2,45 milioiren laguntzak onartu ditu Eusko Jaurlaritzak nekazaritza, basogintza eta arrantza sektoreetan I+G+Ba bultzatzeko (Gobernu Bilera 2020-0630)
2020.eko ekainak 30
- Helburua da efizientzia areagotzea, lehiakortasuna hobetzea, hazkunde iraunkorrean laguntzea eta sektoreen arteko lankidetza sustatzea.
- Kontseiluaren bilera berean oniritzia eman zaie nekazaritza eta arrantzaren sektoreko eta elikagaien sektoreko elkarteei zuzendutako 430.000 euroren laguntzei.
Euskal Autonomia Erkidegoan, nekazaritzan, basogintzan eta arrantzako eta akuikulturako produktuen sektorean ikerketa, garapena eta berrikuntza bultzatzeko emango diren 2.450.000 euroren laguntzak iragartzeko Ekonomiaren Garapeneko eta Azpiegituretako sailburuak emandako agindua onartu du Eusko Jaurlaritzak, azken Kontseilu bileran. Kontseiluaren bilera berean onartu da, halaber, Euskadiko nekazaritza, arrantza eta elikaduraren sektoreko elkarte eta federazio profesional eta enpresarialentzako laguntzak arautzen dituen agindua.
I+G+Bko laguntzak
Lehen sektorean eta baserri munduan ikerketa, garapena eta berrikuntza sustatzeko eta suspertzeko exekutibo autonomoa egiten ari den lanaren barruan, laguntza hauen helburua da efizientzia areagotzea, hazkunde iraunkorrean laguntzea eta elkarlana sustatzea Euskal Autonomia Erkidegoko nekazaritzaren, basogintzaren eta arrantzako eta akuikulturako produktuen sektoreen artean.
Laguntza lerroak
Helburu horiek lortzeko, hauek dira aurreikusten diren laguntza bideak:
- Funtsezko ikerketen, industri ikerketen eta garapen esperimentalen proiektuetarako laguntzak.
- I+G+Bko proiektuei lotuta bideragarritasun teknikoaren azterketetak egiteko laguntzak.
- Antolaketa alorrean berrikuntzak egiteko laguntzak.
Onuradunak
Hauek izan daitezke onuradunak:
- Enpresak, edozein dela ere beren forma juridikoa eta tamaina.
- Elkarteak eta Fundazioak.
- Nortasun juridikorik gabeko pertsona juridikoen edo fisikoen elkarte pribatuak eta ondasun erkidegoak.
- Zentro teknologikoak.
- Ikerketarako eta ezagutzen zabalkunderako erakundeak.
Eskaerak aurkezteko epea hilabete batekoa izango da, Agindua Euskal Herriko Agintaritzaren Aldizkarian argitaratu eta hurrengo egunetik hasita. Laguntza eskaera egiteko inprimakia web helbide honetan egongo da eskuragai: http://www.euskadi.eus.
Elkarteentzako laguntzak
Elkarteak programaren barruan ematen dira, 430. 372 euroren laguntzak dira, eta nekazaritzaren, elikagaien eta arrantzaren sektoreko elkarteek elikaduraren balio kateko agenteei eskaintzen dieten aholkularitza babesteko dira.
Eskaerak aurkezteko epea hilabete batekoa izango da, Agindu hau EHAAn argitaratu eta hurrengo egunetik hasita. Ekonomiaren Garapeneko eta Azpiegituretako Sailean, dagokion organoan, egingo da eskaera. Laguntza eskaera egiteko inprimakia web helbide honetan egongo da eskuragai: http://www.euskadi.eus.
