Artisten mugikortasuna lagundu eta bultzatzeko eta haien arteko kultura eta diziplina anitzeko trukea bultzatzeko asmoz, Tabakalera Morphorekin elkarlanean ari da Europalia jaialdiaren esparruan. Horretarako, Europaliak, Morphok, Tabakalerak eta Etxepare Euskal Institutuak Morpho eta Tabakaleraren arteko erresidentzia truke programa bat jarri dute martxan.

Deialdi honen helburua truke egonaldi artistiko bat egitea da Morphoren (Anberes, Belgika) eta Tabakalera Kultura Garaikidearen Nazioarteko Zentroaren (Donostia) artean. Etxepare Euskal Institutuaren lankidetzarekin garatzen da programa hau.

Deialdi hau euren praktika artistikoa Euskal Autonomia Erkidegoan, Nafarroan edo Iparraldean garatzen duten eta Morphon testuinguru artistiko berriak esploratu eta euren ibilbide artistikoa zabaldu nahi duten artistei zuzenduta dago.

Egonaldiak hamaika aste iraungo du, eta lekua, testuingurua eta denbora eskainiko ditu proiektu artistiko bat garatzeko. Egonaldia 2025eko irailaren 29tik abenduaren 21era egingo da.

Jasotako proposamen guztien artean proiektu bat aukeratuko da.