Pandemiaren hasiera-hasieratik, Europako erakundeek erregelamenduak eta araudiak erraztu eta malgutzea erabaki zuten, ahal zen neurrian, indarrean dauden programen bidez Europako eskualdeetako funtsak erakartzen laguntzeko. Aukera hori baliatuz, Eusko Jaurlaritzak erabaki zuen Euskadiko EGEF 2014-2020 Programa Eragilea aldatzea eta, salbuespen gisa, pandemiaren aurkako borrokari aurre egiteko beharrezko osasun-gastua sartzea.
Europako Batzordeak 2020ko abuztuan onartu zuen birprogramazio horri esker, Eusko Jaurlaritzak hautatu gabeko gastu programatu ia guztia transferitu ahal izan zuen 1. Ardatzeko “enpresek gidatutako I+Gko jarduerak bultzatzea eta sustatzea, enpresa berritzaileak sortzen eta sendotzen laguntzea eta erosketa publiko berritzaileari laguntzea” Helburu Espezifikotik “COVID-19ak eragindako krisiari erantzuteko gaitasunak indartzeko beharrezkoak diren jarduketak” Helburu Espezifiko berrira. Gainera, EGEF Programa Eragilearen aldaketak Europar Batasunaren finantzaketa-ehunekoa % 100era igotzen zuen aldi baterako.
Horrela, Europar Batasunak (EB), EGEFen bidez, hiru lurraldeetako hainbat Erakunde Sanitario Integratutan (ESI) jarduketak finantzatu ditu erabat, eta pandemiaren aurka borrokatzeko ekipamendua eta materiala erosi ditu. Arabako Txagorritxuko Unibertsitate Ospitaleko Kanpo Kontsultetan eta Arabako Santiago Apostoluaren Ospitalean egindako ekintzak nabarmendu behar dira, baita zerbitzu zentralen eraikin berrirako eta Txagorritxuko bloke kirurgikorako ekipamenduaren erosketa ere. Bizkaian, Urdulizko Ospitaleko laugarren solairuan eta Gorlizko osasun-barrutian ospitaleratzeko ekipamendu klinikoa eta funtzionala erosi zen. Gainera, Gurutzetako Unibertsitate Ospitaleko bigarren solairuko Anestesia Ondoko Bizkortzeko Unitatean aireztapena eta klimatizazioa instalatu ziren. Eta Gipuzkoan, EGEFen finantzaketari esker, Eibarko Ospitaleko hirugarren solairuan, Debabarrena Eskualdean, argindarra egokitu zen, eta Eibarko Ospitalerako oheburuak erosi ziren.
Ekipamenduetan egindako inbertsio materialen artean, ospitaleetako espazioak egokitzeaz gain, instalazio elektrikoak, aireztapenekoak eta klimatizaziokoak, biltegiratze-zerbitzuak eta beste ekipamendu batzuk, COVID pazienteentzako oheak eta arnasgailuak erosi ziren koronabirusaren tratamenduan laguntzeko. Honako hauetan ere inbertitu zen: monitoreak, X izpi unitate eramangarriak, ekografoak, infusio-ponpak, emari-neurgailuak eta bakuorregulatzaileak, ECMO ekipo kardiorrespiratorioak, elektrokardiografoak, hezegailuak, serum-euskarriak, 2rako BIS moduluak eta kabina biologikoak, eta hainbat ospitaletarako altzariak eta ekipamendua erosi ziren. Eusko Jaurlaritzak Europako Batasunaren 56,9 milioi euroko laguntza ere jaso zuen, Osakidetzak COVID-19ari aurre egiteko norbera babesteko ekipamenduak erosteagatik egindako gastuaren % 100ari dagokiona. Osakidetzak erositako materiala musuko kirurgikoek, FFP2 babes-musukoek, FFP3 babes-musukoek, mantalek, buzoek, eskularruek eta betaurrekoek eta babes-pantailek osatzen dute nagusiki.
Guztira, inbertsioen eta materialean egindako gastuaren artean, 2020ko martxotik 2021eko ekainera arte, Eusko Jaurlaritzak (Osakidetzak) pandemiaren aurkako osasun-laguntzari aurre egiteko COVID Berariazko Helburuan 80,5 milioi euroko jarduketak sartu zituen, eta Europako Funtsek horien % 100a finantzatu zuten.