EIJO - Euskadiko Ikasleen Jazz Orkestra: ikasleen Big Band-a hemen da berriz
2021-06-29
- Asteburuan eskainiko ditu EIJOk udako kontzertuak Areatzan, Elorrion eta Irunen
- Nazioartean entzute handia duten lau konpositorek taldearentzako propio idatzitako lanak joko ditu EIJOk kontzertuetan
- Instrumentazioagatik eta soinuagatik, bakarra da EIJO munduan; Big Band-en errepertorio tradizionala Euskal Herriko musika tresnekin fusionatzen du
Saxofoiak, muntatuta. Pianoa, afinatua. Tronpetak, prest. Gitarra elektrikoak, konektatuta… eta garrantzitsuena: musika eskola eta kontserbatorioetako ikasleen taldea hasi dela musika-tresnak berotzen, eta irrikaz daudela kontzertuetan dakiten guztia emateko. EIJO da, Euskadiko Ikasleen Jazz Orkestra, bakarra munduan bere instrumentazioagatik eta soinuagatik; izan ere Big Band-en errepertorio tradizionala Euskal Herriko musika tresnekin fusionatzen du EIJOk: alboka, trikitia, txalaparta eta txistua. Itxura bikaina du!
Atzotik, ekainaren 28tik, EIJO osatzen duten 28 ikasleek astebeteko kontzentrazioa eta entseguak egiten ari dira egiten Bilbon, laster izango dituzten kontzertuak prestatzeko. Aste trinkoa izango dute igandera arte. Kontzertuak asteburu honetan bertan eskainiko dituzte Areatzan, Elorrion (Musikaire Jaialdiaren barruan) eta Irunen. 14 eta 19 urte bitarteko ikasleek beraientzat osorik konposaturiko errepertorioa eskainiko dute.
28 musikari gazte
Joan zen abenduan egin zituen EIJOk hautaprobak Euskadiko musika eskola eta kontserbatorioetako ikasleen artean. Audizio haien bidez, Euskadiko ikaslerik aurreratuenak aukeratu ziren EIJO osatu eta kalitaterik oneneko interpretazioak ziurtatzeko. 28 ikaslek osatzen dute aurten EIJO, honako instrumentazio honekin:
-Ahotsa
-Alboka
-Bateria
-Baxu elektrikoa
-Gitarra elektrikoa
-Pianoa
-Saxofoia
-Trikitia
-Tronboia
-Tronpeta
-Txalaparta
-Txistua
EIJOrentzat propio konposatutako errepertorioa
EIJOk uda honetako kontzertuetan 70 minutu inguruko errepertorioa eskainiko du, taldearentzako propio idatzitako lanekin erabat. Aurten, EIJOk sei enkargu eskatu dizkie nazioartean entzute handia duten lau konpositoreri, Big Band honentzat lanak idatzi ditzaten. Hauek dira EIJOrentzat lanak konposatu dituzten konpositoreak:
- Miguel Blanco: Grammy sari baten irabazle, disko latinorik onenaren atalean. SGAEren Jazz Konposizio lehiaketa irabazitako konpositore eta moldatzailea.
- Jacky Bérécochéa: hamaika taldetan tronpetista eta konpositore.
- Carlos Sagi: perkusionista eta konpositorea. SGAEren Big Band-entzako moldaketen lehiaketaren irabazle.
- Sergi Verges: Bartzelonako Conservatori Liceu-ko BIg Band-aren zuzendari.
Kontzertu egitaraua:
Orro Txikia............................................Carlos Sagi
Zuberoako Karakoiltzia.......................Sergi Vergés
Hegoa.........................................Jacky Bérécochéa
Lau eta Bat (Euskal Suite)..................Sergi Vergés
Itzultzen.............................................Miguel Blanco
Amaia ...................................................Carlos Sagi
EIJO -- Euskadiko Ikasleen Jazz Orkestra
2021eko uda
Zuzendaria: Alain Sancho
Egonaldia eta entseguak Ekainak 28 – uztailak 4 Miguel Unamuno Ikasleen Egoitza Bilbo |
Kontzertua Uztailak 3, larunbata Elorrio, Musikaire jaialdia 20:00etan |
Kontzertua Uztailak 2, ostirala Areatza, Gudarien Plaza 21:30etan |
Kontzertua Uztailak 4, igandea Irun, Amaia KZ Antzokia 19:00etan |