Ostiral honetan inauguratuko da Montehermoson Maider Garayo Urabayen artistaren "Camiseta flúor, bañador Speedx" erakusketa
- Erakusketa lehenengo solairuko aretoan egongo da ikusgai apirilaren 27ra arte
- Montehermosoko Proiektu Artistikoak Ekoizteko Laguntzen 2024ko Deialdian aukeratutako lau lanetako bigarrena da
- 2025eko deialdia zabalik dago, eta proiektuak apirilaren 11ra arte aurkez daitezke
Montehermosoko Proiektu Artistikoak Ekoizteko Laguntzen 2024ko Deialdian hautatutako lau lanetako bigarrenaren erakusketa ostiral honetan, otsailaren 21ean, inauguratuko da, 19:00etan. Maider Garayo Urabayenen Camiseta flúor, bañador Speedx erakusketa da eta apirilaren 27ra arte egongo da ikusgai Kulturuneko lehen solairuko aretoan.
"Proiektu honek elementu katalizatzaile gisa funtzionatzen du, artistari jarreraren geometriari, azelerazioari, alienazioari edo ikuspegi anizkoitzari buruz interesatzen zaizkion gaiak lotzeko, eta, aldi berean, partekatutako esperientzia garaikideari argia ematen dio", azaldu du Sonia Díaz de Corcuera Kultura zinegotziak aurkezpenean. Garayo, gainera, hainbat keinuk eskaintzen dizkioten performanceko eta estetikako aukerez baliatzen da (hala nola igeriketa), gorputzaren, objektuaren eta irudiaren arteko erlazioa eginez eta gorputzari eta haren mugei etengabeko erreferentziak eginez.