Itelazpiko zuzendariak Eusko Jaurlaritzaren telekomunikazioek proiektu publiko aurreratuen sustapenean duten papera azpimarratu du
2020.eko azaroak 06
- Matxalen Lauzirika, Itelazpiko zuzendari nagusia, Eraldaketa Digitaleko Mahaiko kide izan da, eta telekomunikazio-azpiegiturek aro digital berriko proiektu eta zerbitzuen garapenean duten funtsezko eginkizuna balioetsi du.
LEADERS IN TECH izeneko topaketan, INNOLAB Bilbao berrikuntza gune irekiak antolatutakoa, Adimen Artifiziala, Konputazio Kuantikoa, Blockchain eta Zibersegurtasuna izan dira hizpide. Lau teknologia horiek gure ekonomia eta gizartea eraldatzen ari diren digitalizazio eta berrikuntza prozesuen oinarri dira.
Matxalen Lauzirika, Itelazpiko zuzendari nagusia, Eraldaketa Digitaleko mahaian hizlari diren emakumeen plantxan parte hartu du eta arreta jarri du Eusko Jaurlaritzaren telekomunikazio publikoen azpiegiturek, aktibo estrategiko gisa, euskal sektore publikoa aro digital berriaren abangoardian egotea ahalbidetuko duten proiektu eta zerbitzuen garapenean izango duten zereginean. Lauzirikak Itelazpin garatutako adibideak ezagutarazi ditu, hala nola, azpiegituren urruneko kudeaketa, itsasontziak kontrolatzeko AIS sistemaren proiektua, IoT bidezko ur-kontagailu telematikoak (Internet of Things) eta Euskalmeterako telekomunikazio-zerbitzuak, bai eta azpiegitura publikoek 5G garatzeko izan dezaketen zeregin garrantzitsua ere.
Leaders in Tech konferentziaren helburua sektore publikoan eta pribatuan egiten ari diren aurrerapenak eta proiektuak ikusaraztea da, lehen aipatutako eremuetan jarduerak zuzentzen ari diren pertsona eta erakundeei ahotsa emanez. Era berean, saioak aukera emango du profil digitalen, zientifikoen eta teknologikoen edo eremu digitalean gaitasunak garatzen dituzten beste diziplina batzuen eskariari laguntzen dion talentua ikusarazteko, horiek funtsezkoak baitira 4.0 industriarako eta euskal ekonomiaren eraldaketa digitalerako.
