Voxek eta PPk IMVren aurka jarritako helegiteak direla-eta Konstituzio Auzitegian aurkeztea erabaki du Gobernu Kontseiluak (Gobernu Bilera 2022-04-26)

fotoconsejo.jpg

2022-04-26

  • Gobernantza Publiko eta Autogobernu Sailari agindu dio Espainiako Auzitegi Konstituzionalera joatea prestazioaren kudeaketa gaitzen duten xedapenak defendatzeko 

Gobernu Kontseiluak baimena eman dio Gobernantza Publiko eta Autogobernu Sailari Eusko Jaurlaritzaren agerraldia eskatzeko Konstituzio Auzitegian, Voxek eta Alderdi Popularrak (PP) aurkeztutako konstituzio-kontrakotasuneko errekurtsoetan, Bizitzeko Gutxieneko Diru-sarreraren (IMV) auzian, betiere Euskal Autonomia Erkidegoaren autonomia eremuari eragiten dioten neurrian. 

Bi errekurtsoek zalantzan jartzen dute Diputatuen Kongresuak onartutako eta Euskadirekin lotura zuzena duten bi arau-xedapenen xedapen bat. Vox legebiltzar-taldeak jarritako errekurtsoaren arabera, Konstituzioaren aurkakoa da 19/2021 Legearen 5. Xedapen Gehigarria, bai eta 2022rako Estatuko Aurrekontu Orokorrei buruzko 22/2021 Legearen hogeita hamargarren azken xedapena ere. PPren errekurtsoaren xedea da, halaber, Estatuko Aurrekontuen azken xedapena, Bizi Gutxieneko Diru-sarrera arautzen duen Legearen 5. Xedapen Gehigarria aldatzen duena. 

Bai Estatuko Aurrekontuen Legeak, bai IMVren Legeak manu bat jasotzen dute, 5. xedapen gehigarria, zeinak xedatzen baitu, foru ogasunen berezitasuna dela-eta, foru araubideko autonomia erkidegoek beren lurralde eremuan hartuko dituztela beren gain lege horretan Gizarte Segurantzako Institutu Nazionalari esleitzen zaizkion eginkizunak eta zerbitzuak, bai eta prestazioa adostutako moduan ordaintzea ere. 

Joan den martxoaren 16an, Transferentzien Batzorde Mistoak (Eusko Jaurlaritzak eta Espainiako Gobernuak osatzen dute) onartu zuen IMVren eskualdatzea Euskal Autonomia Erkidegoari, eta hitzarmen bat ezartzea. Hitzarmen honen arabera, EAEk bere gain hartu baitu IMVren prestazio ez-kontributiboaren kudeaketa. Hitzarmena 2022ko apirilaren 1ean sartu zen indarrean.