2,8 milioi euro doktoretza-ondoko hobekuntza-programaren beketarako (Gobernu Bilera 2020-07-21)

2020.eko uztailak 21

• 2019-20 ikasturte honetan, 60 ikertzaile dira doktoretza-ondoko laguntzen onuradun, programa honen bidez

Gobernu Kontseiluak, Hezkuntza sailburuaren proposamenez, gaurko bileran onartu du 2020-2021eko ikasturtean ikertzaile doktoreen doktoretza-ondoko Hobekuntza-programarako laguntzak deitzen dituen agindua. Deialdi honek 2.778.500 euroko zenbatekoa dauka.

Programa honek doktoretza-ondoko lehen fasean dauden ikertzaileen hobekuntzarako bide bat eskaintzen du, gehienez ere hiru urteko iraupena izan dezakeena. Doktoreak lan-kontratua sinatu beharko du ikerketan diharduen euskal entitateren batekin. Entitate hau izan daiteke unibertsitatea, ikerketa zentroa edo osasun arloko ikerketarako institutua, I+Gn egiaztatutako jarduna duena. Ezarpen-zentro honek egoitza Euskadin izan beharko du eta Zientzia, Teknologia eta Berrikuntzaren Euskal Sarearen agente gisa egiaztatuta egon beharko du.

Hiru jarduera-lerro ditu programak:

• Laguntza berrien lerroa (ikerketa orokorrean), ikertzaile doktoreen kontratu berriak finantzatzeko. Zenbateko osotik 921.600 euro gordetzen dira lerro honetarako.
• Laguntza-berritzeen lerroa, 2019-2020ko deialdian emandako laguntzak berritzekoa. Zenbateko osotik gainerako 1.779.900 euroak bideratzen dira lerro honetara.
• Laguntza berrien lerroa (berariazko ikerketan)ikertzaile doktoreen kontratu berriak finantzatzeko. Zenbateko osotik 77.000 euro gordetzen dira lerro honetarako.

 

Lerroak:	Guztira
Laguntza berriak (ikerketa orokorrean)	921.600 €
Laguntza-berritzeak	1.779.900 €
Laguntza berriak (berariazko ikerketan)	77.000 €
Guztira	2.778.500 €

 

Laguntza-berritzeak eta Laguntza berriak (ikerketa orokorrean), honako ezagutza-arlo hauetako doktoretza-ondoko ikerketak burutzeko eskatu ahal izango dira: Oinarrizko Zientziak; Bizitza eta Osasun Zientziak; Ingeniaritzak, Teknologiak eta Arkitektura; edo Gizarte Zientziak eta Humanitateak.

Laguntza berriak (berariazko ikerketan): Datorren 2020-2021 ikasturterako deialdi honek neutronika eta partikulen azelerazioan ikerketa bultzatzeko berariazko diru-laguntza lerroari eusten dio. Ikerketa arlo hau interes berezikoa da egun Europako Batasunean eta bereziki Euskadin, balio estrategiko handia baitu EAEko zientzia, teknologia nahiz industriaren etorkizunerako. Gainera, Euskadiko I+G+b garatzeko ere abagunea eskaintzen du. Gure erkidegoko zientzia-komunitatea arlo honetan sendotzea eta areagotzea lehentasunezko helburua da, Europako Batasunak ESS Lund espalaziozko neutroi iturriaren inguruan ezarri dituen helburu zientifikoak indartzeko.

Doktoretza-ondoko kontratuak

Gorago aipaturiko ezarpen-zentroren batekin lan-kontratua sinatzen duen ikertzaile doktorea izango da laguntza hauen onuraduna. Baina ezarpen-zentro horrez gain, doktoreak atzerriko zentro bat ere izango du, eta bolada baterako hara lekualdatuko da bere ikerketa lana burutzera. Atzerriko zentroak ere unibertsitate edo ikerketa-zentroak izango dira.

Kontratua sinatzearekin, laguntza emateko arrazoi izan den ikerketa-proiektua esklusibotasunez egiteko konpromisoa hartzen du doktoreak. Kontratu honen iraupena urtebetekoa izango da, baina urtebeteka luzatu ahal izango da berrituz gero, gehienez ere 36 hilabete arte.

36 hilabete horiek bi fasetan antolatuko dira: lehenengoa 24 hilabetekoa

izango da gehienez, eta ikertzailea atzerriko ikerketa-zentro batera joango da, bere ezarpen-zentroa  utzita,  ikerketa-proiektu  bat  gauzatzeko.  Bigarren  fasea,  berriz,  12  hilabetekoa  izango  da gehienez; fase horretan, ikertzailea Euskadiko ikerketa-talde batean sartuko da. Lehen bi urte horietan laguntzaren onuradunak atzerriko zentrora urtean joan-etorriko bidaia bat finantzatzeko osagarri bat izango du.

 

2019-2020 ikasturte honetan, 60 euskal ikertzaile dira doktoretza-ondoko laguntza hauen onuradun, iazko deialdiari esker: 24 ikertzaile, onuradun berriak dira, eta gainerako 36 ikertzaileek laguntza berritu egin dute.

 

Programa honen bidez, Hezkuntza Sailak ikertzaileen prestakuntzan kalitatearen eta eraginkortasunaren aldeko apustua egiten duen eredu bat sustatu nahi du. Era berean, urtero ebaluatu daitekeen lan-kontratu baten bidez, ikertzaileak mundu profesionalaren errealitatera hurbiltzen ditu, eta zientziaren eta teknologiaren alorrean belaunaldi berri bat sortzea sustatzen du.

 

 

200.000 euro kongresuak eta zientzia bilerak egiteko laguntzatan

Gobernu Kontseiluak, Hezkuntza sailburuaren proposamenez, gaurko bileran onartu du ikerketa zientifikoaren arloko kongresu eta bilera presentzialak antolatzeko dirulaguntzak ematen dituen agindua. Kongresu eta bilera horiek Euskal Autonomia Erkidegoan burutu beharko dira, 2020ko bigarren seihilekoan. Deialdi honek 200.000 euroko diru-kopurua du.  

Laguntza hauen onuradun izan daitezke Zientzia, Teknologia eta Berrikuntzarako Euskal Sareko agente kreditatuak, haien kategoria edozein dela ere.

Diru-laguntza hauek, honako gastu arrunt hauek ordaintzeko erabili beharko dituzte: kongresu edo bileraren antolamendua eta zabalkunde gastuak, hizlari gonbidatuen parte-hartze gastuak, edo kongresuen kasuan, ekarpen zientifikorik onenari eman ohi zaion saria, beste hainbat gasturen artean. Jardunaldiok 2020ko uztailaren 1a eta abenduaren 31 artean burutu beharko dira.

Deialdi honetatik kanpo geratuko dira, bereziki prestakuntzakoak diren ikastaroak eta jarduerak, hala nola irakaskuntzako eta ikaskuntzako trebakuntzarako prestakuntza-jardunaldiak, tailerrak edo mintegiak, besteak beste.

Biltzar eta bilera zientifikoen eremu horretan eragin handia izan du COVID-19 pandemiak, eta formatu berriak sartu dira, unibertsitateek eta ikerketa-zentroek egiten duten ikerketaren emaitzak zabaltzeko. Horregatik, salbuespen gisa, laguntzen deialdi honek aukera ematen du kongresu eta bilera zientifikoak modu birtualean edo on-line finantzatzeko.