Eusko Jaurlaritzak 626.800 euro onartu ditu euskarazko eta gaztelaniazko literatura argitalpenak laguntzeko (Gobernu Bilera 2020-7-7)
2020.eko uztailak 07
- Iaz, 32 diru-laguntza eman ziren deialdi honen bidez, eta 477 liburu argitaratu ahal izan ziren
Eusko Jaurlaritzako Gobernu Batzordeak, bere gaurko saioan, 626.800 euroko kontu-saila onartu du literatura argitalpenak diruz laguntzeko. Kultura eta Hizkuntza Politika Sailaren deialdi honek 511.800 euro bideratuko ditu euskarazko literaturaren edizioa laguntzera; gaztelaniazko lanak laguntzera, aldiz, 115.000 euro bideratuko dira. Iazko diru-laguntza deialdiaren bitartez, 32 literatura argitalpen babestu ziren; 18 euskarazko modalitatean eta 14 gaztelaniazkoan.
Diru-laguntzak ebazteko orduan, Balorazio Batzordeak kontuan izango ditu honako irizpideak: aurkeztutako lanen kultura-arloko interesa, eskaera egin duen argitaletxearen katalogoa eta ibilbidea, eta, azkenik, Edizio-Planaren ezaugarri teknikoak eta aurrekontuaren egokitasuna. Ondorengo irizpideak hartuko dira kontuan, plana bere osotasunean begiratuta:
- Lanen kalitatea.
- Lanen edukia.
- Egileen ibilbidea.
- Euskadik edota bertako biztanleek bizi duten errealitate kultural, sozial eta linguistikorekiko lotura.
Bigarrenik, eskaera egin duen argitaletxearen katalogoa eta ibilbidea. Ondorengo irizpideak hartuko dira kontuan:
- Azken hamar urteetan argitaratutako lanak.
- Berrargitalpen kopurua.
- Lanen banaketa.
Azkenik, baloratuko dira proposatzen den Edizio-Planaren ezaugarri teknikoak eta aurrekontuaren egokitasuna. Ondorengoak hartuko dira kontuan:
- Edizio mota eta euskarri digitalaren erabilera.
- Paperezko liburuaren formatua, azalaren mota, paperaren gramajea eta inpresio mota.
- Aurrekontuaren egokitasuna.
- Balorazio-baremotik gutxienez % 60ko puntuazioa lortzen ez duten proiektuak baztertuta geratuko dira eta ezin izango dira hautatutako proiektuetan barne hartu.