Gobernu Kontseiluak, gaurko bileran, foru aldundiekin hitzarmena sinatzea onartu du. Hitzarmen horren arabera, 2017-2018 ikasturtean hasitako Zerga Hezkuntzako programa beste bi ikasturtez luzatuko da, 2025eko irailaren 30era arte.
Abian jarri zenetik, 1.034 ikastetxek eta 34.317 ikaslek parte hartu dute ekimen bateratu honetan, 2022-2023 ikasturteko datuak kontuan hartu gabe, oraindik behin betikoak ez direlako (behin-behinekoak dira ikasturte honetan 262 ikastetxek eta 7.896 ikaslek parte hartzen dutela).
2013an Iruzur Fiskalaren aurka Borrokatzeko Batzordea sortu zenetik, eta herritarren artean kontzientzia fiskal kolektiboa indartzeko asmoz, jarduteko lehentasunezko ildotzat jo da adin goiztiarretan zerga-hezkuntza sustatzea. Jarduera hori proiektura atxikitako ikastetxeetan emandako hezkuntza-modulu baten bidez garatu da, eta zergei buruzko gaia lantzen da, prestakuntza etikoaren eta herritarraren ikuspegitik.
2017an hasitako proiektuak, jatorrian, jarraitzeko bokazioa izan zuen, ikastetxeetako harrera bikainak berretsi duena eta bere balantzea islatzen duena: lehen ikasturtean 132 ikastetxek parte hartu zuten, eta ikasturte honetan, 22-23an, hiru lurralde historikoetako 262 ikastetxek egin dute bat (behin-behineko kopuruak oraindik, izena emateko epea irekita dagoelako).
Gainera, gero eta ikasle gehiagorengana zabaldu da, adibidez, DBH 4. Mailako eta Batxilergoko ikasleetara eta Lanbide Heziketako ikasketetara hedatu baita.
Programa honen bidez, Euskadiko ikastetxeetara eramaten da Foru Ogasunek garatutako ekonomiari eta fiskalitateari buruzko unitate didaktiko komuna. Horren bidez, adin goiztiarretik:
- Gure erakunde-egituraren funtzionamendua, antolaketa, administrazioen arteko eskumen-banaketa eta horiek finantzatzeko modua ezagutzea.
- Elkarri lotutako ikuspegi bat aurkeztea, batetik, herritarrek eta enpresek administrazioei emandako baliabideen inguruan, eta, bestetik, administrazioak ondasun eta zerbitzu publiko gisa itzultzen dituen baliabideen inguruan.
- Zergen zentzu soziala ulertuta, uste dugu errazagoa izango dela iruzurraren ondorio kaltegarriak ere barneratzea, eta espero dugu haien aurkako jarrera naturala izango dela.
