Arku Atlantikoko Batzordea, Imanol Pradales lehendakaria buru dela, Espainiako, Frantziako, Portugalgo eta Irlandako gobernu nazionalekin bildu da gaur goizean, Makroeskualde Atlantikoa sortzeko proiektuaren aurrerapenen berri emateko.
Espainiako eta Portugalgo EBko Gaietarako Estatu Idazkarien, Frantziako EBrako Ministro Delegatuaren eta Irlandako enbaxadorearen aurrean, lehendakariak Itsas Estrategia Atlantikotik benetako Makroreskualde batera eboluzionatzearen balio erantsia nabarmendu du.
Lehendakariak nabarmendu du beharrezkoa dela Makroeskualde Atlantikoaren sorreran aurrera egitea, lurralde-kohesioa indartzeko, konektibitatea hobetzeko eta eskualdearen erresilientzia ekonomikoa indartzeko tresna gisa.
"Atlantikoak izugarrizko potentziala du Europan eraldaketa berdea eta digitala gidatzeko. Horretarako, funtsezkoa da modu koordinatuan jardutea, egungo lankidetza-esparruak gaindituz, erronka komunei ikuspegi partekatuarekin eta baliabide lerrokatuekin aurre egiteko aukera emango digun estrategia makroerregional bati bide emateko ", azpimarratu du lehendakariak.
Gaur goizean Bilbon egindako bileran Espainiako, Frantziako, Portugalgo eta Irlandako gobernu nazionaletako ordezkariak bildu dira, baita Arku Atlantikoko ehun sozioekonomikoko funtsezko eragileak ere, hala nola Merkataritza Ganbera Atlantikoak, unibertsitate atlantikoen CRUSOE sarea eta Atlantikoko Ekonomia eta Gizarte Komiteen Sarea.
Arku Atlantikoko Batzordea: hurrengo pausuak
Arku Atlantikoko Batzordea Makroeskualde Atlantikorako ibilbide-orri bat prestatzen ari da, epe luzerako beharrezko baliabideak identifikatzeko. Atlantikoko eragile sozioekonomikoen parte-hartze aktiboarekin idatzi da plana, eta AACk Sevillan egingo duen hurrengo Batzar Nagusian aurkeztuko da, 2025eko ekainaren 5ean eta 6an.
Informazio gehiago Irekia atarian (Leiho berrian irekiko da)