Segurtasuneko sailburuak Getxoko Ertzain-etxea zaharberritzeko eta handitzeko proiektua aurkeztu du
2020.eko uztailak 17
Lanen bidez eraikina hirian integratzea aurreikusten da, herritarren arretan gertutasuna lortzeko
Getxo, 2020ko uztailak 17.
Estefanía Beltrán de Heredia Segurtasuneko sailburuak gaur goizean aurkeztu du Getxoko Ertzain-etxea zaharberritzeko eta handitzeko proiektua. Ertzain-etxeak Getxo, Berango, Sopela, Urduliz, Barrika, Plentzia, Gorliz eta Lemoizko 115.000 bizilaguni ematen die zerbitzua. Planak lehendik dagoen eraikina, Basterra Jauregia, alegia, goitik behera zaharberritzea aurreikusten du, eta eranskin bat eraikitzea herrigunean integratu ahal izateko, herritarrei gertuko arreta emateko, genero-indarkeriaren biktimei arreta atseginagoa emateko eta ituri berriztagarriak, geotermia, alegia, erabiltzeko.
Getxoko Ertzain-etxea zaharberritzeko eta handitzeko proiektua Ertzaintzaren Azpiegiturak Kudeatzeko Plan Orokorrean sartuta dago. Segurtasun Saila legealdian zehar joan da plana garatzen polizia-eraikinak egokitzeko, besteak beste Ondarroako Ertzain-etxea, Zabalburuko, Gasteizeko eta Loiuko aireportuko herritarren arretarako bulegoak eta Tolosako, Hernaniko eta Basauriko ertzain-etxeak.
Lau dira Euskadiko ertzain-etxeetako obra berriak egiteko kontuan hartu diren alderdiak: irisgarritasun unibertsala, hirian integratzea, jasangarritasuna eta energia-efizientzia eta Segurtasun Sailak herritarrei arreta ematearen arloan duen ikuspegi berria, eta, horretarako, besteak beste, genero eta etxeko indarkeriaren biktimei arreta emateko aretoak egokituko dira atseginagoak izan daitezen.
Eraikin berria
Getxoko Ertzain-etxeko lanen helburua eraikina zaharberritzea, handitzea eta ingurua urbanizatzea dira. “Gaurtik hasi eta 26 hilabeteko epean, alde batetik, Ertzain-etxea bertan ezarri zenetik zerbitzuen zati handi bat hartu duen Basterra Jauregiaren eraikina zaharberrituko da. Ertzain-etxea ere handitu egingo da, eta ondoko eraikin berri bat eraikiko da, egungo ertzain-etxe batek, Getxokoa kasu honetan, herritarrei eskaini behar dizkien antolaketa- eta zerbitzu-premiekin bat datorrena”, adierazi du Estefanía Beltrán de Heredia Segurtasuneko sailburuak, eta erantsi du lanak egiteko prozesuaren baitan inguru osoa urbanizatuko dela eraikinak herrigunean modu egokiagoan integratzeko eta herritarrei gertuko zerbitzua emateko.
Proiektua fasez fase egingo da. Lehenengo fasean hiru solairuko eraikin berri bat egingo da, xumea, irekia eta erdi-lurperatua. Azalera erabilgarria 4.000 metro karratukoa izango da, eta inguruaren urbanizazioa ere barne hartzen du. Higiezin hori lehendik dagoenari erantsita eraikiko da eta egungo modulu aurrefabrikatuak ordezkatuko ditu. Eraikin horretan bilduko dira herritarrei arreta emateko eta ikerketako guneak, salaketak hartzeko gelak eta GI/EIko biktimei arreta ematekoak, atxiloketa-zentroa eta aparkalekua, biltegiak eta aldagelak.
Bigarren fasean lehendik dagoen eraikina goitik behera zaharberritzea aurreikusten da, eta bertan bilduko dira gero Aginte eta Komunikazio Zentroa, Ertzain-etxeko buruzagitzak, Giza Baliabideen Zuzendaritzaren bulegoa eta administrazio-bulegoak.
Egungo Ertzain-etxearen eraikina zaharberritzeko lanak direla eta, Getxoko Ertzain-etxera atxikitako pertsonala Erandioko Polizia Zentrora eraman da, Erandioko Larrauri Mendotxe Bideko 18. zenbakira, alegia, eta bertan egongo da aldi baterako.
Fase hori amaitu bitartean, Ertzaintzak egungo kokapenean mantenduko du Herritarren Arretarako Bulegoa, eta egunean 24 orduan emango du zerbitzua, batez ere herritarrei arreta emateko eta salaketak jasotzeko. Bestalde, Herritarren Arretarako Plentziako Bulegoan ohiko zerbitzua ematen jarraituko dute.
Bigarren fasean, herritarren arretarako zerbitzuak 1. fasean eraikitako eraikin berrira eraman daitezkeenean, goitik behera zaharberrituko da lehendik dagoen eraikina, Basterra Jauregia, eta lan horiek amaitzen direnean bertan bilduko dira Aginte eta Komunikazio Zentroa, Ertzain-etxeko buruzagitzak, Giza Baliabideen Zuzendaritzaren bulegoa eta administrazio-bulegoak.
Proiektuaren helburuetako bat iturri berriztagarriak, esate baterako, geotermia, erabiliz energia-efizientzian laguntzea ere bada.
“Getxoko Ertzain-etxea goitik behera berrituko dugu, eta eraikin osoa egokituko dugu irisgarritasun-irizpideetara eta teknologiarik aurreratuenak erabiltzeko egokitzapen-premietara, aldi berean atmosferara isurtzen diren CO2 emisioak ahalik eta gehien minimizatuz”, adierazi du Segurtasuneko sailburuak.
Proiektua 7.893.760 euroan esleitu da, eta 2020an, 2021ean eta 2022an garatuko da.
