Oro har, baina bereziki Barakaldon egun hauetan egiten ari den “The Champions Burger” ekitaldia dela eta, Eusko Jaurlaritzako Osasun Sailak gomendatzen du hanburgesak ondo eginda kontsumitzea, elikagaien toxiinfekzio-arriskuak saiheste aldera.
Ildo horretan, aditzera eman du haragi xehatu gordina edo gutxi egina kontsumitzea oso arriskutsua izan daitekeela pertsonen osasunerako, bakterioak izan baititzake, hala nola Shiga toxinak sortzen dituen Escherichia coli (E.coli) bakterioa edo Salmonella bakterioa.
Hori dela eta, eta azken asteetan Estatuko beste leku batzuetan hanburgesen kontsumoarekin lotutako E.coli kasuak hauteman direnez gero, Osasun Sailak, bere Osasun Publikoko zuzendaritzaren bitartez, prebentzio-ikuskapenak egin ditu, ekitaldi hori Barakaldon egiten utzi aurretik, eta modu aktiboan zainduko du bertako elikagaien segurtasuna.
Halaber, Osakidetzako profesionalei ohartarazi die komeni dela susmo diagnostikoa areagotzea gaixotasunarekin bateragarriak diren sintomak, hala nola gorakoak eta beherakoak, dituzten pazienteen kasuan.
Aldi berean, ekitaldiaren barrutian kartelak eta eranskailuak jarri ditu, haragia ondo eginda kontsumitzeko gomendioarekin.
Escherichia coli gizakiaren eta animalien hesteetan ohikoa den bakterio-talde bateko bakterioa da. Talde horretako bakterio gehienak kaltegarriak ez diren arren, Shiga toxina sortzen duten anduiek koadro gastrointestinal larriak eragin ditzakete. Salmonella bakterioa, berriz, ezagunagoa da, eta, sarritan, arrautzak kontsumitzearekin lotzen den arren, haragi xehatu gordinean edo gutxi egindakoan ere ager daiteke.
Osasun Sailak ohartarazi du, gainera, 15 urtetik beherako pertsonak, 70 urtetik gorako pertsonak eta immunodepresioa duten pertsonak zaurgarriagoak direla mota horretako toxiinfekzioekiko.
Infekzio-iturriak
STEC bidezko toxiinfekzioari gehien lotzen zaizkion elikagaiak behi-haragia eta beste hausnarkari batzuena dira, bereziki haragi xehatua (hanburgesak) eta produktu eratorriak, gordinik edo gutxi egina. Haragia txikitzean, gainazalean bakterioak badaude, gainerako produktua kutsa dezakete.
Gomendioak
Hanburgesetan Shiga toxina eta Salmonella eragiten dituen E. coli-aren balizko presentziari lotutako arriskuak murrizteko modurik errazena behar adina sukaldatzea da, barruan gutxienez 70 ° C-ko temperaturara iritsiz. Horrela, bakterioa deuseztatu eta toxina inaktibatzen da.
Beraz, ondo sukaldatutako hanburgesa kontsumitzea gomendatzen da, bakterio patogeno horiek transmititutako elikadura-toxinfekzioa prebenitzeko, bereziki lehen aipatutako biztanleria zaurgarrian.
Informazio gehiago Irekia atarian (Leiho berrian irekiko da)