Eusko Jaurlaritzako Garraio Sailak, ETS erakunde publikoaren bitartez, Zumaiako geltokia eraberritzeko lanak esleitu dizkio Iza, obras y promociones S.A. enpresari, 1.292.451 euroko zenbatekoan eta 12 hilabeteko egikaritze epearekin. Aurreikuspenen arabera, proiektua udazkenean hasiko da gauzatzen.
Jarduketarik garrantzitsuena sarbideko beheko pasabidearen ordez, edukiera bikoiztuko duen eta nasei igogailuarekin eta eskailera finkoekin konektatuta egongo den beste bat jartzea da. Gaur egun, erabiltzaileak Hegoalde eta Estazioko kaleen arteko bidegurutzetik sartzen dira geltokira, arrapala eta eskailera finkoen bidez nasekin lotzen den beheko pasabidetik. Zumaiako geltokiak 700 eta 2.500 erabiltzaile arteko trafikoa du egunean, batez beste.
Oro har, 2,4 metro zabal den egungo beheko pasabidearen ordez, 5,00 metro zabal den beste bat jarriko da. Nasekiko konexioa igogailuaren edo eskailera finkoen bidez egin ahal izango da. Igogailuek 8 pertsonentzako edukiera izango dute eta mugikortasun urriko pertsonentzat egokituta egongo dira.
Geltokiko zoladura osoa ere aldatuko da, bi nasetarako eskaileren aztarnak barne, baita nasa eta eskaileren arteko beheko pasabidearen egungo alikatatua ere. Proiektuak argiteria aldatzea ere jasotzen du. Igogailuaren instalazioari esker, egungo arrapalak bete eta itxi ahal izango dira, baliogabetutako solairuko azalera arrapala gisa aprobetxatuz, nasen azalera erabilgarria handitzeko.
Eraikina estilo neoeuskaldunekoa da eta Ramón Cortázar arkitekto gipuzkoarrak proiektatu zuen. 1981era arte, Bilbo-Donostia lineen eta Urolako trenbidearen arteko interkonexiorako geltokia izan zen, eta linea bakoitzerako bi eraikin desberdin zituen. 1988an Urolako trenbidearen ustiapena amaitu zenean, eraikinetako bat kendu egin zen, eta Urolako trenarena geratu zen erabilgarri.
Azken batean, Zumaiako geltokiaren irisgarritasun-baldintzak hobetu nahi dira, sareko puntu beltzen azterlanean antzeman diren gomendioak kontuan hartuta. Gomendio horiek Euskal Trenbide Sareak duela urtebete argitaratutako Euskal Trenbide Sareko geltokiak genero-ikuspegiarekin diseinatzeko irizpideen Liburu Zurian daude jasota.