- Eusko Jaurlaritzako Osasun Sailak uztailean abian jarritako talka-planari esker, lortu da azaroan itxaronaldia 11 egun jaistea kirurgian (67,7 egunetik 56,7 egunera); 13 egun kontsultetan (70,6 egunetik 57,7 egunera); eta 6 egun proba osagarrietan (43,5 egunetik 37,5 egunera)
- Alberto Martínez Osasuneko sailburuak “etxeko” profesionalen ahaleginari eta elkarlanari aitortu die meritua; izatez, iazko aldi berarekin alderatuta, jarduera nabarmen handitu den arren, lortu dira emaitza horiek
Eusko Jaurlaritzako Osasun Sailak, uztailean talka-plana abian jarri ondoren, hartutako neurriei esker, murriztu dira Osakidetzako itxaron-zerrendak. Gaur-gaurkoz, 60 egunetik behera kokatu dira, bai kirurgian, bai kontsultetan, eta 43,5 egunetik 37,5 egunera murriztu dira proba osagarrien kasuan. Hala jakinarazi du gaur Alberto Martinez Osasuneko sailburuak Eusko Legebiltzarreko kontrol saioan, EH Bilduren galdera bati erantzutean.
Sailburua pozik agertu da, datuek “bide onetik goazela” erakusten baitute. “Bide horretan jarraituko dugu, hasiera-hasieratik guretzat erabateko lehentasuna duen gaia den heinean”. Eta “etxeko” profesionalen ahaleginari eta elkarlanari aitortu die meritu osoa. Izatez, iazko aldi berarekin alderatuta, jarduera nabarmen handitu den arren —% 10 inguru—, lortu dira emaitza horiek.
Honako datu hauetan islatzen da uztaila-urria aldian jarduerak izandako hazkundea, aurreko urtearekin alderatuta:
Kirurgia handiko 42.459 prozedura egin dira, % 9,5 jarduera handiagoa.
Kontsultetan % 8,4 jarduera handiagoa, lehen kontsulten kasuan (espezialistarengana bideratzea), % 10,7 jarduera handiagoa.
% 8,9 proba diagnostiko gehiago anbulatorioetan.
Etxeko ospitalizazioko zerbitzuetan % 7,2 alta gehiago izan dira; ohiko ospitalizazioa egonkor mantendu da (+% 1,33). Horrek esan nahi du etxeko ospitalizazio-zerbitzuen aldeko apustu garbia egin dela, eta are gehiago indartuko dira jarduera horretarako zerbitzu-zorroa eta plantillak.
Hala ere, Martinez sailburua zuhur agertu da eta itxaron-zerrendak are gehiago murrizten lagunduko duten neurriak zabaltzen jarraitzeko konpromisoa hartu du, batik bat zailtasun handieneko espezialitateetan.
Zehazki, kirurgiako itxaron-zerrendak aurtengo uztailean 67,7 egunekoak izatetik azaroan 56,7 egunekoak izatera pasa dira, hau da, 11 egun murriztu dira. Kontsultetan, jaitsiera are handiagoa da, uztailean itxaron-zerrendak 70,6 egunekoak ziren eta azaroan 57,8 egunekoak, hau da, 12,9 egun gutxiago. Bi kasuetan, atzerapena 60 egunetik behera jaitsi da.
Proba osagarrien kasuan (Osakidetzak aplikatutako talka-planaren hirugarren ardatza), itxaronaldia 6,2 egunetan murriztu da, uztailean 43,5 egunekoa izatetik gaur egun 37,5 egunekoa izatera pasa da. Era berean, paziente onkologikoek eta bihotzekoek ez dute ebakuntza kirurgikoa egiteko ezarritako epea baino gehiago itxaron.
HARTUTAKO NEURRIAK
Alberto Martinez sailburuak lau hilabete hauetan hartu diren eta gaur ezagutarazitako emaitzak lortzea ahalbidetu duten neurri zehatzak azaldu ditu. Horien artean, honako hauek nabarmendu ditu:
- Osakidetzak kontratazio-programa espezifikoa gauzatu du, eta horri esker ospitale-esparruan 75 mediku kontratatu dira.
- Osasun-erakundeen arteko lankidetza-mekanismoak ezarri dira, zailtasun espezifikoak dituzten ospitale-zerbitzuei lagun dakien. Izan ere, jarduera handiena duten zentroek, une jakin batean, eskari txikiena duten ospitaleetan lan egiten duten profesionalen laguntza jasoko dute, haien jarduera osoa estal dadin.
- Kirurgiako, probetako eta kontsultetako ahalmena handitu ahal izan dugu, ezohiko lanaldiak irekitzearekin eta arratsaldeko jarduera handitzearekin.
- Epe ertain-luzerako programazioari euskarria ematen dion CIRUS programari esker, kirurgia-kudeaketa erraztu da. Horrek kirurgia-errendimendua areagotu du, hutsarteak detektatu eta ezabatzearekin, eta sistema osoko ebakuntza-gelen erabilera optimizatu du.
- Jarduera eta kudeaketa efizienteagoa eragin duen barne-lankidetza horri gehitu zaio erakunde guztietan kirurgia-batzordeak sortu izana. Hala, profesionalek kirurgia-jarduera guztiaren jarraipen estua egin ahal izango dute.
Informazio gehiago Irekia atarian (Leiho berrian irekiko da)