Kanpo-merkatuetan ardogintzako produktuak ezagutarazteko eta sustatzeko ekintzetarako laguntzak deitu dituzte (Gobernu Bilera 2021-1013)
2021-10-13
- Laguntza horiek Eusko Jaurlaritzak, ARDOA Basque Wine Office"ren koordinazioaren eta finantzaketaren bitartez, edarien sektoreari laguntzeko abiarazi dituen ekimenetako bat dira
- Zenbatetsi da 23 milioi euroko balioko jarduketak aurkeztuko direla, eta Arabako Errioxako upategiak eta Txakolin upategiak izango dira onuradunak
Eusko Jaurlaritzak onetsi egin du Ekonomiaren Garapen, Jasangarritasun eta Ingurumeneko sailburuaren Agindua, 2021eko maiatzaren 1etik 2022ko apirilaren 30era arte ardogintzako produktuak hirugarren herrialdeetan ezagutarazteko eta sustatzeko garatuko diren ekintza eta programetarako laguntzak deitzen dituena. Zenbatetsi da 23 milioi euroko jarduketak aurkeztuko direla, eta 10 milioi baino gehiago laguntza horietatik etorriko dira.
Laguntza horiek Eusko Jaurlaritzak edarien sektoreari laguntzeko abiarazi dituen ekimenetako bat dira, eta horien artean daude, halaber, inbertsioa babestea, sektorearen lehiakortasuna hobetzea, kokapen- eta merkaturatze"ekintzak sendotzea, eta Euskadiko upategiak eta ardoak sustatzeko ekintza berriak abiaraztea, ARDOA Basque Cine Office-k koordinatuta eta finantzatuta.
ARDOAREN OCM-REN SUSTAPEN PROGRAMA
Programa honen helburua da egungo egoera bideratzea euskal mahastizaintzako eta ardogintzako ekoizleen lehiakortasuna areagotzeko eta beraien ardoek kanpoan kokapen sendoagoa eduki dezaten. 2020-2021 aldirako zuzeneko laguntzak dira, gaur egun gauzatzen ari dena. Aparteko finantzaketa izan du eta aurreikusitakoa baino dirulaguntza handiagoa jaso dute, 8,3 milioi eurotik 12,3 milioira igo baita.
Laguntza horiek Arabako Errioxako upategietarako eta hiru lurralde historikoetako Txakolin upategietarako dira, zuzeneko kontsumorako kalitateko produktua hirugarren herrialdeetan ezagutarazteko eta sustatzeko programak garatzeko. Produktu horiek esportatzeko aukerak eduki behar dituzte edo hirugarren herrialdeetan merkaturatzeko bide berriak, eta kategoria hauetako batekoak izan behar dira:
- Jatorri-deitura babestuko ardoak
- Adierazpen geografiko babestuko ardoak
- Ardo-mahats aldaeraren edo aldaeren izena adierazita duen ardoa
Onuradun izan daitezke ardogintzako enpresak zein haien elkarteak, kooperatibak, aldi baterako taldeak edo produktua sustatzen diharduten erakundeak.
Diruz lagundu daitezkeen ekintzak eta jarduerak
Hauek dira diruz lagundu daitezkeen ekintzak:
- Harreman publikoak eta sustapen- eta publizitate"neurriak, bereziki erkidegoko produktuek kalitateari, elikagaien segurtasunari eta ingurumenari dagokienez dituzten abantailak nabarmentzeko direnak.
- Nazioartean garrantzitsuak diren agerraldi, azoka eta erakusketetan parte hartzea.
- Informazio kanpainak, bereziki jatorri-deituren, adierazpen geografikoen eta ekoizpen ekologikoen sistema komunitarioei buruzkoak.
- Merkatu berrien azterketak, irteera komertzial berriak bilatzeko beharrezkoak direnak.
- Sustapen eta informazio neurrien emaitzen ebaluazioa.
Eskarien aurreikuspena
Laguntza-eskariak agindua argitaratu eta hurrengo egunetik hasi eta 2022ko urtarrilaren 15era bitartean aurkeztuko dira www.euskadi.eus egoitza elektronikoan:
https://www.euskadi.eus/servicios/0111011
