• Gernikako musikari eta konpositoreak Eres tú: De Mocedades a El Consorcio (2023) dokumentalerako sortu du album hau

Eres tú Hannot Mintegia musikari eta konpositore gernikarrak (Bizkaia) -Moxal izen artistikoaz ezaguna- sortutako lehen soinu-banda originala da. Lan instrumental hau, azaroaren 15ean argitaratuko dena, Eres tú: De Mocedades a El Consorcio (2023) dokumentalerako sortu da, Lorea Pérez de Albénizek zuzendua. Film luzeak Mocedades eta El Consorcio taldeen historia aztertzen du, Espainiako azken berrogeita hamar urteetako musika-talde ikonikoenetako bi. Soinu-banda 12 pieza originalez osatuta dago, eta dokumentalaren ekoizpenarekin batera sortu da, 2023ko uztaila eta abendua bitartean. Orain, Hannotek aurrerapauso bat eman du soinu-banda hau obra autonomo gisa argitaratuz.

Hannoten esanetan, "dokumentaleko talde osoa, protagonistak barne, oso pozik geratu dira emaitzarekin. Sentitzen genuen musikak ezin hobeto funtzionatzen zuela narratibaren barruan, baina aldi berean, bere horretan ere gozatua izateko potentziala zuela".

Diskoaren konposizioa, grabaketa eta ekoizpena Hannotentzat zein dokumentaleko protagonistentzat oso esanguratsuak diren bi espaziotan egin dira. Lehenengo lekua Aitor Etxebarria musikari, konpositore eta ekoizlearen estudioa da. Hannoten hitzetan, "soinu berezi eta sormen handiko espazioa da. Gainera, Aitorren ikuspegia luxu bat izan da niretzat, proiektu mota hauetan esperientzia zabala duelako. Apur bat esperimentatzera bultzatu nau, betiere istorioak eskatzen zuen estilo klasizista mantenduz".

Bigarren lekua Tio Pete Studios izan da, Urdulizen dagoen grabaketa-estudio mitikoa, Carlos Zubiagaren jabetzakoa. Zubiaga Los Mitos, Mocedades eta El Consorcio taldeko kide izan zen, eta baita dokumentaleko protagonista ere. Hannotek gehitzen duenez, "hamar disko baino gehiago grabatu eta ekoitzi ditut estudio horretan, Jose Lastrarekin batera. Philip Newell soinu ingeniariak eraikitako aretoaren diseinuak eta mikrofono zaharren bildumak 'garai bateko' izaera hori eman diete konposizioei, bilatzen ari nintzena".

Eres tú: De Mocedades a El Consorcio dokumentalean musikak paper garrantzitsua betetzen du. Mocedades eta El Consorcio taldeko melodiak iraunkorrak eta oso ezagunak dira, ahots-lan enblematikodunak. Honi buruz, konpositoreak hausnartzen du: "Hasieratik, kontziente nintzen gure memoria kolektiboan gordetako klasiko horiei musika berria gehitzeko zailtasunaz. Oreka bat aurkitu behar nuela banekien: zerbait berria sortu, baina aldi berean, nostalgia eta melodia originalen pisua ez oztopatzea. Kontraste sotila bilatu dut, baina aldi berean, haien abestien eta nire pieza originalen arteko bereizketa, argi utzi nahi izan dut, protagonistekin eta haien istorioarekin ere lotura izatea lortu behar nuelarik".

Helburu hori lortzeko, Hannot bi alderdi nagusitan oinarritu da. Lehenengoa, denboralitatea: iruditeria kolektiboan, El Consorcio-ren musikaren "mitoa" 1960ko eta 1970eko hamarkadetan finkatu zen. Hori dela eta, garai hartako tresna vintageak erabili ditu, hala nola, gitarra alemaniarrak eta anplifikadore zaharrak. Inspiraziorako bigarren bultzada dokumentalaren tratamendu bisuala izan da. Musikan islatu dira argazkigintza argitsua, samurtasun eta amets kutsuduna.

Azkenik, Hannot, Latinoamerikarekin El Consorciok duen lotura berezia islatzen saiatu da, bere musiketan bidaia transatlantiko hori iradokitzen duten pasarteak sartuz.

Emaitza 12 pieza instrumental txikiren bilduma da, easy listening-a, neoklasikoa eta intentsitate baxuko esperimentazioaren artean dabilena. Eres tú Forbidden Colours-ek argitaratuko du 2024ko azaroan.