Reyes Maroto ministroa Euskadira etorri da Urban Commerce 2022 Kongresuari hasiera emateko eta Merkataritzako Sari Nazionalak emateko
2022-11-08
- Industria, Merkataritza eta Turismoko ministroak Euskadi bisitatuko du datorren ostegunean, hiriko eta hurbileko merkataritzari buruzko jardunaldi batean.
- Reyes Marotok Urban Commerce Kongresua inauguratuko du Europa jauregian, Javier Hurtado Turismo, Merkataritza eta Kontsumo sailburuarekin, Gorka Urtaran Gasteizko alkatearekin eta Maider Etxebarria lehen alkateorde eta Merkataritzako zinegotzi ordezkariarekin batera.
- Barne Merkataritzako Sari Nazionalak Zumarragan banatuko dira, 25.000 biztanletik beherako udaletan merkataritza-jardunbide onenaren saria jaso duen herrian. Ekitaldian ministroa, sailburua eta Zumarragako alkatea, Mikel Serrano, izango dira.
Merkataritzako ministro Reyes Marotok inauguratuko du, ostegun honetan, azaroaren 10ean, Urban Commerce 2022 Kongresua, Europa jauregian egingo den Hiri Merkataritzari buruzko Foroa. Foro horrek Gasteiz sendotu du, erreferentzia-esparru gisa, merkataritza biziberritzeko politiketan eta hiri-merkataritzaren modernizazioaren eta berrikuntzaren inguruko esperientzien trukean.
Europa Biltzar Jauregian elkarren segidako bi jardunaldi izango dira, eta 25 adituk baino gehiagok erantzun baliagarriak emango dizkiote hiriko merkataritzari, arduradunek ingurune aldakor eta ziurgabetasunez beteriko batean aurrez aurre jarri behar dituzten agertoki berrien aurrean. Nazioarteko profesionalen arteko topagunea da. Profesional horiek ospe handia dute hainbat gaitan, hala nola merkataritza-hirigintzan, iraunkortasunean, marketinean, kontsumo-joera berrietan, immigrazioaren fenomenoan, merkataritzan, berrikuntzan, teknologia-aldaketetan eta txikizkako merkataritzaren garapenean, irisgarritasun-soluzioetan eta merkataritza-formatu berrietan.
Merkataritzako Sari Nazionalak Zumarragan
Urban Commerceko hitzaldiaren ondoren, Reyes Maroto ministroa Zumarragara joango da Javier Hurtado sailburuarekin batera. Udalerri honek 25.000 biztanletik beherako udalen Barne Merkataritzaren Sari Nazionala jaso du, eta Espainiako geografia osotik etorritako saridunak izango dira bertan, 12: 00etatik aurrera, Zelai Arizti Kultur Etxean. Hiru sari-kategorietatik bitan euskal saridunak egoteak eragin du egoitza aukeratzea.
Barne Merkataritzako Sari Nazional hauek 25. edizioa dute, eta urtero aintzatesten dute udalen kudeaketa, tokiko merkataritzari laguntzeko hiri-berrikuntzako jardueretan, bai eta saltoki txikiei eta enpresak garatzeko eta modernizatzeko lanean irekitako merkataritza-guneen elkarteei ere.
