Azken bi urteetan koronabirusaren doinura dantzan aritu ostean, areto beteak, maskararik gabeko bisaiak eta jaiak bueltan izango dira Donostiako Zinemaldian, gaur hasi eta irailaren 24ra arte. Juliette Binochek eta David Cronenbergek jasoko dituzte Donostia sariak.

"Normaltasun berria" izen gezurtiarekin hitzetik hortzera ibili zen ilusio hori (oraingoz) desagertuta, "normaltasun zaharrera" -hots, ohikora, normaltasunera- itzuliko da Donostiako Zinemaldia gaur, ostiralarekin, hasi eta datorren larunbatera arte. 2019tik lehenengoz, areto beteak eta harridura, beldurra eta barregura adierazten dituzten keinuak ikusiko ditugu zinemetan eserleku hutsen barrerarik gabe.

70 urte beteko ditu Donostiako zinema jaialdiak aurten, eta bi izar handik argituko dute, besteak beste, topagunearen edizio biribil hau. Hain zuzen ere, Juliette Binoche frantses aktoreak eta David Cronenberg kanadar zuzendariak edizio honetako Donostia sariak jasoko dituzte, igandean (22:00) eta asteazkenean (22:30) hurrenez hurren, eitb.eus-ek eta ETBk zuzenean eskainiko dituzten galetan.