Beatriz Artolazabal AFARABAren 30. urteurrenean: "Alzheimerra dutenei eta hainbesteko grinaz, pazientziaz eta enpatiaz haiek zaintzen dituzten pertsona eta familiei beharrezko baliabideak eta laguntza bermatu behar dizkiegu"

2022-09-14

Berdintasun, Justizia eta Gizarte Politiketako sailburu Beatriz Artolazabalek parte hartu du gaur arratsaldean Gasteizen, AFARABA, Arabako Alzheimerra eta beste dementzia batzuk dituzten pertsonen senide eta lagunen elkartearen 30. urteurrena ospatzeko ekitaldian.

Bere hitzaldian, Artolazabalek parte hartu duen bertaratutakoekin partekatu du gaixotasun gogor horren esperientzia pertsonala; amonak eta amaginarrebak ere izan zuten alzheimerra. Oso hunkituta, gogora ekarri du “lehen uneetako gogortasuna, familia osoaren nahasmena zela eta, ezagutzen genuen amama izateari uzten hasi zenenean”. Sailburuak “mendekotasuna eta zainketen beharra” ere azpimarratu du, baita “zaintzaileak oxigenatzeko uneak bilatu beharra” ere.

Ildo horretatik, eta datorren irailaren 21ean ospatzen den Alzheimerraren Nazioarteko Egunaren esparruan, Berdintasun, Justizia eta Gizarte Politika Saileko arduradun nagusiak adierazi du Eusko Jaurlaritzak egiten duen zainketa-ereduak “kontuan hartzen dituela erakunde publikoen erantzukizuna eta konpromisoa, gaixotasun hori dutenei eta hainbesteko pazientziaz arduratzen diren pertsona eta familiei baliabideak eta laguntza bermatzeko. Zaintzaileei bermatu behar diegu zainketa horiek bateragarriak direla atseden negoziaezinarekin eta beren bizitza pertsonal eta profesionalen gainerako dimentsioekin”. Horrek, azaldu duenez, “norberaren edo familiaren zaintzari buruzko erantzukizuna eremu komunitario eta publikora zabaltzea eskatzen du. Zainketak demokratizatzea eskatzen du, eta etxeko laguntza, eguneko zentroak edo prestazio teknikoak bezalako baliabideak ezartzea”.

Beatriz Artolazabalek zorionak eman dizkio AFARABA elkarteari egiten ari den “lan handiagatik”, eta adierazi du ordezkatzen duen sailak “gaixotasunaren bilakaera ahal den neurrian gizatiartu, duindu eta atzeratzeko helburua” partekatzen duela elkartearekin. Horretarako, gaineratu du “prebentzioaren, diagnostiko goiztiarraren, esku-hartze goiztiarraren eta ikerketaren aldeko apustua egiten jarraituko dugu”.