Moriarti Produkzioak ekoiztetxeak 2025eko Urrezko Danborra jaso du
- Donostiako ekoiztetxeko kideek alkatearen eskutik jaso dute saria, Udalbatza Aretoan egindako ekitaldian
Donostiako alkate Eneko Goiak 2025eko Urrezko Danborra eman dio Moriarti Produzkioak zinema ekoiztetxeari, Udaletxeko Udalbatza Aretoan, San Sebastian eguneko ekitaldi ofizialetako batean.
Asier Acha, Aitor Arregi, Xabier Berzosa, Jon Garaño eta Jose Mari Goenagak osatzen duten Moriarti Produkzioak ekoiztetxea hiriak hamarkadetan zehar zaindu duen ekosistema kulturalaren parte da. Moriartik kultura hiria, euskararen hiria, izaera propioa duen hiria eta bere nortasunean sakondu nahi duen hiria ordezkatzen ditu.
Donostiako akalde Eneko Goiak ekoiztetxe donostiarrak ekoitzitako Cristobal Balenciaga telesail arrakastatsuaren eszena bat birsortuz hasi du hitzaldia. Gogora ekarri duenez, "aurtengo Urrezko Danborra jaso dutenek, beren sormenari esker, Udalbatza Areto hau, jatorrian Kasinoaren Dantza Aretoa zena, Parisko jatetxe dotore bat bihurtu zuten, Balenciaga eta Coco Chanelen arteko afari bat hartu zuena, non biek modaren etorkizunaz eta prêt à porter delakoaz eztabaidatzen zuten. Ez zuten Parisera joan beharrik izan. Etxean zeukatena aprobetxatu zuten".
"Zineman, milaka eta, beharbada, milioika istorio kontatu dira", adierazi du Goiak. "Meritua begiradan datza, nola kontatu eta transmititu. Eta zuek tekla hori aurkitu duzue, zuen pelikulak iristen, konektatzen eta hunkitzen dituena. Begirada zintzoa, zehatza, sentikorra, estetikoa, baina baita oso etikoa ere. Eta, gainera, oso modu gipuzkoarrean egin duzue. Lan isila egiten, baina lan handia egiten. Zaratarik eta handitasunik gabe. Gainera, eta hori zuen ezaugarria da, taldean lan egiten duzue".
"Donostiako Urrezko Danborra izatea aintzatespen handia da, eta harro egon behar da, eta ospatu egin behar da, horrela sentitzea eta egingo duzuela espero baitut", adierazi du alkateak sarituei zuzenduta. "Baina, aldi berean, erantzukizun handia da. Hemendik aurrera, hiriaren enbaxadore bihurtzen zaretelako ofizialki. Une honetatik aurrera, bereizten eta aitortzen zaituen hiriak eskatzen dizue zuen ibilbidean zehar egin duzuena egiten jarraitzeko: hartaz hitz egin, zuen filmetan erakutsi, eta, zergatik ez, amets egitera ausartzen naiz, agian egunen batean protagonista bihurtzera".