Langile finkoen erretiro partzialeko planari buruzko akordioa onartu du Jaurlaritzak (Gobernu Bilera 2022-3-29)

fotoconsejo.jpg

2022-03-29

Euskal Autonomia Erkidegoko Administrazioko Negoziazio Mahai Orokorrak lan-kontratuko langile finkoen 2022rako Erretiro Partzialeko Planari buruz hartutako erabakia onartu du Gobernu Kontseiluak gaurko bileran. Hori da enplegatu publikoen lan-bizitza amaitzeko bidea hobetzeko aurreikusitako neurrietako bat.

Plana aurtengo abendura arte egongo da indarrean, eta CC.OO. eta UGT sindikatuen babesa izan du, Negoziazio Mahai Orokorraren aplikazio eremuan sartzen diren lan-kontratuko langile finkoei erretiro partziala hartzeko duten eskubidea aitortzeko.

Akordio hori Euskal Autonomia Erkidegoko sektore publiko osora zabaldu ahal izango da, aldez aurretik negoziazio kolektiboa eginda eta ordezkaritza sindikalak eta sektore publikoko erakundeek dagozkien akordioak hartuta. Zehazki, honako sektore eremu hauetara:

- Administrazio Orokorreko eta haren erakunde autonomoetako lan-kontratuko langileak

- Hezkuntza Saileko lan-kontratuko irakasle eta hezitzaileak

- Hezkuntza Departamentuko Erlijioko lan-kontratuko langileak.

- Segurtasun Saileko lan-kontratuko langileak.

- Osakidetzako lan-kontratuko langileak.

Plan honen xede den lanaldi partzialeko erretiroaren modalitatean sartzea borondatezkoa izango da.