2024ko azaroaren 7a.- Osalanek gaur goizean parte hartu du AMPEAk Gasteizko Vital Fundazioan antolatutako genero-ikuspegidun laneko arriskuen prebentzioari buruzko jardunaldian. Arabako Emakume Profesional eta Enpresarien Elkartea, AMPEA, irabazi-asmorik gabeko elkartea da, 1993tik Arabako enpresa-sektoreetan emakumearen giza balioak, balio sozialak eta balio profesionalak sustatuz lan egiten duena, enpresari, profesional eta zuzendari gisa. Elkarte hori da, hain zuzen ere, kolektibo horren lotura eta ordezkaritza erakunde publiko eta pribatuen aurrean.
Gaur goizeko jardunaldiaren helburua izan da aztertzea eta eztabaidatzea lan-baldintzek eta lan-inguruneek nola eragin diezaieketen modu desberdinean gizonei eta emakumeei, eta hori kontuan hartu behar da lan-arriskuen prebentzioan, zereginetan, erantzukizunetan eta arriskuekiko esposizioan dauden aldeak kontuan hartuta.
Horren harira, Angélica Fraile FLCko Laneko Arriskuen Prebentzioko arloko arduradunak, Amaia Etxebarria Laborabako gerenteak, Sonia Galdós AAFeko giza baliabideetako arduradunak eta Victoria Álvarez Osalaneko Laneko Arriskuen Prebentzioko arloko arduradunak gai horri heldu diote, genero-ikuspegidun Laneko Arriskuen Prebentzioko sarrera batekin hasita, enpresetako kasu praktikoen azalpenarekin jarraituz eta berdintasuna hobetzeko proposamenekin amaituz.
Bere hitzaldian, Victoria Álvarezek azaldu du, alde batetik, Osalanen ikuspegia genero-ikuspegia Laneko Arriskuen Prebentzioan txertatzeari buruz, zergatik uste duen Laneko Segurtasun eta Osasunerako Euskal Erakundeak ezinbestekoa dela ikuspegi hori egitea laneko segurtasunaren eta osasunaren arloan gizonek eta emakumeek bizi duten egoera desberdina ikusita, eta, bestetik, nola heldu ikuspegi horri enpresei eta zer tresna jartzen dituen Osalanek haien eskura prozesu horretan laguntzeko.
