Eusko Jaurlaritzak prezipitazio handien ondoriozko alerta laranja aktibatu du gaur, larunbata, 17:00etatik 22:00etara

Argitalpen-data: 2024/08/31

Oso euri-zaparrada handiak eta ekaiztsuak espero dira eta txingorra ere egin dezake

Eusko Jaurlaritzak prezipitazio handien ondoriozko alerta laranja aktibatu du gaur, larunbata, abuztuaren 31, 17:00etatik 22:00etara. Iragarpenaren arabera, oso euri-zaparrada handiak eta ekaiztsuak bota ditzake, eta txingorra ere egin dezake (2-3 cm-koa). Prezipitazioen intentsitatea oso handia izan daiteke (ordubetean 30 l/m² baino gehiago) eta ekaitz-guneetan haize-boladak 60 eta 100 km/h artekoak izan daitezke.

Euskalmet Euskal Meteorologia Agentziaren arabera, gaur, larunbata, arratsaldean, Bizkaiko Golkoaren inguruan kokatutako goi-geruzetako depresio isolatu baten eraginpean egongo da Euskadi. Depresio horri gainazaleko ezegonkortasun-lerro bat gehituko zaio, Euskal Autonomia Erkidego osoari eragingo diona. Horrek oso giro ezegonkorra eta nahasia eragingo du, zaparrada gogor eta ekaiztsuekin.

Egoera horrekin, gaur arratsalde-gauean (17:00etatik 22:00etara) eurite handiak eta ekaiztsuak espero dira, Euskal Autonomia Erkidegoa hego/hego-mendebaldetik ipar/ipar-ekialdera zeharkatuko dutenak. Tokian-tokian,euri-zaparradak handiak izango dira, eta batzuetan oso handiak izan daitezke; hori dela eta, Larrialdiei Aurre Egiteko eta Meteorologiako Zuzendaritzak gomendatzen du:

Neurri prebentiboak

• Mendiko irteerak eta aire zabaleko txangoak saihestu.

• Ez aparkatu ibilgailurik eta ez kanpatu ur-ibilgu lehorretan, ezta ibai-ertzetan ere, ur-goraldi batek edo uholde batek ustekabean harrapa ez zaitzan.

• Kendu ibilgailuak ur-putzuak sor daitezkeen guneetatik, baita uholde-arriskua izan dezaketen garajeetatik ere.

• Saihestu autoz zirkulatzea.

• Bidaiatu behar baduzu, ahal dela errepide nagusietatik eta autobideetatik bidaiatu, eta, ikusmen-arazoak badaude, gelditu ibilgailua leku seguru batean.

• Kendu urak herrestan eraman ditzakeen objektuak, batez ere kutsadura eragin dezaketen produktu arriskutsuak.

• Berrikusi hurbileko hustubideen egoera.

Larrialdi kasuan hartu beharreko neurriak

• Ibaietatik, uharretatik, zubietatik eta uholde-arriskua duten zonetatik urrundu. Ez zeharkatu urpean dagoen zonarik —ez oinez, ez autoz—, uraren indarrak eraman zaitzake-eta. Uraren ondorioz autoa errepidean geldituta geratzen bada, itzali argiak eta aldendu.

• Era berean, mendi-mazelen eta muinoen behealdetik urrundu, ur-erauntsiak eta harri- eta lur-jauziak gerta baitaitezke eremu horietan.

• Uholdea etxebizitzaraino iristen bada, lehenbailehen irten sotoetatik eta beheko solairuetatik.

• Etxebizitzatik irtenez gero, elektrizitatea deskonektatu, eta gasa eta ura itxi. Era berean, ostatua non hartuko duzun jakinarazteko oharra utzi.

• Punturik garaienetara joaten saiatu, eta urpean gera daitezkeen zonak saihestu.

• Eguraldiaren iragarpenei eta egoerari buruz etengabe informatuta egon, irratiaren edo beste hedabide batzuen bidez.

• Kendu loreontziak, olanak eta haizeak eraman ditzakeen material guztiak.

Komeni da pronostikoen eta abisuen eguneratzeen jarraipena egitea Euskalmeten web-orrian (http://www.euskalmet.eus) eta X sare sozialeko kontuetan (@Euskalmet eta @112_SOSDeiak).

Larrialdi kasuan, deitu 112 telefonora

Informazio gehiago Irekia atarian (Leiho berrian irekiko da)