi Asturiasko Printzesa 2025 saria jaso zuen – eta Katixa Agirre euskal idazleari.
Areatza pasealekuan egingo diren jarduerez gain, Udalak programa paralelo bat antolatu du Bidebarrieta Kulturgunean. Maiatzaren 27tik ekainaren 9ra bitartean, hamar aurkezpen eta literatur topaketa izango dira, guztiak 19:00etan, doako sarrerarekin.
Azkenik, Udalak bi etxola propio izango ditu azokan: bata, argitalpen instituzionalak saltzeko, eta, bestea, Bilboko Udal Liburutegien Sareak kudeatuko du. Bertan, Fondo Bilbao erakusketa bibliografikoa egongo da, 2023 eta 2024 bitartean hiriari buruz argitaratu diren eta bilbotarrek edo tokiko argitaletxeek idatzi edo editatu dituzten lanetan oinarritua.
Bilboko Liburu Azoka itxi ondoren, literatura-jarduerak aurrera jarraitzen du Euskadin, uztailaren 4tik 13ra egingo den Donostiako 2025 Liburu Azokarekin. Hamar egunez, Gipuzkoa Plaza etxolaz, argitalpen-nobedadez, egileekin topaketez eta aurkezpenez beteko da berriro, irakurleentzat zein liburuaren sektoreko profesionalentzat topagune bihurtuz.
Zilarrezko Luma
Horren aurretik, maiatzaren 29an, Zilarrezko Luma sariak banatu ziren. Aurten, Dolores Redondo, Miren Agur Meabe eta Mircea Cartarescuren lana saritu dute.
Dolores Redondok, gaztelaniazko thrillerraren egile erreferenteak, milaka irakurle bereganatu ditu Baztango Trilogia bezalako lanekin. Miren Agur Meabe, gaur egungo euskal literaturako idazlerik garrantzitsuenetakoa, nabarmendu egin da bai poesian bai narratiban. Bestalde, Literaturako Nobel sarirako ohiko hautagaia den Mircea Cartarescu errumaniarrak lan sakon eta onirikoa eskaintzen du, nazioartean ospe handia izan duena.
