PRENTSA-OHARRA
Lehiaren Euskal Agintaritzaren (LEA/AVC) Kontseiluak azken urtean MLBNk baimendu dituen eta euskal enpresak tartean izan diren kontzentrazio-eragiketei buruzko txosten bat onartu du. Honelako seigarren urteko txostena da.
Kasu gehienetan, lurraldean presentzia duen enpresa izan da eskuratzailea: zortzi eragiketetatik seitan gertatu da, eta bitan, berriz, eskuratutakoa izan da.
2024ko abuztuaren 2a
Lehiaren Euskal Agintaritzaren (LEA/AVC) Kontseiluak azken urtean MLBNk baimendu dituen eta euskal enpresak tartean izan diren kontzentrazio-eragiketei buruzko txosten bat onartu du. Erakundeak seigarren urtez jarraian landu du horrelako txosten bat, eta 2023ko uztailetik 2024ko ekainera bitarteko aldia aztertu du.
Azken urte horretan zortzi kontzentrazio-eragiketa egin ziren Euskadin dauden enpresekin lotuta, aurreko urtean baino lau gutxiago. Gainera, aurreko ekitaldian ez bezala, kasu gehienetan Euskadin presentzia duen enpresa izan da eskuratzailea, guztira sei eragiketatan; gainerako bi kontzentrazioetan eskuratutakoa izan da. Guztiak kontrol esklusiboko erosketak izan dira, baterako kontroleko kasu bat izan ezik.
Baterako kontrol-kasu bakarra izan da Repsol Customer Centric SLk (Repsol taldearen filiala eta egoitza Abanto-Zierbenan duena) eta CIDE Servicios Comerciales de Energía SLk CIDE HC Energía SAUren (CHC) gainean eskuratu dutela, Repsolek CHCren kapital sozialaren % 50,01 eskuratuz.
Baimendutako eragiketen artean, Mémora Servicios Funerarios SLk kontrol esklusiboko hiru erosketa daude: Funeraria Luis Nuevo SLren hileta-aktiboak, Valentziako familia-enpresa bat; Tanatorio de Palencia SLU; eta Tanatorio La Soledad Funeraria SL, Valladoliden.
Hauek izan dira gainerako eragiketak: Comitans Capital AGk, Small Bore Pistons Holding GMBH sozietate berriaren bidez, Rheinmetall Automotive AGren (Abadiñon lantegi bat duena) kontrol esklusiboaren eskuraketa; UNIALCO SLUk (UVESCO, egoitza Irunen duena) Supermercados Superhiber SLUren kontrol esklusiboaren eskuraketa; Generalife Clinics SLk Clínicas Ginemed SLren (klinika bat duena Bilbon) kontrol esklusiboaren eskuraketa; eta Sener Aeroespacial SAk (egoitza Getxon duen Sener Grupo de Ingeniería buru duen enpresa-taldearen zati bat) Sistemas de Control Remoto SLren kontrol esklusiboaren eskuraketa.
Kasuak MLBNri jakinarazi zitzaizkion, Lehiaren Defentsari buruzko Legean (LDL) legez ezarritako mugak gainditzen zirelako. Horietako seitan merkatu-kuotaren atalasea gainditzen zen, beste batean negozio-bolumena gainditzen zen eta azkenekoan bi atalaseak gainditzen ziren.
Euskal enpresak 2014tik baimendutako 92 eragiketetan
2014tik, MLBNk 902 kontzentrazio-eragiketa baimendu ditu guztira, LDLn aurreikusitako atalaseak gainditu ondoren. Horietatik guztietatik, euskal enpresek eragiketa horietako 92tan parte hartzen zuten, hain zuzen ere, kontzentrazioen % 10,20an. Urteko bataz bestekoa euskal enpresak tartean dauden bederatzi baimendutako eragiketakoa da.
Enpresen kontzentrazioak kontrolatzearen helburua merkatuen lehiakortasun-egitura ahultzea saihestea da. Izan ere, bai Europan, bai Espainian, aurretiazko kontrol bat dago, eta kontrol hori aldez aurretik jakinaraztea eskatzen du, eragindako enpresen negozio-bolumenaren edo merkatu-kuotaren atalase jakin batzuk gainditzen dituztenean. Eragiketa, oro har, etenda geratuko da lehia-agintaritzak baimena eman arte, baldintzekin edo gabe.
Testuinguru horretan, Lehiaren Euskal Agintaritzak MLBNk onartutako kontzentrazio-eragiketen urteko jarraipena egiten du, Euskadin dauden enpresei zer neurritan eragiten dieten kuantifikatzeko. Ondorioz, LEA/AVCk euskal enpresek parte hartzen duten kontzentrazioen kontrolean esku hartzearen egokitasuna baloratu nahi da, lehiaren ikuspegitik kontzentrazio horien ondorioak baloratzeko ondoen kokatuta dagoen agintaritza delako.
Izan ere, Lehiaren Euskal Agintaritzak bere txostenean azpimarratzen du kontzentrazio-eragiketa batek autonomia-erkidego batean duen eragina ez datorrela bat ebazten den prozeduraren fasearekin. Horregatik, komenigarritzat jotzen du MLBNk dagokion agintaritza autonomoari prozeduraren lehen fasean ere txosten bat eskatzea.
Txosten osoa esteka honetan dago eskuragarri.
Lehiaren Euskal Agintaritzari buruz
Lehiaren Euskal Agintaritza erakunde autonomoa da, administrazio-izaerakoa, Eusko Jaurlaritzako Ekonomia eta Ogasun Sailari atxikia, eta bere jarduera independentzia organiko eta funtzionalarekin garatzen du Euskal Autonomia Erkidegoaren lurralde-eremuan. Euskal Autonomia Erkidegoaren lurralde-eremuan gauzatzen diren jarduera ekonomikoei dagokienez, merkatuan lehia askearen eta gardentasunaren baldintzak sustatzea, bermatzea eta hobetzea du helburu.