Gobernantza Publiko eta Autogobernu Sailburuak IMVren transferentziari buruzko akordioaren berri eman dio Jaurlaritzari (Gobernu Bilera 2022-3-22)

2022-03-22

• Olatz Garamendik Transferentzien Batzorde Mistoak prestazioa kudeatzeko hitzarmenari buruz hartutako erabakiaren xehetasunak helarazi dizkio Gobernu Kontseiluari 

Olatz Garamendi Gobernantza Publiko eta Autogobernu Sailburuak Gobernu Kontseiluari jakinarazi dio Euskal Autonomia IMVren Gizarte Segurantzaren prestazio ez kontributiboaren kudeaketa bere gain hartzeko hitzarmena ezartzeko erabakia. Transferentzia hori Estatuko Administrazioaren eta Euskal Autonomia Erkidegoaren arteko Transferentzien Batzorde Mistoan adostu eta ziurtatu zen, joan den asteazkenean, martxoaren 16an. 

Transferentziaren ondorioz, Eusko Jaurlaritza arduratuko da Bizitzeko Gutxieneko Diru-sarrera izapidetzeaz, aitortzeaz eta ordaintzeaz. Honenbestez, Euskal Autonomia Erkidegoan prestazio hori orain arte gauzatzeko kudeaketa gomendioari amaiera emango zaio. Aurrerantzean, IMVa Diru-sarrerak Bermatzeko Errentan (RGI) integratu beharko da, Euskadin gizarte laguntzako eskumenetik eskaintzen baita. Herritarrei begira, egoera berriaren ondorioz, Euskadin laguntza publikoaren tramitazioa eta ordainketa esku berean egongo dira, Lanbiden. 

Jaurlaritzak IMVren transferentzia bere gain hartzea ahalbidetzen duen hitzarmena Euskal Herriko Agintaritzaren Aldizkarian (EHAA) argitaratzea izango da hurrengo urratsa.