Errubrika horren bidez, Eusko Jaurlaritzak Kutxabank (% 18,59) eta Laboral Kutxaren (% 2,78) esku zeuden Visesaren akzioak (guztira 2.648) erosi ditu, 15,6 milioi euroren truke. Balioa Kapital-sozietateen Legean aurreikusita dagoen aditu independente batek zehaztu du. Visesaren akziodunak aldatzeko eskaera Kutxabank eta Laboral Kutxaren eskutik sortu da.
Ordainketa kreditu globalaren gehikuntzari esker egin da, diruzaintza-geldikinaren kargura.
Visesak etxebizitza duin eta egokia izateko eskubidearen alde lan egiten jarraituko du, herritarren bizi-kalitatea bultzatzeko gakoa baita. Konprometituta dago 2021-2023 Etxebizitzaren Gida Planaren eta 2022-2036 Etxebizitzaren aldeko Itun Sozialak ezarritako helburuekin; izan ere, epe luzean EAEko gizarte-ongizatearen ereduaren oinarrietako bat etxebizitza izatea aurreikusten da bertan.