"Udaberriko bertso saioak" Bilboko Santutxu auzoko Karmelo plazara itzuliko da maiatzean, hiru saio eta bertso-poteo batekin
- Bilboko Udalak Santutxuko bertsolaritzaren egungo izenak bilduko ditu maiatzaren 10, 17 eta 24an, larunbatetan, 13:00etan
- Hilaren 30ean (ostirala) ohiko bertso-poteoa egingo da Karmelo plazan
Bilboko Udalak, Santutxuko Bertso Eskolarekin batera, "Udaberriko bertso saioak" saio berria antolatu du udaberri honetarako. Santutxuko Karmelo plazan hiru bertso saio ospatuko dira maiatzaren 10,17 eta 24an. Gainera, ostiralean, hilak 30, ohiko bertso-poteoa egingo da, 20:00etan hasita, Karmelo kaleko 7. zenbakian.
"Udaberriko bertso saioak" ekimenaren 41. edizioa egingo da aurten, eta, urte hauetan, programa euskaltzaleentzako topagune bihurtu da, Santutxuko Bertso Eskolak egiten duen lana babesteaz gain, Bilboko 2023-2033 Kultura Plan Estrategikoan jasotako helburuetako bat baita.
Aurtengo edizioan 14 bertsolari, 7 emakume, 6 gizon eta genero ez-bitarreko bertsolari bat izango dira, lau belaunalditako ordezkariak. Horrela, aurten hiru estreinatuko dira "Udaberriko bertso saioak" saioan (Aner Euzkitze, Aroa Arrizubieta eta Maite Sarasola), gazteenak, eta beste sei beteranoak dira eta hogei urte baino gehiago daramatzate kultur programa honetan parte hartzen (Maialen Lujanbio, Unai Iturriaga, Oihana Bartra, Amets Arzallus, Sustrai Colina eta Beñat Gaztelumendi).
Bertsolarien artean sei bizkaitar daude, eta horietako bi bilbotarrak dira, Santutxu eta Deustuko bertso-eskoletakoak. Lau Gipuzkoakoak dira, bi Iparraldekoak, bat arabarra eta bestea nafarra. Saioak azken txapelketetako sei irabazle izango ditu: Alaia Martin (Gipuzkoa 2024), Aroa Arrizubieta (Araba 2024), Julio Soto (Nafarroa 2023), Nerea Ibarzabal (Bizkaia 2023), Amets Arzallus (Iparralde 2021) eta Maialen Lujanbio (Euskal Herria 2022). Topaketa bakoitzeko gaiak Santutxuko Bertso Eskolak proposatuko ditu eta gai-jartzaile hauek aurkeztuko dituzte: Irati Erkizia, Iker Uribarren eta Haizea Telleria.
Ohiko bertso-poteoa maiatzaren 30ean, ostirala, izango da, eta 20:00etan hasiko da Karmelo kaleko 7. zenbakian, Iker Uribarrenek gidatuta eta Nerea Ibarzabal eta Unai Iturriagaren partaidetzarekin. Karmelo kaleaz gain, Ricardo Bastida plaza eta Arsuaga kalea zeharkatuko ditu, lau geralekurekin.